ལེའུ་བརྒྱད་པ།
ཡེས་ར་ཨེལ་གྱིས་སྐུ་འདྲ་ལ་དད་པ་བྱས་ནས་ཉེས་ཅན་དུ་གྱུར་པ།
1 ཁྱོད་ཀྱིས་རྭ་དུང་བུས་ཤིག དེ་དག་ངའི་ཞལ་ཆད་དང་འགལ་ནས་ངའི་བཀའ་ཁྲིམས་ལ་ངོ་ལོག་བྱས་པས། དགྲ་རྣམས་གླག་རྒོད་ལྟར་འོངས་ནས་དཀོན་མཆོག་ཡ་ཝཱེའི་ཁྱིམ་ལ་རྒོལ་བའོ། །
2 ཀྱེ་ངེད་ཅག་གི་དཀོན་མཆོག་ལགས། ངེད་ཡེས་ར་ཨེལ་གྱིས་ཁྱེད་ངོ་ཤེས་སོ་ཞེས་དེ་དག་གིས་ང་འབོད་པར་འགྱུར།
3 ཡེས་ར་ཨེལ་གྱིས་གང་ལེགས་པ་དེ་དོར་བས། དགྲ་བོས་ཁོ་རྣམས་འདེད་པར་བྱ།
4 དེ་དག་གིས་རྒྱལ་པོ་བསྐོས་པ་བདག་ལས་བྱུང་བ་མིན། དེ་དག་གིས་འགོ་དཔོན་རྣམས་བསྐོས་ཀྱང་ངས་མ་ཤེས། ཁོ་ཚོས་གསེར་དང་དངུལ་གྱིས་སྐུ་འདྲ་རྣམས་བཟོས་པས། མཐར་བདག་གིས་ཁོ་ཚོ་རྩ་མེད་དུ་གཏོང་ངོ་། །
5 ཀྱེ་སཱ་མར་ཡ། ཡ་ཝཱེས་ཁྱོད་ཀྱི་བ་ཕྲུག་གི་སྐུ་འདྲ་དོར་བ་དང་། ངའི་ཁོང་ཁྲོ་ནི་སྐུ་འདྲར་དད་མཁན་རྣམས་ཀྱི་སྟེང་ལ་བབས་ཏེ། དེ་དག་དུས་ནམ་ཞིག་ལ་ད་གཟོད་སྡིག་པ་དང་འབྲལ་བར་འགྱུར་རམ།
6 བ་ཕྲུག་དེ་ནི་ཡེས་ར་ཨེལ་ལས་བྱུང་བ་སྟེ། བཟོ་བས་བཟོས་པ་ལས་དཀོན་མཆོག་མ་ཡིན་པས། སཱ་མར་ཡའི་བ་ཕྲུག་ནི་རྡུལ་དུ་བརླག་པར་འགྱུར་རོ། །
7 དེ་དག་གིས་རླུང་བཏབ་ནས་རླུང་ནག་འཚུབ་མ་བསྡུ་བར་འགྱུར། ལོ་ཏོག་ལ་སྙེ་མ་མི་ཐོགས་ཤིང་། མྱུ་གུ་འབུས་ཀྱང་འབྲུ་རིགས་མི་སྨིན་ཏེ། འབྲུ་རིགས་སྨིན་ཡང་ཕྱི་རོལ་པས་དེ་མིད་པར་བྱ།
8 ཡེས་ར་ཨེལ་ནི་མིད་པར་འགྱུར་ཏེ། དེ་ནི་མི་སྡེ་རྣམས་ཀྱི་ཁྲོད་དུ་མི་འདོད་པའི་སྣོད་ལྟར་གྱུར་ཏོ། །
9 དེ་དག་གིས་རྐྱང་ཁེར་འགྲོ་ཞིག་དང་འདྲ་བར་ཨ་སུར་ལ་རྒྱབ་རྟེན་བཅོལ་བ་དང་། ཨེ་ཕཱར་ཡིམ་གྱིས་རང་ལ་དགའ་རོགས་གླས་ཤིང་།
10 དེ་དག་གིས་མི་སྡེ་རྣམས་གླས་ནའང་། ད་ནི་ངས་དེ་དག་མཉམ་དུ་བསྡུ་བར་བྱ་སྟེ། ཁོ་རྣམས་ནི་རྒྱལ་པོ་དང་འགོ་དཔོན་དག་གི་མནར་གཅོད་ཀྱིས་ཉམས་ང་བར་འགྱུར་རོ། །
11 ཨེ་ཕཱར་ཡིམ་གྱིས་སྡིག་པ་གཤགས་པའི་ཕྱིར་མཆོད་ཁྲི་མང་པོ་བཞེངས་པ་དང་། མཆོད་ཁྲི་དེ་དག་ནི་དེས་སྡིག་པ་བྱེད་ས་རུ་གྱུར་པའོ། །
12 ངས་དེའི་དོན་དུ་བཀའ་ཁྲིམས་མང་པོ་བཀོད་ཀྱང་། ཁོས་དེ་ནི་སྣང་མེད་དུ་བཞག་གོ །
13 དེ་དག་གིས་ང་ལ་མཆོད་རྫས་ཕུལ་ཡང་ཤ་ནི་རང་གིས་ཟའོ། །དཀོན་མཆོག་ཡ་ཝཱེ་དེ་དག་ལ་མི་དགའ། ད་ནི་ཁོང་གིས་དེ་ཚོའི་སྡིག་པ་ཐུགས་སུ་དྲན་ཞིང་། དེ་དག་གི་ཉེས་པར་ཆད་པ་བཅད་དེ། དེ་དག་ཨེ་ཅིབ་ཡུལ་དུ་ཕྱིར་ལོག་པར་འགྱུར་རོ། །
14 ཡེས་ར་ཨེལ་གྱིས་རང་གི་བྱེད་པོ་བརྗེད་ནས་ཕོ་བྲང་རྣམས་བརྩིགས། ཡ་ཧུ་དཱས་གྲོང་ཁྱེར་བརྟན་པོ་དུ་མ་བརྩིགས་ནའང་ངས་དེའི་གྲོང་ཁྱེར་རྣམས་ལ་མེ་བཏང་ནས་མཁར་རྣམས་འཚིག་པར་འགྱུར་རོ། །