1 དེ་ནས་ཨེས་ཡོབ་ཀྱིས་ལན་བཏབ་ནས་གསུངས་པ། 2 ཁྱོད་ཚོས་ཅི་ཙམ་བདག་གི་སེམས་འཚེ་སྟེ། ། ཚིག་གིས་བདག་ལ་གནོན་ཤུགས་སྟེར་བ་ཡིན། ། 3 ཁྱོད་ཚོས་ཐེངས་བཅུར་བདག་ལ་ངོ་ཚ་གཏད། ། ང་རང་སྡུག་ལ་གཏད་ཀྱང་ངོ་མི་གནོང་། ། 4 ང་རང་ནོར་བའི་དབང་དུ་བཏང་ན་ཡང་། ། སྐྱོན་ཆ་ཐམས་ཅད་བདག་ལས་བྱུང་བ་སྟེ། ། 5 ཁྱོད་ཚོས་རང་རློམ་དང་བཅས་ང་རྒོལ་ཞིང་། ། བདག་གི་ངོ་ཚས་ང་ལ་བཀྱོན་འདོད་ན། ། 6 དཀོན་མཆོག་ཉིད་ཀྱིས་ང་རང་ཕམ་བཅུག་སྟེ། ། དྲ་རྒྱས་ངའི་མཐའ་བསྐོར་བ་ཤེས་པར་གྱིས། ། 7 བདག་གིས་འོ་དོད་བོས་ཀྱང་ལན་མི་གནང་། ། བདག་གིས་ཞུས་ཀྱང་དྲང་གཞག་འབྱུང་མི་སྲིད། ། 8 ཁོང་གིས་བདག་གི་ལམ་བུ་བཀག་པས་ན། ། ང་རང་ལམ་བུ་དེ་ལ་རྒྱུ་མ་ནུས། ། བདག་གི་ལམ་དུ་སྨག་རུམ་འཐིབས་པར་མཛད། ། 9 ཁོང་གིས་བདག་གི་དཔལ་ནི་བཤུས་ཁྱེར་ཏེ། ། བདག་གི་མགོ་ནས་ཅོད་པན་བསྣམས་པར་མཛད། ། 10 ཁོང་གིས་ཕྱོགས་བཞིར་ང་རྒོལ་བས། ། ང་རང་འཆི་བའི་ལམ་དུ་བརྫངས། ། ཁོང་གིས་བདག་གི་རེ་བ་ནི། ། སྡོང་པོ་བཞིན་དུ་རྩ་ནས་བལ། ། 11 ཁོང་ཉིད་བདག་ལ་ཐུགས་ཁྲོ་མེ་ལྟར་འབར། ། ང་རང་ཁོང་གི་དགྲ་རུ་བརྩི་བར་མཛད། ། 12 ཁོང་གི་དཔུང་ཚོགས་འདུས་ནས་བདག་ཕྱོགས་འོངས། ། ལམ་བུ་བཟོས་ཏེ་བདག་ལ་རྒོལ་བ་དང་། ། བདག་གི་གུར་གྱི་མཐའ་ནས་དམག་སྒར་བཙུགས། ། 13 ཁོང་གིས་བདག་གི་སྤུན་རྣམས་རིང་དུ་གྱེས་པར་མཛད། ། ང་ཡི་ངོ་ཤེས་རྣམས་ཀྱང་འབྲེལ་བ་གཞི་ནས་ཆད། ། 14 བདག་གི་ཤ་ཉེ་རྣམས་ནི་བདག་དང་བྲལ། ། བདག་གི་མཛའ་བོ་རྣམས་ཀྱིས་ང་རང་བརྗེད། ། 15 བདག་གི་མགྲོན་དང་བྲན་མོས་ང་རང་ཆ་མེད་བརྩིས། ། དེ་ཚོའི་མིག་ནང་བདག་ནི་ཕྱི་རོལ་པ་རུ་གྱུར། ། 16 ང་ཡིས་འཁོར་གཡོག་བོས་ཀྱང་ལན་མ་བྱིན། ། དངོས་སུ་ཞུ་བ་ཕུལ་ཡང་ཨ་ལན་མེད། ། 17 ཆུང་མ་བདག་གི་ཁ་དྲིར་ཞེན་ལོག་ཅིང་། ། སྤུན་ཟླ་རྣམས་ནི་བདག་ལ་སྡང་བ་ཡིན། ། 18 བྱིས་པ་རྣམས་ཀྱང་བདག་ལ་མཐོང་ཆུང་བྱེད། ། ང་ཡར་ལངས་དུས་དེ་ཚོས་སྨད་པར་རྩོམ། ། 19 བདག་གི་མཛའ་བོ་རྣམས་ནི་ང་ལ་སྡང་། ། ང་རང་བྱམས་པའི་མི་ཡིས་བདག་སྤངས་སོ། ། 20 ང་ཡི་ཤ་དང་སྐྱི་མོ་རུས་པར་འབྱར། ། བདག་ལ་རྙིལ་ཙམ་ལུས་ཏེ་ཐར་བ་ཡིན། ། 21 དཀོན་མཆོག་ཕྱག་གིས་བདག་ལ་རྒོལ་བས་ན། ། མཛའ་བོ་རྣམས་ཀྱིས་བདག་ལ་སྙིང་རྗེ་གནོངས། ། 22 ཁྱོད་ཚོས་དཀོན་མཆོག་བཞིན་དུ་ང་འདེད་ཅིང་། ། བདག་ལུས་སྡུག་བསྔལ་བས་ཀྱང་མི་ཚིམ་ཅི། ། 23 ང་ཡི་ཚིག་རྣམས་ད་ལྟ་འབྲི་རོགས་གནང་། ། གླེགས་བམ་ནང་དུ་བཀོད་ན་ཅི་མ་རུང་། ། 24 གཏན་དུ་གནས་པའི་ཕྱིར་དུ་ཕ་བོང་སྟེང་། ། ལྕགས་སྨྱུག་དང་ནི་ཞ་ཉེས་བརྐོས་ན་ལེགས། ། 25 ང་ཡི་སྐྱབས་མགོན་གསོན་པོར་བཞུགས་པ་དང་། ། མཇུག་མཐར་ས་གཞིའི་སྟེང་དུ་བཞེང་བ་ཤེས། ། 26 ང་ཡི་ཤ་རུས་*འདི་ནི་འཇིག་འགྱུར་ཡང་། ། གཟུགས་པོ་མེད་བཞིན་དཀོན་མཆོག་མཇལ་ངེས་ཡིན †། ། 27 བདག་གི་མིག་གིས་ཁོང་ཉིད་མཐོང་བར་འགྱུར། ། གཞན་མིན་རང་གི་མིག་གིས་ཁོང་མཇལ་ཡོང་། ། ངའི་སེམས་རང་གི་ཁོག་ནང་ཤིན་ཏུ་ངལ། ། 28 རྩ་བའི་རྒྱུ་རྐྱེན་བདག་ནང་ཡོད་པ་བཞིན། ། ཁོ་རང་འདེད་ཅིག་ཁྱོད་ཚོས་ཅི་ལ་ཟེར། ། 29 ཁོང་ཁྲོས་རལ་གྲིའི་བཀའ་ཆད་འདྲེན་པའི་ཕྱིར། ། ཁྱོད་རྣམས་རལ་གྲི་དེ་ལ་འཇིགས་པར་འོས། ། དེ་ལྟར་ཁྱོད་ཚོས་ཉེས་ཆད་རྟོགས་འགྱུར་རོ། །