ལེའུ་ལྔ༌པ།
1 སྤྱིར་མི་རྣམས་ལས་མཆོད་དཔོན་ཆེན་པོར་བདམས་པ༌ཐམས་ཅད་ནི། མངགས་བཅོལ་ལྟར་མིའི་འཐུས་ཚབ་ཏུ་དཀོན་མཆོག་གི་འཕྲིན་ལས་རྣམས་བསྒྲུབ་པ༌དང༌། སྡིག་པའི་ཆེད་དུ་ཕྱག་རྟེན་དང་མཆོད་པ་རྣམས་འབུལ་བའི་ཕྱིར་ཡིན་ནོ།།
2 མཆོད་དཔོན་ཆེན་པོས་མགོ་བོ་རྨོངས་ཤིང་ཁ་ཕྱོགས་བོར་བའི་མི་རྣམས་ལ་ཐུགས་རྒྱ་བསྐྱེད་ནུས༌ཏེ། ཁོ་རང་ཡང་སྟོབས་ཞན་པའི་གནས་སུ་ལྷུང་ཡོད་པས།
3 ཁོ་བོས་འབངས་མི་དང་རང་གི་ཆེད་དུ། སྡིག་པའི་ཕྱིར་མཆོད་པ་འབུལ་དགོས་སོ།།
4 ཡང་མཆོད་དཔོན་ཆེན་པོའི་བརྗིད་ཉམས་ནི་མི་སུ་ཞིག་གིས་ཚུར་ལེན་མི་ནུས༌ཏེ། ཨ་རོན་ཇི་བཞིན་ངེས་པར་དཀོན་མཆོག་གི་ཞལ་འབོད་འཐོབ་དགོས་ལ།
5 དེས་ན་སྐྱབས་མགོན་མཱ་ཤི་ཀས་གཟི་བརྗིད་དེ་རང་ལ་བླངས་ནས་མཆོད་དཔོན་ཆེན་པོར་བྱས་པ་ནི་མིན༌ཏེ། དཀོན་མཆོག་གིས་ཁོང་ལ་འདི་སྐད༌དུ།
ཁྱོད་ནི་བདག་གི་སྲས་ཡིན༌ཞིང༌།།
དེ་རིང་བདག་ལ་འཁྲུངས་པ་ཡིན།།
ཞེས་གསུངས་པ་ཡིན༌ནོ།།
6 ཡང་མདོ་གཞན་ཞིག་ལས་འདི་སྐད༌དུ།
མཆོད་དཔོན་མཱལ་ཀི་ཚེ་དེག་རིམ་པ་བཞིན།།
ཁྱོད་ནི་ཇི་སྲིད་བར་དུ་མཆོད་དཔོན༌ཡིན།།
ཞེས་གསུངས་པ་བཞིན༌ནོ།།
7 སྐྱབས་མགོན་མཱ་ཤི་ཀ་ཁོང་ཉིད་སྐུ་གཟུགས་ཀྱི་ཕུང་བོའི་ནང་དུ་བཞུགས་པའི་དུས༌སུ། ཁོང་གིས་གསུང་སྐད་ཆེན་པོས་ཞུམ་ཞིང་སྤྱན་ཆབ་བཞུར་བཞིན་གསོལ་བ་བཏབ་པ་དང་། རང་ཉིད་འཆི་བ་ལས་སྐྱོབ་པར་མཛད་ནུས་པ་དེ་ཉིད་ལ་ཞུ་བ་བྱས་མྱོང་ཞིང་། ཁོང་ལ་དད་གུས་མངའ་བའི་རྐྱེན་གྱིས་དཀོན་མཆོག་གིས་གསན་པར་མཛད་དོ།།
8 ཁོང་ནི་སྲས་ཡིན་ཡང་ཁོང་གིས་སྡུག་བསྔལ་མྱངས་པ་བརྒྱུད་ནས་དཀོན་མཆོག་གི་བཀའ་ཇི་ལྟར་བསྲུང་དགོས་པ་བསླབས་ནས།
9 ཁོང་ཉིད་ཆ་ཡོངས་སུ་རྫོགས་པས། ཁོང་གི་བཀའ་རྩི་མཁན་ཐམས་ཅད་ལ་མཐའ་མེད་པའི་ཐར་པ་འཐོབ་པའི་རྒྱུ་རུ་གྱུར་པར་མ༌ཟད།
10 དཀོན་མཆོག་གིས་མཱལ་ཀི་ཚེ་དེག་གི་རིམ་པ་བཞིན། ཁོང་ལ་མཆོད་དཔོན་ཆེན་པོ་ཞེས་གསོལ༌བའོ།།
དད་ལོག་ཅན་དུ་མི་འགྱུར་བའི་ཉེན་བརྡ།
11 དེ་ཡང་མཱལ་ཀི་ཚེ་དེག་གི་སྐོར་ངེད་ཅག་ལ་འཆད་རྒྱུ་མང་པོ་ཡོད༌ནའང་། ཁྱོད་རྣམས་ཀྱིས་རྣ་བ་མི་གཏོད་པས་དེ་ལ་གསལ་བཤད་བྱེད༌དཀའོ།།
12 དུས་ཚོད་ལྟར༌ན་ད་ལྟ་ཁྱོད་རྣམས་སློབ་དཔོན་དུ་བྱེད་འོས༌མོད། འོན་ཀྱང་མི་གཞན་ཞིག་གིས་དཀོན་མཆོག་གི་བཀའ་ཡི་རྨང་གཞི་དེ་ཡང་བསྐྱར་ཁྱོད་ཅག་ལ་ཁྲིད་སྟོན་བྱེད་དགོས་ཤིང་། ཁྱོད་ཅག་ནི་འོ་མ་ཁོ་ན་འཐུང་དགོས་པ་ལས་ཟས་བཟའ་མི་ནུས་པའི་མི་བཞིན་དུ་གྱུར༌པ་ཡིན།
13 འོ་མ་ཁོ་ན་འཐུང་མཁན་ནི་ཁྱེའུ་ཡིན༌པས། དྲང་བདེན་གྱི་བཀའ་ལ་བྱང་ཆ་མེད་དོ།།
14 འོན་ཀྱང་ལོ་ན་ཆེར་སོན་པ་རྣམས་ཀྱིས་ད་གཟོད་ཁ་ཟས་བཟའ་ནུས་པ་ཡིན༌ལ། དེ་རྣམས་ཀྱི་སེམས་ལ་སྦྱངས་པ་མཐར་ཕྱིན་པས་བཟང་ངན་གྱི་དབྱེ་བའང་འབྱེད་ནུས༌སོ།།