1 དཀོན་མཆོག་ཡ་ཝཱེས་ཡང་ཨེས་ཡོབ་ལ་བཀའ་ལན་གནང་སྟེ་འདི་སྐད་གསུངས་པ། 2 ཧམ་རྩོད་ཅན་གྱིས་ཀུན་དབང་ཁོང་དང་རྩོད་རུང་ངམ། ། དཀོན་མཆོག་ཁོང་ལ་རྩོད་པའི་མི་ཡིས་ལན་ཐོབས་ཤོག ། 3 དེ་ནས་ཨེས་ཡོབ་ཀྱིས་དཀོན་མཆོག་ཡ་ཝཱེ་ལ་ལན་ཞུས་ཏེ་འདི་ལྟར། 4 གཟིགས་དང་བདག་ནི་དམན་པ་སྟེ། ། བདག་གིས་ཁྱེད་ལ་ལན་ཅི་ཞུ། ། བདག་གིས་སྨྲ་སྒོ་ལག་པས་འགེབ། ། 5 བདག་གིས་ཐེངས་གཅིག་སྨྲས་པ་ན། ། དེ་ནས་ཡང་བསྐྱར་ལན་མི་འདེབས། ། བདག་གིས་ཐེངས་གཉིས་སྨྲས་པ་ན། ། རྗེས་སུ་ནམ་ཡང་གླེང་མི་བྱ། ། 6 དེ་ནས་དཀོན་མཆོག་ཡ་ཝཱེས་རླུང་འཚུབ་ནང་ཨེས་ཡོབ་ལ་བཀའ་ལན་གནང་བ་སྟེ། 7 ཁྱོད་ཀྱིས་དཔའ་བོ་བཞིན་དུ་སྐ་རགས་ཆིངས*། ། བདག་གིས་འདྲི་འོང་ཁྱོད་ཀྱིས་ང་ལ་ཤོད། ། 8 ཁྱོད་ཀྱིས་བདག་གི་དྲང་གཞག་འདོར་རུང་ངམ། ། ཁྱོད་རང་དྲང་ཕྱིར་བདག་ལ་སྐྱོན་འཛུགས་སམ། ། 9 ཁྱོད་ལ་དཀོན་མཆོག་དཔུང་ངར་ལྡན་ནམ་ཅི། ། ཁོང་འདྲར་ཁྱོད་ཀྱིས་འབྲུག་སྐད་ལྡིར་ནུས་སམ། ། 10 གཟི་བརྗིད་བཀྲག་མདངས་ཀྱིས་ནི་རང་ཉིད་སྤྲོས། ། བཀུར་སྟི་གཟི་བྱིན་གོས་ལྟར་གཡོག་པར་གྱིས། ། 11 རང་གི་ཁྲོ་གཏུམ་མ་འགོག་ཡོངས་སུ་བླུགས། ། ང་རྒྱལ་ཅན་ནི་དམན་སར་འབེབ་པར་གྱིས། ། 12 ང་རྒྱལ་ཅན་ནི་ཁྱོད་ཀྱིས་འདུལ་བ་དང་། ། ངན་པ་རང་གི་གནས་སུ་རྡོག་པས་རྫིས། ། 13 ཁྱོད་ཀྱིས་དེ་རྣམས་ལྷན་ཅིག་རྡུལ་ནང་སྦོས། ། དེ་ཚོའི་གདོང་ནི་གསང་བའི་གནས་སུ་ཆུག ། 14 དེ་ནས་བདག་གིས་ཁྱོད་ཀྱི་གཡས་ལག་གིས། ། ཁྱོད་རང་སྐྱོབ་པར་ནུས་པས་བསྔགས་པར་བྱ། ། 15 བདག་གིས་རྦག་རྨད་†བཞིན་དུ་ཁྱོད་ཀྱང་བཀོད། ། ལྟོས་དང་དེ་ཡིས་གླང་ལྟར་རྩྭ་ཟ་སྟེ། ། 16 ལྟོས་དང་དེ་ཡི་སྟོབས་ནི་རྐེད་པར་ཡོད། ། གྲོད་པའི་ལྟེ་བར་དེ་ཡི་ཤ་ཤེད་རྒྱས། ། 17 དེ་ཡི་རྔ་མ་ཐང་ཤིང་བཞིན་དུ་དྲང་། ། དེ་ཡི་བརླ་རྩ་གཅིག་དང་གཅིག་སྦྲེལ་འདུག ། 18 རུས་པ་རྣམས་ཀྱང་ལི་ཡི་སྦུ་གུ་བཞིན། ། དེ་ཡི་ཡན་ལག་ལྕགས་ཀྱི་དབྱུག་པ་འདྲ། ། 19 དེ་ནི་དཀོན་མཆོག་ཁོང་གི་བཀོད་པ་ཡི། ། འཕྲིན་ལས་རྣམས་ཀྱི་ཐོག་མ་ཡིན་པ་དང་། ། དེ་ཉིད་འགོད་མཁན་ཁོང་ཉིད་གཅིག་པུ་ཡིས། ། རལ་གྲི་དེའི་སྟེང་འབབ་པར་མཛད་ནུས་སོ། ། 20 རི་རྒྱུད་རྣམས་ཀྱིས་དེའི་དོན་ཟས་རིགས་སྐྱེད། ། རི་དྭགས་སྣ་ཚོགས་གནས་དེར་རྩེད་འཇོར་རོལ། ། 21 དེ་ནི་པད་མའི་འདབ་མ་འོག་ཏུ་ཉལ། ། འདམ་རྩྭའི་གསེབ་དང་ན་ཁུག་རྣམས་སུ་སྦས། ། 22 པད་འདབ་གྲིབ་བསིལ་གྱིས་ནི་དེ་སྒྲིབ་ཅིང་། ། གྲོག་མོའི་ལྕང་ཤིང་དག་གིས་མཐའ་ནས་སྐོར། ། 23 གཙང་པོ་འཕེལ་ཡང་དེ་ནི་སེམས་མི་འཚབ། ། ཡོར་དན་གཙང་པོ་དེ་ཡི་ཁར་འཕེལ་ཡང་། ། དེ་ནི་འཚེར་སྣང་མེད་ཅིང་བདེ་བར་གནས། ། 24 སུ་ཡིས་དེ་ཡི་མིག་མདུན་དེ་འཛིན་ཐུབ། ། སུ་ཡིས་རྙི་རྒྱས་དེ་ཡི་སྣ་དབུག་ནུས། །