ལེའུ་བཅུ༌པ།
སོ་ལོ་མོན་གྱི་ལེགས༌བཤད།
1 སོ་ལོ་མོན་གྱི་ལེགས་བཤད་འདི་ལྟ༌སྟེ། །བུ་ལ་ཤེས་རབ་ལྡན་གྱུར༌ན། །རང་གི་ཕ་ནི་དགའ་བྱེད༌ཅིང༌། །བུ་ཞིག་གླེན་པ་ཡིན་ན༌ནི། །རང་གི་མ་ཡང་སྡུག་ལ༌སྦྱོར།།
2 མི་གཙང་ནོར་ལ་ཕན་ཐོགས་ཅི་ཡང༌མེད། །དྲང་བདེན་ཁོ་ནས་འཆི་བ་ཉིད་ལས༌སྐྱོབ།།
3 ཡ་ཝཱེས་དྲང་བདེན་མི་ནི་བཀྲེས་མི༌འཇུག །ངན་པའི་གང་ཞིག་འདོད་པ་དགག་པར༌བྱ།།
4 སྒྱིད་ལུག་གིས་ནི་ཕོང་བར་བྱེད་པ༌དང༌། །ལས་ལ་བརྩོན་པར་འབྱོར་ཕྱུག་ལྡན་འགྱུར༌རོ།།
5 དབྱར་དུས་གསོག་པ་ཤེས་རབ་ཅན་ཡིན༌ལ། །སྟོན་དུས་གཉིད་མཁན་ཞབས་འདྲེན་བུ་ཡིན༌ནོ།།
6 བྱིན་རླབས་དྲང་བདེན་མི་ཡི་ཅོད་པན༌ཡིན། །ངན་པའི་སྨྲ་སྒོར་གདུག་སྤྱོད་སྦས་པ༌འོ།།
7 དྲང་བདེན་མི་ཡི་མིང་ལ་བསྟོད་བསྔགས༌འབྱུང༌། །འོན་ཀྱང་ངན་པའི་མིང་ནི་རུལ་བར༌འགྱུར།།
8 སེམས་སུ་ཤེས་རབ་ལྡན་པའི་མི་དེ༌ཡིས། །བཀའ་རྒྱ་རྣམས་ནི་དང་དུ་ལེན་པར༌འགྱུར། །ངག་ཀྱལ་སྨྲ་མཁན་བླུན་པོས་རང་ཉིད༌བརླག།
9 ཀུན་སྤྱོད་ཕུལ་བྱུང་ཅན་ནི་བརྟན་པོར༌བགྲོད། །ལོག་ལམ་འགྲོ་མཁན་མངོན་པར་འགྱུར་བ༌ཡིན།།
10 མིག་བརྡ་གཏོང་བ་སྡུག་བསྔལ་འབྱུང་བའི༌རྒྱུ། །ངག་ཀྱལ་སྨྲ་མཁན་བླུན་པོས་རང་ཉིད༌འཕུང་།།
11 དྲང་པོའི་སྨྲ་སྒོ་སྲོག་གི་ཆུ་མིག༌ཡིན། །ངན་པའི་སྨྲ་སྒོར་གདུག་སྤྱོད་སྦས་པ༌འོ།།
12 སྡང་སེམས་ཀྱིས་ནི་རྩོད་གཞི་སློང་བར༌བྱ། །བྱམས་པས་ཉེས་སྐྱོན་མཐའ་དག་འགེབས་པ༌འོ།།
13 བློ་རིག་ཅན་གྱི་མཆུ་ལ་ཤེས་རབ༌མངའ། །གོ་བ་མེད་པའི་རྒྱབ་ལ་ཁྲིམས་དབྱུག༌ཡོད།།
14 ཤེས་རབ་ཅན་གྱིས་ཤེས་ཡོན་གསོག་པ༌དང༌། །བླུན་པོའི་ཁ་ཡིས་ཉམ་ཆག་བཟོ་བ༌ཡིན།།
15 ཕྱུག་པོའི་རྒྱུ་ནོར་དེ་ཡི་མཁར་རྫོང༌ཡིན། །དབུལ་པོའི་དབུལ་ཕོངས་ཁོ་རང་འཇིག་པའི༌རྒྱུ།།
16 དྲང་བདེན་མི་ཡི་འཐོབ་བྱ་ཚེ་སྲོག༌ཡིན། །འོན་ཀྱང་ངན་པར་ཉེས་ཆད་འཕོག་པ༌ཡིན།།
17 བསླབ་བྱ་ལེན་མཁན་སྲོག་གི་ལམ་དུ༌སྐྱོད། །བཀའ་བཀྱོན་འདོར་མཁན་འཁྲུལ་བའི་ལམ་དུ༌ཞུགས།།
18 སྡང་སེམས་སྦེད་མཁན་མཆུ་ལས་རྫུན་གཏམ༌འབྱུང༌། །དཀྲོག་གཏམ་རྒྱ་ཁྱབ་སྒྲོག་མཁན་གླེན་པ༌ཡིན།།
19 སྐད་ཆ་མང་ན་ཉེས་སྐྱོན་འབྱུང་བར༌ངེས། །རང་ཁ་གཅུན་པ་དེ་ནི་མཁས་པ༌ཡིན།།
20 དྲང་བདེན་མི་ཡི་ལྕེ་ནི་དངུལ་རྐྱང༌འདྲ། །ངན་པའི་སེམས་ལ་རིན་ཐང་ཅི་ཡང༌མེད།།
21 དྲང་པོའི་མཆུ་ཡིས་མང་པོ་གསོ་སྐྱོང༌བྱེད། །བླུན་པོ་གོ་བ་མེད་པས་འཆི་བ༌ཡིན།།
22 ཡ་ཝཱེ་ཁོང་གིས་གནང་བའི་བྱིན་རླབས༌ཀྱིས། །ཕྱུག་པར་བྱེད་ཅིང་སྡུག་བསྔལ་སྣོན་པ༌མིན།།
23 གླེན་པས་ལོག་པར་སྤྱོད་པ་རྩེད་མོར༌འཛིན། །བློ་རིག་ཅན་གྱིས་ཤེས་རབ་སྐྱིད་དུ༌བསམ།།
24 ངན་པ་གང་ལ་འཇིགས་པ་རང་སྟེང༌འབབ། །དྲང་བདེན་མི་ཡི་རེ་འདུན་བསྐང་བར༌འགྱུར།།
25 རླུང་དམར་གཡུགས་རྗེས་མི་ངན་རྩ་མེད༌འགྲོ། །དྲང་བདེན་མི་ནི་རྟག་ཏུ་བརྟན་པོར༌ཚུགས།།
26 སོ་ལ་སྐྱུར་ཁུ་མིག་ལ་དུ་བ༌བཞིན། །ལེ་ལོ་ཅན་གྱིས་ཁོ་རང་མངགས་མཁན༌ནི། །སྡུག་ལ་སྦྱར་བ་དེ་དང་དེ་བཞིན༌ཡིན།།
27 ཡ་ཝཱེར་གུས་ཤིང་འཇིགས་པས་ཚེ་རིང༌ཞིང༌། །མི་ངན་ཚེ་ཐག་ཐུང་བར་བྱེད་པ༌འོ།།
28 དྲང་པོའི་རེ་སྨོན་གྱིས་ནི་དགའ་བར༌བྱེད། །ངན་པའི་རེ་བ་མཇུག་མཐར་མེད་པར༌འགྱུར།།
29 ཡ་ཝཱེའི་གཤེགས་ལམ་དྲང་པོའི་བཙན་རྫོང༌དང༌། །ངན་པ་བྱེད་མཁན་འཕུང་བའི་རྒྱུ་ཡིན༌ནོ།།
30 དྲང་བདེན་མི་ནི་ནམ་ཡང་གཡོ་བ༌མེད། །འོན་ཀྱང་མི་ངན་ཡུལ་འདིར་སྡོད་མི༌ཚུགས།།
31 དྲང་པོའི་ཞལ་ལས་ཤེས་རབ་འབྱུང་བ༌དང༌། །ཕྱིན་ཅི་ལོག་པའི་ལྕེ་ནི་གཅོད་པར༌འགྱུར།།
32 དྲང་པོའི་མཆུ་ཡིས་འོས་འཚམ་གང་ཡིན༌ཤེས། །ངན་པའི་ཁ་ནས་ལོག་གཏམ་སྨྲ་བ༌འོ།།