ལེའུ་སོ་དགུ་པ།
1 ཁྱོད་ཀྱིས་བྲག་གི་གནའ་བའི་བཙའ་དུས་དང་། ། ཤྭ་མོས་ཤ་ཕྲུག་ནམ་སྐྱེ་ཤེས་ལགས་སམ། །
2 དེ་ཚོས་མངལ་ཆགས་ཟླ་ཚེས་བརྩི་ནུས་སམ། ། དེ་ཚོས་ནམ་ཞིག་བཙའ་བ་རྟོགས་ནུས་སམ། །
3 དེ་ཚོས་ལུས་པོ་འཁུམས་ནས་ཕྲུ་གུ་བཙའ། ། དེ་ནས་རང་གི་ཟུག་གཟེར་བསལ་བ་ཡིན། །
4 ཕྲུ་གུ་རིམ་བཞིན་ཤེད་རྒྱས་ཏེ། ། དབེན་སྟོང་གནས་སུ་ནར་སོན་ཞིང་། ། དེ་དག་ཕྱི་རོལ་ཕྱིན་ཙ་ན། ། རང་གི་ཡུལ་དུ་ཕྱིར་མི་ལོག །
5 སུ་ཡིས་རྐྱང་ལ་རང་དབང་སྤྲད། ། རྐྱང་གི་ཐག་པ་སུ་ཡིས་བསྒྲལ། །
6 བདག་གིས་དེ་ཡི་ཁྱིམ་དུ་དབེན་སྟོང་གནང་། ། བ་ཚྭ་ཅན་གྱི་ས་དེའི་སྡོད་གནས་བྱས། །
7 དེ་ཡིས་གྲོང་ཁྱེར་ནང་གི་འདུ་འཛིར་འཕྱས། ། འདེད་མཁན་རྣམས་ཀྱི་སྐད་ལ་མི་མཉན་ཏེ། །
8 རི་རྒྱུད་དག་ནི་རྒྱུ་བའི་རྩྭ་ཐང་ཡིན། ། སྔོ་ལྗང་རིགས་རྣམས་དེ་ཡིས་འཚོལ་བྱེད་དོ། །
9 གླང་རྒོད་ཁྱོད་ལ་ཞབས་ཞུ་བྱེད་སྲིད་དམ། ། ཡང་ན་ཁྱོད་ཀྱི་ཁ་རར་མཚན་བསྐྱལ་ལམ། །
10 གླང་རྒོད་རྨོས་ཤུར་མཐུར་གྱིས་འདོགས་ནུས་སམ། ། དེ་ཡིས་ཁྱོད་རྗེས་ལུང་པར་ཤལ་རྒྱག་གམ། །
11 ཁྱོད་ནི་དེ་སྟོབས་ཆེ་ཕྱིར་དེ་ལ་བརྟེན་འགྱུར་རམ། ། ཡང་ན་རང་གི་ལས་ཀ་དེ་ལ་བཅོལ་བ་ཡིན། །
12 ཁྱོད་ཀྱིས་དེར་བརྟེན་འབྲུ་རིགས་ནང་ལ་འམ། ། ཡང་ན་ཁྱོད་ཀྱི་གཡུལ་ཁར་བསྡུས་པ་ཡིན། །
13 རྔ་བྱའི་གཤོག་ཟུང་དགའ་ནས་བརྡབས་ན་ཡང་། ། བྱ་ཡི་གཤོག་སྒྲོའི་ལྷག་བསམ་ཨེ་ལྡན་ནམ། །
14 ས་ཡིས་རང་གི་སྒོ་ངར་དྲོད་བསྐྱེད་ཕྱིར། ། དེ་ཚོས་སྒོ་ང་ས་ཡི་ནང་དུ་བཞག །
15 ཡིན་ཡང་རྐང་པས་སྒོ་ང་བརྫི་བ་དང་། ། རི་དྭགས་རྣམས་ཀྱིས་རྡོག་བརྫིས་གཏོང་བ་བརྗེད། །
16 བྱ་ཕྲུག་རང་གི་མིན་ལྟར་གདུག་རྩུབ་སྤྱོད། ། དོན་མེད་དཀའ་སྡུག་མྱངས་ཀྱང་འཇིགས་པ་མེད། །
17 དཀོན་མཆོག་དེ་ལ་ཤེས་རབ་མེད་པར་མཛད། ། གོ་རྟོགས་ཀྱང་ནི་དེ་ལ་མ་གནང་ཕྱིར། །
18 ནམ་ཞིག་བྱ་དེས་གཤོག་པ་བརྐྱངས་པའི་དུས། ། རྟ་དང་ཞོན་མཁན་གཉིས་ལ་འཕྱ་བར་འགྱུར། །
19 རྟ་ཡི་ཤ་ཤེད་ཁྱོད་ཀྱིས་གནང་བ་འམ། ། མཇིང་པའི་རྔོག་མ་ཁྱོད་ཀྱིས་གཡོགས་སམ་ཅི། །
20 ཆ་ག་འབུ་ལྟར་མཆོང་དུ་དེ་བཅུག་གམ། ། སྣ་ཤུ་རྒྱག་པའི་རྔམ་སྐད་འཇིགས་སུ་རུང་། །
21 དེ་ཡི་རྨིག་པས་ལུང་པའི་ས་སློག་ཅིང་། ། རང་གི་ནུས་པས་དགའ་སྤྲོའི་མཆོང་ལྡིང་བྱེད། ། དེ་ནས་ཕྱི་རུ་ཕྱིན་ཏེ་དགྲ་བོ་བསུ། །
22 དེ་ཡིས་འཇིགས་པར་འཕྱ་ཞིང་སེམས་མི་འཚབ། ། རལ་གྲིའི་རྐྱེན་གྱིས་ཕྱིར་བསྣུར་མི་བྱེད་དོ། །
23 མདའ་ཁུག་གིས་ནི་དེའི་སྟེང་ཁྲོག་སྒྲ་སྒྲོག ། རྣོན་པོ་མདུང་དང་མདུང་རིང་འོད་ཆེམ་ཆེམ། །
24 ངར་དང་ཁྲོས་རྐྱེན་དེ་ལ་ཐོགས་པ་མེད། ། རྭ་དུང་ཐོས་པ་ཙམ་གྱིས་སྡོད་མི་ཚུགས། །
25 རྭ་དུང་ཐོས་ཚེ་དེ་ཡིས་སྣ་ཤུ་རྒྱག ། རྒྱང་ཐག་རིང་སར་འཐབ་མོའི་དྲི་མ་ཚོར། ། དམག་དཔོན་རྣམས་ཀྱི་འུར་སྒྲའི་ཅ་ཅོ་ཐོས། །
26 བྱ་ཁྲའི་གཤོག་རྩལ་བརྐྱངས་ཏེ་ལྷོ་ཕྱོགས་འཕུར། ། དེ་ནི་ཁྱོད་ཀྱི་ཤེས་རབ་ལས་བྱུང་ངམ། །
27 གླག་གིས་གནམ་འཕང་གཅོད་ཅིང་མཐོ་ས་རུ། ། ཚང་ནི་བཅོས་པ་ཁྱོད་ཀྱི་བཀའ་ལགས་སམ། །
28 དེ་ནི་བྲག་ལ་གནས་ཤིང་བྲག་རྩེ་དང་། ། བརྟན་པོ་ཡུལ་རྣམས་རང་གི་གནས་སུ་བྱ། །
29 ས་ཆ་དེ་ནས་བཟའ་བཏུང་རྣམས་འཚོལ་ཞིང་། ། མིག་གིས་རྒྱང་ཐག་རིང་པོར་བལྟ་བ་ཡིན། །
30 དེ་ཡི་བྱ་ཕྲུག་རྣམས་ཀྱིས་ཁྲག་འཇིབ་ཅིང་། ། བེམ་པོ་ཡོད་སར་དེ་ཡང་ཡོད་པ་ཡིན། །