ལེའུ་བཅུ་གསུམ་པ།
ད་དུང་ཚུར་བླངས་མེད་པའི་ཡུལ་རྣམས།
1 ཡོ་ཤུ་ཨ་ལོ་ན་རྒས་ཤིང་དཀོན་མཆོག་ཡ་ཝཱེས་ཁོ་ལ་འདི་སྐད་དུ། ཁྱོད་རང་ལོ་ན་རྒས་ཤིང་ཚུར་མ་ལོན་པའི་ཡུལ་ད་དུང་མང་པོ་ཡོད་པ་སྟེ།
2 དེ་ནི་ཕེ་ལེ་ཤེད་པའི་ཡུལ་ཐམས་ཅད་དང་གེ་ཤུར་པའི་ཡུལ་ཐམས་ཅད།
3 ཨེ་ཅིབ་ཀྱི་མདུན་དུ་ཡོད་པའི་སི་ཧོར་ཆུ་བོ་ནས་བྱང་ཕྱོགས་སུ་ཨེག་རོན་གྱི་ས་མཚམས་བར་ཏེ། ཀ་ན་ཨན་པ་ལ་གཏོགས་པའི་ཡུལ་དུ་བརྩིས་པ་ཡིན། ཕེ་ལེ་ཤེད་པའི་འགོ་དཔོན་ལྔ་ཡིས་བདག་སྐྱོང་བྱེད་པའི་གཱ་ཟཱ་པ་དང་ཨ་སི་དོད་པ། ཨ་སི་ཀེ་ལོན་པ། གཱད་པ། ཨེག་རོན་པ་བཅས་ཀྱི་ས་དང་། དེར་མ་ཟད་ཨ་ཝི་པའི་ས་ཡང་ཡོད།
4 ཡང་ལྷོ་ཕྱོགས་སུ་ཀ་ན་ཨན་པའི་ཡུལ་ཐམས་ཅད་དང་ཚི་ཏུན་པའི་མེ་ཨ་རཱ་ནས་ཨ་ཕེག་དང་། དེ་ནས་ཨེ་མོར་པའི་ས་མཚམས་བཅས་ཀྱི་བར།
5 ད་དུང་གེ་བལ་པའི་ཡུལ་དང་། དེར་མ་ཟད་ཤར་ཕྱོགས་སུ་ལེ་པཱ་ནོན་ཡོངས་ཏེ། ཧེར་མོན་རི་འདབས་ཀྱི་པཱ་ཨལ་གཱ་རྡུ་ནས་ཧ་མཱད་ཉག་ག་བར་དུ་ཡིན།
6 ལེ་པཱ་ནོན་ནས་མིས་རེ་ཕཱོད་མ་ཨིམ་གྱི་བར་དུ་གནས་པའི་རི་ཁུལ་གྱི་མི་རྣམས་ཏེ་ཚི་ཏུན་པ་ཐམས་ཅད་ནི་བདག་གིས་ཡེས་ར་ཨེལ་པ་རྣམས་ཀྱི་མདུན་ནས་ཕྱིར་སྐྲོད་ངེས་ཡིན། ཁྱོད་ཀྱིས་བདག་གིས་ཅི་ལྟར་བསྒོས་པ་བཞིན་ཡུལ་འདི་རྒྱན་འཕངས་ནས་ཡེས་ར་ཨེལ་པ་རྣམས་ལ་ས་སྐལ་དུ་བགོས་ཤིག
7 ད་ལྟ་ཁྱོད་ཀྱིས་ཡུལ་འདི་ཚོ་པ་དགུ་དང་མཱ་ན་ཤེའི་ཚོ་པ་ཕྱེད་ཀ་ལ་ས་སྐལ་དུ་བགོ་དགོས་ཞེས་གསུངས།
ཡོར་དན་གཙང་པོའི་ཤར་ཕྱོགས་ཀྱི་ས་བགོས་པ།
8 མཱ་ན་ཤེའི་ཚོ་པ་ཕྱེད་ཀ་དང་རུ་བེན་པ་དང་གཱ་རྡུ་པ་ཚོ་པ་གཉིས་ལ་ནོར་སྐལ་ཐོབ་ཟིན་པ་སྟེ། དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཡོར་དན་གཙང་པོའི་ཤར་ནས་ཁོ་རྣམས་ལ་གནང་བ་ཡིན་ལ།
9 ཨར་ནོན་གྲོག་མོ་འགྲམ་གྱི་ཨ་རོ་ཨེར་དང་གྲོག་རོང་གི་གྲོང་ཁྱེར། དེར་མ་ཟད་མེ་དེ་བཱ་ཡི་ཐང་ཧྲིལ་པོ་བཅས་ནས་དི་བོན་བར།
10 ཧེ་སི་པོན་ལ་དབང་བྱེད་མཁན་ཨེ་མོར་པའི་རྒྱལ་པོ་སི་ཧོན་གྱི་གྲོང་ཁྱེར་རྣམས་ནས་ཨམ་མོན་པའི་ས་མཚམས་བར་དུ་ཡིན་ལ།
11 ཡང་གེ་ཤུར་པ་དང་མ་ཨ་ཀཱ་པ་རྣམས་ཀྱི་ས་མཚམས་ཏེ་གིལ་ཨད་ཡུལ་དང་། རི་བོ་ཧེར་མོན་ཐམས་ཅད་དང་པཱ་ཤན་ཡུལ་ཧྲིལ་པོ་ནས་སལ་ཀཱ་བར་དུ་ཡིན།
12 ཡང་པཱ་ཤན་གྱི་རྒྱལ་པོ་ཨོག་གི་རྒྱལ་ཁམས་ཧྲིལ་པོ་བཅས་ཡིན། ཁོ་ནི་ཨ་ཤཱ་ཐ་རོད་དང་ཨེ་དྲེ་ཨི་ཡི་རྒྱལ་པོ་ཡིན་ལ། རེ་པཱ་པ་ལས་ཁོ་རང་རྐྱང་རྐྱང་ལུས་ཤིང་། ཡུལ་འདི་རྣམས་ཀྱི་མི་ཐམས་ཅད་མོ་ཤེས་ཕམ་པར་བརྒྱབ་ནས་མཐར་བསྐྲད་པ་ཡིན་ནོ། །
13 ཡིན་ནའང་ཡེས་ར་ཨེལ་པ་རྣམས་ཀྱིས་གེ་ཤུར་པ་དང་མ་ཨ་ཀཱ་པ་རྣམས་ཕྱིར་མ་བསྐྲད་ཅིང་། མི་དེ་རྣམས་ནི་ད་ལྟའི་བར་དུ་ཡེས་ར་ཨེལ་པ་རྣམས་ཀྱི་ཁྲོད་དུ་གནས་སོ། །
14 ལེ་ཝི་ཚོ་པ་འབའ་ཞིག་ལ་མོ་ཤེས་ས་སྐལ་མ་བགོས་ཏེ། དཀོན་མཆོག་ཡ་ཝཱེས་ཁོ་རྣམས་ལ་ཞལ་བཞེས་གནང་བ་ཇི་བཞིན། ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་ཕུལ་བའི་སྦྱིན་སྲེག་དེ་རྣམས་ཀྱི་ནོར་སྐལ་ཡིན་པའོ། །
རུ་བེན་པ་ལ་བགོས་པའི་ས་སྐལ།
15 མོ་ཤེས་རུ་བེན་ཚོ་པའི་རུས་རྒྱུད་ལྟར་དེ་རྣམས་ལ་ནོར་སྐལ་བགོས་པ་སྟེ།
16 ཁོ་རྣམས་ཀྱི་ས་མཚམས་ནི་ཨར་ནོན་གྲོག་མོ་འགྲམ་གྱི་ཨ་རོ་ཨེར་དང་གྲོག་རོང་གི་གྲོང་ཁྱེར། མེ་དེ་བཱ་ཡི་ཐང་ཧྲིལ་པོ།
17 ཧེ་སི་པོན་དང་ཧེ་སི་པོན་ཐང་ལ་གཏོགས་པའི་གྲོང་ཁྱེར་སོ་སོ་སྟེ། དི་བོན་དང་པ་མོད་པཱ་ཨལ། པེད་པཱ་ཨལ་མེ་ཨོན།
18 ཡ་ཙཱ། ཀེ་དེ་མོད། མེ་ཕཱ་ཨད།
19 ཀིར་ཡ་ཐཱ་ཡེམ། སིབ་མ། ལུང་པའི་ནང་དུ་ཡོད་པའི་རི་དེའི་ཚེ་རེད་ཤ་ཧར།
20 པེད་ཕེ་ཨོར། རི་ཕིས་ག་དེའུ་འབུར། པེད་ཡེ་ཤི་མོད་བཅས་དང་།
21 ད་དུང་ཐང་གི་གྲོང་ཁྱེར་སོ་སོ་དང་ཨེ་མོར་པའི་རྒྱལ་པོ་སི་ཧོན་གྱི་རྒྱལ་ཁམས་ཧྲིལ་པོ། སི་ཧོན་ནི་སྔར་ཧེ་སི་པོན་གྱི་རྒྱལ་པོ་ཡིན་ལ། མོ་ཤེས་ཁོ་དང་མིད༌ཡཱན་གྱི་ཚོ་དཔོན་ཨེ་ཝི་དང་རེ་ཀེམ། ཙུར། ཧུར། རེ་པ་བཅས་ཕམ་པར་བརྒྱབ་པ་དང་། དེ་ཐམས་ཅད་ནི་ཡུལ་དེར་གནས་པའི་སི་ཧོན་གྱི་དབང་འོག་ཡིན་ནོ། །
22 སྐབས་དེར་ཡེས་ར་ཨེལ་པ་རྣམས་ཀྱིས་བསད་པའི་གྲས་སུ། པེ་ཨོར་གྱི་བུ་སྒྱུ་མ་མཁན་པེལ་ཨམ་ཡང་གྲིས་བསད་དོ། །
23 རུ་བེན་པའི་ས་མཚམས་ནི་ཡོར་དན་གཙང་པོ་དང་དེར་ཉེ་བའི་ཡུལ་རྣམས་ཡིན། དེ་ནི་རུ་བེན་པ་རྣམས་ལ་རུས་རྒྱུད་བཞིན་ས་སྐལ་དུ་ཐོབ་པའི་གྲོང་ཁྱེར་རྣམས་དང་། གྲོང་ཁྱེར་ལ་གཏོགས་པའི་གྲོང་ཚོ་རྣམས་ཡིན།
གཱ་རྡུ་ལ་བགོས་པའི་ས་སྐལ།
24 མོ་ཤེས་གཱ་རྡུ་ཚོ་པའི་རུས་རྒྱུད་ལྟར་དེ་རྣམས་ལ་ནོར་སྐལ་བགོས་པ་སྟེ།
25 ཁོ་རྣམས་ཀྱི་ས་མཚམས་ནི་ཡཱ་ཟེར་དང་གིལ་ཨད་ཀྱི་གྲོང་ཁྱེར་སོ་སོ་དང་ཨམ་མོན་པའི་ཡུལ་ཕྱེད་ནས་རབ་བཱའི་མདུན་དུ་ཡོད་པའི་ཨ་རོ་ཨེར་བར་དང་།
26 ཧེ་སི་པོན་ནས་ར་མད་མི་ཙི་ཕེ་དང་པེ་ཏོ་ནིམ་བར་དང་། ཡང་མཱ་ཧ་ནཱ་ཡིམ་ནས་དེ་པིར་བར་གྱི་ས་མཚམས་དང་།
27 ཧེ་སི་པོན་རྒྱལ་པོ་སི་ཧོན་གྱི་རྒྱལ་ཁམས་ནས་ལུས་པའི་ཡུལ་ཏེ། གྲོག་གཞུང་གི་པེད་ཧ་རམ་དང་པེད་ནིམ་རཱ། སོའུ་ཀོད། ཚ་ཕོན་བཅས་དང་། ཡོར་དན་གཙང་པོ་དང་དེར་ཉེ་བའི་ཡུལ་ནས་ཀིན་ནེ་རོད་མཚོ་མཐའ་བར་དུ་ཐམས་ཅད་ཡོར་དན་གཙང་པོའི་ཤར་ཏུ་གནས་སོ། །
28 དེ་ནི་གཱ་རྡུ་པ་རྣམས་ལ་རུས་རྒྱུད་ལྟར་ནོར་སྐལ་དུ་ཐོབ་པའི་གྲོང་ཁྱེར་རྣམས་དང་དེ་རྣམས་ལ་གཏོགས་པའི་གྲོང་ཚོ་རྣམས་ཡིན་ནོ། །
མཱ་ན་ཤེའི་ཚོ་པ་ཕྱེད་ཀ་ལ་བགོས་པའི་ས་སྐལ།
29 མོ་ཤེས་མཱ་ན་ཤེའི་ཚོ་པ་ཕྱེད་ཀ་ལ་ས་སྐལ་བགོས་པ་སྟེ། མཱ་ན་ཤེའི་ཚོ་པ་ཕྱེད་ཀའི་རུས་རྒྱུད་ལྟར་བགོས་པ་ཡིན་ནོ། །
30 ཁོ་རྣམས་ཀྱི་ས་མཚམས་ནི་མཱ་ཧ་ནཱ་ཡིམ་ནས་པཱ་ཤན་ཡུལ་ཐམས་ཅད་དེ། པཱ་ཤན་གྱི་རྒྱལ་པོ་ཨོག་གི་རྒྱལ་ཁམས་ཧྲིལ་པོ་དང་། པཱ་ཤན་དུ་ཆགས་པའི་ཡཱ་ཨིར་གྱི་གྲོང་ཁྱེར་ཐམས་ཅད་བསྡོམས་པས་དྲུག་ཅུ་དང་།
31 གིལ་ཨད་ཀྱི་ཕྱེད་ཀ་དང་པཱ་ཤན་གྱི་རྒྱལ་པོ་ཨོག་གི་རྒྱལ་ཁམས་ལ་གཏོགས་པའི་གྲོང་ཁྱེར་ཏེ། ཨ་ཤཱ་ཐ་རོད་དང་ཨེ་དྲེ་ཨི་གཉིས་བཅས་ནི་རུས་རྒྱུད་ལྟར་མཱ་ན་ཤེའི་བུ་མཱ་ཀིར་གྱི་བུ་རྒྱུད་ཕྱེད་ཀར་གནང་བ་ཡིན་ནོ། །
32 དེ་ནི་མོ་ཤེས་ཡོར་དན་གཙང་པོའི་ཤར་ཏུ་ཡེ་རུ་ཀོ་ཡི་མོ་ཨབ་ཐང་ལ་ཁ་གཏད་ནས་ཁོ་རྣམས་ལ་བགོས་པའི་ས་སྐལ་ཡིན།
33 དཀོན་མཆོག་ཡ་ཝཱེས་ལེ་ཝི་པ་རྣམས་ལ་ཞལ་བཞེས་གནང་བ་ཇི་བཞིན། ཡེས་ར་ཨེལ་གྱི་དཀོན་མཆོག་ཡ་ཝཱེ་ནི་ཁོ་རྣམས་ཀྱི་ནོར་སྐལ་ཡིན་པས། མོ་ཤེས་ལེ་ཝིའི་ཚོ་པར་ས་སྐལ་མ་བགོས་པ་ཡིན་ནོ། །