ལེའུ་བཅུ་གཉིས་པ།
དཀོན་མཆོག་གིས་བསྐྱབས་པར་བཀའ་དྲིན་ཞུ་བའི་བསྟོད་དབྱངས།
1 ཉིན་མོ་དེར་ཁྱོད་ཀྱིས་འདི་ལྟར། ཀྱེ་དཀོན་མཆོག་ཡ་ཝཱེ་ལགས། བདག་གིས་ཁྱེད་ལ་བསྟོད་དབྱངས་འབུལ། སྔོན་ཆད་ཁྱེད་བདག་ལ་ཐུགས་ཁྲོས་ཀྱང་། ད་ལྟ་ཁྱེད་ཐུགས་མི་ཁྲོས་པར་ང་ལ་སེམས་གསོ་མཛད།
2 ལྟོས་དང་། དཀོན་མཆོག་ནི་ངའི་སྐྱབས་མགོན་ལགས། ང་ཁོང་ལ་བརྟེན་ཞིང་འཇིགས་པ་མེད། ཅི་ལ་ཞེ་ན། དཀོན་མཆོག་ཡ་ཝཱེ་ནི་ངའི་སྟོབས་ཤུགས་དང་བསྟོད་དབྱངས་ཡིན་པས་སོ། །ཡང་ཁོང་ནི་ངའི་སྐྱབས་མགོན་དུ་གྱུར་ཏོ་ཞེས་སྨྲའོ། །
3 དེ་བས་ཁྱོད་རྣམས་ཀྱིས་དགའ་སྤྲོའི་ངང་ནས་སྐྱབས་མགོན་གྱི་ཆུ་མགོ་ནས་ཆུ་ལེན་པར་འགྱུར།
4 ཉིན་མོ་དེར་ཁྱོད་རྣམས་ན་རེ། དཀོན་མཆོག་ཡ་ཝཱེ་ལ་བཀའ་དྲིན་ཞུས་ནས་ཁོང་གི་མཚན་བརྗོད་ཅིང་། མི་ཐམས་ཅད་ཀྱི་ཁྲོད་དུ་ཁོང་གི་མཛད་པ་བསྒྲགས་ནས། དེ་རྣམས་ལ་ཁོང་གི་བླ་ན་མེད་པའི་མཚན་གླེང་བར་འགྱུར།
5 ཁོང་གིས་ཆེས་ལེགས་པའི་དོན་རྣམས་མཛད་པ་དང་། དོན་དེ་ས་གཞི་ཡོངས་སུ་ཁྱབ་པའི་ཕྱིར་དུ། ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་བསྟོད་དབྱངས་ཕུལ་ཞིག
6 ཡེས་ར་ཨེལ་གྱི་དམ་པ་ཁོང་ནི་ཁྱོད་ཅག་གི་ཁྲོད་དུ་གཟི་བརྗིད་ལྡན་པ་ཡིན་པས། ཀྱེ་ཛ་ཡན་གྱི་ཡུལ་མི་རྣམས། ཁྱོད་ཅག་གིས་དགའ་འབོད་བྱོས་ཤིག་ཅེས་སྨྲའོ། །