ལེའུ་བཅུ་གཅིག་པ།
མཱ་ཤི་ཀ་དང་དེའི་རྒྱལ་ཁམས།
1 དེ་ཡང་ཡེ་སེའི་སྡོང་རྐང་ལས་ལྕུག་ཕྲན་ཞིག་འབུས་ཤིང་། དེའི་རྩ་བ་ནས་སྐྱེ་བའི་ཡལ་ག་ལས་ཤིང་ཏོག་སྨིན་པར་འགྱུར།
2 དཀོན་མཆོག་ཡ་ཝཱེའི་ཐུགས་ཉིད་དེ། ཤེས་རབ་དང་རྣམ་དཔྱོད་ཀྱི་ཐུགས་ཉིད། མཐུ་སྟོབས་དང་སློབ་སྟོན་གྱི་ཐུགས་ཉིད། མཁྱེན་རྒྱ་དང་དཀོན་མཆོག་ཡ་ཝཱེར་གུས་ཤིང་འཇིགས་པའི་ཐུགས་ཉིད་བཅས་དེའི་སྟེང་དུ་བཞུགས་པར་འགྱུར།
3 དཀོན་མཆོག་ཡ་ཝཱེར་གུས་ཤིང་འཇིགས་པས་དེར་དགའ་སྤྲོ་ཐོབ་པ་དང་། ཁོང་གིས་མིག་གིས་མཐོང་བ་ཁོ་ནར་བརྟེན་ནས་ཆད་པ་མི་གཅོད་ཅིང་། རྣ་བས་ཐོས་པ་ཇི་བཞིན་ལེགས་ཉེས་ཀྱི་དབྱེ་བ་མི་འབྱེད།
4 འོན་ཀྱང་ཁོང་གིས་དྲང་བ་ཉིད་ཀྱིས་དབུལ་པོའི་ཁྲིམས་གཅོད་ཅིང་། དྲང་པོས་ས་གཞིའི་ཉམ་ཆུང་རྣམས་སྐྱོང་། དེའི་ཁ་རུ་ཡོད་པའི་ལྕུག་ཕྲན་གྱིས་ས་གཞིར་རྡུང་ཞིང་། དེའི་ཁ་ནང་གི་རླུང་གིས་མི་ངན་རྣམས་ཚར་གཅོད་བྱེད།
5 དྲང་བ་ཉིད་ནི་ཁོང་གི་སྐ་རགས་དང་། གཞུང་དྲང་ནི་ཁོང་གི་སྐེད་འཆིང་ཡིན་ནོ། །
6 འཕར་སྤྱང་དང་ལུ་གུ་མཉམ་དུ་འགྲོགས་ཤིང་། གཟིག་དང་ར་ཕྲུག་མཉམ་དུ་གནས་ལ། བ་ཕྲུག་དང་སེང་དར་མ། ཤ་ཤེད་རྒྱས་པའི་ཕྱུགས་ཟོག་བཅས་མཐུན་པོར་གྱུར་ནས་བྱིས་པས་དེ་རྣམས་འཚོ་བར་འགྱུར།
7 བ་མོ་ཡིས་དོམ་དང་མཉམ་དུ་རྩྭ་བཟའ་ཞིང་། བ་ཕྲུག་ནི་དོམ་ཕྲུག་དང་ལྷན་དུ་ཉལ། སེང་གེས་བ་གླང་བཞིན་དུ་རྩྭ་བཟའ་བ་དང་།
8 འོ་འཐུང་ཕྲུ་གུ་སྦྲུལ་ཚང་ཁ་ནས་རྩེད་ཅིང་། འོ་ཐག་ཆོད་པའི་བྱིས་པས་རང་གི་ལག་པ་དུག་སྦྲུལ་གྱི་ཚང་ཁར་འཇོག་པ་ཡིན།
9 བདག་གི་རི་བོ་དམ་པའི་ཡུལ་ཐམས་ཅད་དུ་དེ་དག་གིས་གནོད་ཅིང་འཚེ་བའི་དོན་མི་སྤྱོད་དེ། ཅི་ལ་ཞེ་ན། ཆུ་བོ་རྣམས་ཀྱིས་ཇི་ལྟར་རྒྱ་མཚོ་བཀང་བ་བཞིན་དུ། དཀོན་མཆོག་ཡ་ཝཱེ་རྟོགས་པའི་ཤེས་ཡོན་ནི་ས་གཞི་ཡོངས་སུ་ཁྱབ་པ་དང་།
10 ཉིན་དེར་ཡེ་སེའི་རྩ་བ་ནི་མི་རིགས་ཀུན་གྱི་དར་ཆ་བཞིན་བསྒྲེང་ཞིང་། རྒྱལ་ཁབ་ཀུན་གྱིས་དེ་འཚོལ་ཞིང་། ཁོང་གི་གནས་ཡུལ་ནི་གཟི་བརྗིད་དང་ལྡན་པར་འགྱུར་རོ། །
བཙོན་དུ་ཁྲིད་པའི་མི་རྣམས་ཕྱིར་ལོག་པར་ལུང་བསྟན་པ།
11 ཡང་ཉིན་དེར་དཀོན་མཆོག་ཡ་ཝཱེས་ཉིད་ཀྱི་ཕྱག་གིས་ཁོང་གི་འབངས་མིའི་ནང་གི་ལྷག་མ་སྟེ། ཨ་སུར་དང་ཨེ་ཅིབ། ཕཱད་རུའུ་སི་དང་གུ་ཤ། ཨེ་ལཱམ་དང་ཤིན་ཨར། ཧ་མཱད་དང་རྒྱ་མཚོའི་གླིང་བཅས་སུ་ཡོད་པ་རྣམས་ཕྱོགས་གཅིག་ཏུ་བསྡུ་བ་དང་།
12 ཁོང་གིས་རྒྱལ་ཁབ་རྣམས་ཀྱི་ཕྱིར་དུ་དར་ཆ་བསྒྲེངས་ཏེ་བཙོན་དུ་ཁྲིད་པའི་ཡེས་ར་ཨེལ་པ་རྣམས་ཕྱིར་བསྡུ་ཞིང་། ཁ་འཐོར་དུ་སོང་བའི་ཡ་ཧུ་དཱ་པ་རྣམས་ཕྱོགས་བཞི་ནས་བསྡུ་བར་བྱའོ། །
13 དེ་ནས་ཨེ་ཕཱར་ཡིམ་གྱི་ཕྲག་དོག་གཅོད་པ་དང་། ཡ་ཧུ་དཱ་དགྲ་རུ་འཛིན་མཁན་རྣམས་ཚར་དུ་གཅོད་ཅིང་། ཨེ་ཕཱར་ཡིམ་གྱིས་ཡ་ཧུ་དཱ་ལ་ཕྲག་དོག་མི་བྱ་ཞིང་། ཡ་ཧུ་དཱས་ཀྱང་ཨེ་ཕཱར་ཡིམ་ནི་དགྲ་རུ་མི་འཛིན་ནོ། །
14 དེ་ཚོ་ནུབ་ཕྱོགས་སུ་ཕེ་ལེ་ཤེད་པའི་རི་རྩེར་མཆོང་སྟེ། མཉམ་དུ་ཤར་ཕྱོགས་པ་འཕྲོག་ཅིང་། ཨེ་དོམ་པ་དང་མོ་ཨབ་ལ་ལག་པ་བརྐྱངས་ཏེ། ཨམ་མོན་པ་རྣམས་ཀྱིས་དེ་དག་གི་ཅི་བཤད་ལ་མཉན་ངེས་ཡིན།
15 དཀོན་མཆོག་ཡ་ཝཱེས་ཨེ་ཅིབ་ཀྱི་མཚོ་ཁུགས་སྐམ་པར་མཛད་ཅིང་། ཁོང་གིས་ཚ་རླུང་གིས་མཚོ་སྟེང་དུ་ཕྱག་གཡུགས་ནས་དེ་ལ་བརྡུང་ཞིང་། ཆུ་ཕྲན་བདུན་དུ་དགར་ལ། དེ་ནས་མི་རྣམས་ཆུ་ཕྲན་བརྒྱུད་ཀྱང་ལྷམ་ནི་རློན་པར་མི་བྱེད་དོ། །
16 དེ་ཡང་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ཉིན་དང་འདྲ་བར། ཨ་སུར་ནས་ལུས་པའི་དཀོན་མཆོག་གི་མི་སྡེ་ལ་ཕྱིར་ལོག་པའི་ལམ་ཆེན་ཞིག་ཡོད་པར་འགྱུར་རོ། །