ལེའུ་བཅུ་བདུན་པ།
དཱ་བིད་ཀྱིས་གོལ་ཡད་ལ་འཐབ་མོ་བྱས་པ།
1 དེ་ནས་ཕེ་ལེ་ཤེད་པ་རྣམས་ཀྱིས་དམག་རྒྱག་པའི་ཕྱིར་ཡ་ཧུ་དཱ་ལ་གཏོགས་པའི་སོ་གོ་ཞེས་པའི་གྲོང་ཚོ་རུ་དམག་ཚོགས་ཐམས་ཅད་བསྡུས་ནས། སོ་གོ་གྲོང་ཚོ་དང་ཨེ་ཕེ་སི་དམ་མིམ་ཞེས་པའི་ས་ཆའི་ཨ་ཟེ་ཀཱ་གྲོང་ཚོ་གཉིས་ཀྱི་བར་དུ་དམག་སྒར་བཏབ་པ་རེད།
2 སོ་ལོ་དང་ཡེས་ར་ཨེལ་པ་རྣམས་ཀྱང་འཛོམས་ནས། ཨེ་ལཱ་ཡི་ལུང་པ་རུ་དམག་སྒར་བཏབ་སྟེ་ཕེ་ལེ་ཤེད་པ་རྣམས་ལ་གཡུལ་བཤམས་སོ། །
3 ཡང་ཕྱོགས་གཅིག་གི་རི་ལ་ཕེ་ལེ་ཤེད་པ་དང་ཕྱོགས་ཅིག་ཤོས་ཀྱི་རི་ལ་ཡེས་ར་ཨེལ་པ་བསྡད་དེ། དེ་གཉིས་ཀྱི་བར་ལ་ལུང་པ་ཞིག་ཡོད་པ་ཡིན།
4 དེ་ནས་ཕེ་ལེ་ཤེད་པའི་དམག་སྒར་ནས་གཱད་ཡུལ་གྱི་དམག་འཁྲུག་སློང་མཁན་གོལ་ཡད་ཅེས་བྱ་བ་ཐོན་ཞིང་། མི་དེའི་གཟུགས་ཀྱི་རིང་ཚད་ལ་ཁྲུ་དྲུག་དང་མཐོ་གང་ཡོད་པ་དང་།
5 མི་དེའི་མགོ་ལ་ལི་ཡི་རྨོག་དང་། ལུས་ལ་ལི་ཡི་ཁྲབ་གྱོན་ཏེ། ཁྲབ་དེའི་ལྕི་ཚད་ལ་སྲང་ལྔ་སྟོང་ཙམ་ཡོད་པ་རེད།
6 ཁོའི་རྐང་པ་ལ་ལི་ཡི་པུས་ཤུབས་དང་། དཔུང་པ་གཉིས་ཀྱི་བར་ལ་ལི་ཡི་མདུང་ཐུང་ཡོད་པ་ཡིན།
7 ཡང་དེའི་མདུང་རིང་གི་ཡུ་བ་ནི་ཤིན་ཏུ་སྦོམ་སྟེ། དབྱིབས་ནི་བཟོ་འཁོར་གྱི་སྲོག་མདའ་ལྟ་བུ་ཡོད་པ་དང་། མདུང་ལྕེའི་རྣོ་ལྕགས་ཀྱི་ལྗིད་ཚད་ནི་སྲང་དྲུག་བརྒྱ་ཡིན་ཞིང་། མི་དེའི་མདུན་དུ་ཕུབ་འཁུར་མཁན་ཞིག་ཕྱིན་ཏོ། །
8 དེ་ནས་མི་དེ་ལངས་བསྡད་ནས་ཡེས་ར་ཨེལ་གྱི་དམག་ཚོགས་འབོད་ཀྱིན་ན་རེ། ཁྱོད་ཅག་ཕྱི་རུ་འོངས་ནས་དམག་བཤམས་པ་ཅི་ཡིན། ང་ནི་ཕེ་ལེ་ཤེད་པ་དང་། ཁྱོད་ཅག་ནི་སོ་ལོའི་ཞབས་ཕྱི་མ་ཡིན་ནམ། ཁྱོད་རྣམས་ལས་མི་ཞིག་འདེམས་ནས་ངའི་མདུན་ལ་མར་འོང་དུ་ཆུག་ཅིག
9 གལ་ཏེ་ཁོས་ང་དང་འཐབ་ནས་ང་བསད་ན། ང་ཚོ་ཁྱོད་ཅག་གི་གཡོག་པོ་བྱེད་པར་བྱ། གལ་ཏེ་ང་ཁོ་ལས་རྒྱལ་ཏེ་ཁོ་བསད་ན་ཁྱོད་རྣམས་ང་ཚོའི་གཡོག་པོ་བྱེད་པར་འགྱུར་ཞིང་། ཁྱོད་ཚོས་ངེད་ཅག་ལ་ཞབས་ཕྱི་བྱེད་པར་འགྱུར་ཞེས་སྨྲས།
10 ཡང་ཕེ་ལེ་ཤེད་པ་དེ་ན་རེ། དེ་རིང་ངས་ཡེས་ར་ཨེལ་གྱི་དམག་དཔུང་ལ་སྨད་པ་ཡིན། མི་ཞིག་ཐོངས་དང་ཕྱོགས་གཉིས་ཀྱིས་འཐབ་པར་བྱ་ཞེས་སྨྲས་པས།
11 སོ་ལོ་དང་ཡེས་ར་ཨེལ་པ་ཐམས་ཅད་ཀྱིས་གཏམ་དེ་ཐོས་པ་ཙམ་གྱིས་སྙིང་སྟོབས་ཉམས་ཏེ་ཤིན་ཏུ་འཇིགས་སོ། །
12 དཱ་བིད་ནི་ཡ་ཧུ་དཱ་ཡུལ་གྱི་པེད་ལེ་ཧེམ་གྲོང་རྡལ་ནས་ཡིན་པའི་ཨེབ་རཱད་པ་ཡེ་སེ་ཞེས་པ་དེའི་བུ་ཡིན་ལ། ཡེ་སེ་ལ་བུ་བརྒྱད་ཡོད་པ་དང་། སོ་ལོའི་དུས་སུ་ཡེ་སེ་ནི་རྒན་པའི་ཁྲོད་དུ་བརྩིས་སོ། །
13 ཡེ་སེ་ཡི་བུ་ཆེ་བ་གསུམ་ནི་སོ་ལོའི་རྗེས་སུ་དམག་ཏུ་སོང་ཞིང་། དེ་གསུམ་པོ་ལས་བུ་སྐྱེས་འགོའི་མིང་ལ་ཨེ་ལི་ཨབ་དང་། བུ་གཉིས་པའི་མིང་ལ་ཨ་བི་ནཱ་དབ་དང་། བུ་གསུམ་པའི་མིང་ལ་ཤམ་མཱ་ཞེས་ཟེར།
14 དཱ་བིད་ནི་བུ་ཐམས་ཅད་ལས་ཆུང་བ་ཡིན་ཞིང་། ཕུ་བོ་ཆེ་བ་གསུམ་སོ་ལོའི་རྗེས་སུ་ཕྱིན་པ་རེད།
15 དཱ་བིད་སྐབས་རེར་སོ་ལོ་དང་ཁ་བྲལ་ཏེ་པེད་ལེ་ཧེམ་དུ་རང་གི་ཕ་ཡི་ལུག་ཁྱུ་འཚོ་བར་སོང་།
16 ཡང་ཕེ་ལེ་ཤེད་པ་ཁོ་རང་ནངས་དགོང་གཉིས་ཀར་འོངས་ཏེ་ཉིན་བཞི་བཅུའི་བར་དུ་རང་གི་རྩལ་བསྟན་ཏོ། །
17 དེ་ནས་ཡེ་སེ་ཡིས་རང་གི་བུ་དཱ་བིད་ལ་ཁྱོད་རང་དམག་སྒར་དུ་སོང་ཞིག གྲོ་ཡོས་ཨེ་ཕཱ་གཅིག་དང་བག་ལེབ་བཅུ་པོ་འདི་ཁྱེར་ནས་དེ་དག་ཁྱོད་ཀྱི་ཕུ་བོ་རྣམས་ལ་སྤྲོད་ཅིག
18 ཡང་དེ་དག་གི་སྟོང་དཔོན་ལ་འོ་ཐུད་བཅུ་པོ་འདི་ཁྱེར་ཏེ། སྤུན་ཟླ་རྣམས་ཀྱི་གནས་ཚུལ་ལ་བལྟས་ནས་དེ་དག་གི་ཕྱོགས་ནས་རྟགས་ཤིག་འཁྱེར་ཤོག་ཅེས་ཟེར་བའི་སྐབས་སུ།
19 སོ་ལོ་དང་དཱ་བིད་ཀྱི་ཕུ་བོ་གསུམ་པོ་དང་ཡེས་ར་ཨེལ་པ་ཐམས་ཅད་ཕེ་ལེ་ཤེད་པ་རྣམས་དང་འཐབ་ཕྱིར་ཨེ་ལཱ་ཞེས་པའི་ལུང་པར་བསྡད་ཡོད་པ་རེད།
20 དཱ་བིད་ནངས་སྔ་མོ་ལངས་ནས་ལུག་ཁྱུ་ནི་སྲུང་མཁན་ཞིག་ལ་བཅོལ་ཏེ། ཡེ་སེའི་བཀའ་བཞིན་དུ་རྒྱགས་ཆས་ཁུར་ནས་སོང་བ་དང་། དམག་སྒར་དུ་སླེབས་པའི་ཚེ་དམག་ཚོགས་ནི་གཡུལ་ས་རུ་འགྲོ་ཞིང་གད་རྒྱངས་བསྒྲགས་སོ། །
21 ཡེས་ར་ཨེལ་དང་ཕེ་ལེ་ཤེད་པ་གཉིས་ཀྱིས་ཕན་ཚུན་ཁ་གཏད་དུ་དམག་བཤམས་པ་རེད།
22 དེ་ནས་དཱ་བིད་ཀྱིས་རང་གི་རྒྱགས་ནི་སྲུང་དམག་གི་ལག་ཏུ་བཞག་སྟེ། གཡུལ་ས་རུ་བརྒྱུགས་ཤིང་སྤུན་ཟླ་རྣམས་ལ་ཁམས་འདྲི་བྱས་ནས།
23 དེ་དག་དང་མཉམ་དུ་གཏམ་བྱས་པ་ལ། དམག་ཚོགས་ཀྱི་ནང་ནས་གཱད་ཡུལ་གྱི་ཕེ་ལེ་ཤེད་པ་གོལ་ཡད་ཅེས་བྱ་བའི་དམག་འཁྲུག་སློང་མཁན་དེ་ཐོན་ནས་སྔར་བཞིན་གཏམ་སྨྲས་པ་དཱ་བིད་ཀྱིས་ཐོས།
24 ཡང་ཡེས་ར་ཨེལ་པ་རྣམས་ཀྱིས་མི་དེ་མཐོང་བའི་ཚེ་ཤིན་ཏུ་འཇིགས་ཤིང་དེའི་མདུན་ནས་བྲོས་སོ། །
25 དེ་ནས་ཡེས་ར་ཨེལ་པ་རྣམས་ཀྱིས། ཡར་འོང་བའི་མི་དེ་མཐོང་ངམ། མི་དེ་ནི་ཡེས་ར་ཨེལ་ལ་སྨད་པའི་ཕྱིར་འོང་བར་ངེས། སུ་ཞིག་གིས་མི་དེ་བསད་ན། དེ་ལ་རྒྱལ་པོས་རྒྱུ་ནོར་མང་པོ་དང་ཉིད་ཀྱི་སྲས་མོ་གནང་ཞིང་། དེའི་ཕ་ཡི་ཁྱིམ་ལ་ཁྲལ་མི་འཕོག་པར་བྱ་ཞེས་པ་ཐོས་པས།
26 དཱ་བིད་ཀྱིས་རང་གི་གམ་དུ་ཡོད་པའི་མི་དེ་དག་ལ། ཕེ་ལེ་ཤེད་པ་བསད་ནས་ཡེས་ར་ཨེལ་གྱི་ངོ་ཚ་འདི་མེད་པར་གཏོང་མཁན་ལ་ཇི་ལྟར་བྱ་འོས། གཏན་དུ་གསོན་པོར་བཞུགས་པའི་དཀོན་མཆོག་ཁོང་གི་དམག་དཔུང་ལ་སྨད་པའི་ཕེ་ལེ་ཤེད་པ་མཚན་སྐྱི་མ་བཅད་པ་འདི་སུ་ཡིན་ཞེས་སྨྲས་པའི་ལན་དུ།
27 མི་རྣམས་ཀྱིས་སྔར་སྨྲས་པའི་གཏམ་བཞིན་ཁོ་ལ། ཕེ་ལེ་ཤེད་པ་གསོད་པའི་མི་ལ་འདི་དང་འདི་བྱའོ་ཞེས་སྨྲས་སོ། །
28 དཱ་བིད་ཀྱི་ཕུ་བོ་ཨེ་ལི་ཨབ་ཀྱིས་ཁོས་མི་རྣམས་དང་གཏམ་བྱེད་པ་ཐོས་པས། དཱ་བིད་ལ་ཁོང་ཁྲོ་ལངས་ནས། ཁྱོད་ཅིའི་ཕྱིར་མར་འོངས་པ་ཡིན། དབེན་སྟོང་དུ་ཡོད་པའི་ལུག་ཉུང་ཉུང་དེ་སུ་ལ་བཅོལ་ཡོད་དམ། ངས་ཁྱོད་ནི་ང་རྒྱལ་ཆེ་བ་དང་ཁྱོད་ཀྱིས་ངན་སེམས་ཅི་ལྟ་བུ་བཅངས་ཡོད་པ་ཤེས་ཏེ། དམག་འཁྲུག་མཐོང་བའི་ཆེད་དུ་ཁྱོད་མར་འོངས་པ་རེད་ཅེས་སྨྲས།
29 དེའི་ལན་དུ་དཱ་བིད་ཀྱིས། ད་ལྟ་ངས་ཅི་བྱས་སམ། སྐད་ཆ་ཚིག་གཅིག་ཀྱང་བརྗོད་མི་རུང་ངམ་ཞེས་སྨྲས་པ་དང་།
30 དེ་དང་བྲལ་ནས་མི་གཞན་སྐོར་ཞིག་ལ་སྔར་བཞིན་གཏམ་བྱས་པས། དེ་དག་གིས་སྔར་བཞིན་ལན་བཏབ་བོ། །
31 དཱ་བིད་ཀྱིས་སྨྲས་པའི་གཏམ་ཐོས་ནས་དེ་དག་གིས་སོ་ལོ་ལ་ཞུས་པས། དེས་ཁོ་རང་འབོད་པར་མི་ཞིག་མངགས།
32 དེ་ནས་དཱ་བིད་ཀྱིས་སོ་ལོ་ལ། མི་སུ་ཡིན་ཡང་སེམས་མ་ཕམ་ཞིག ཁྱེད་ཀྱི་ཞབས་ཕྱི་ང་རང་དེར་སོང་ནས་ཕེ་ལེ་ཤེད་པ་དེ་དང་འཐབ་པར་བྱ་ཞེས་ཞུས་པས།
33 སོ་ལོས་དཱ་བིད་ལ། ཁྱོད་ཕེ་ལེ་ཤེད་པ་དེ་དང་འཐབ་པའི་ཕྱིར་འགྲོ་མི་ནུས། ཁྱོད་ནི་ལོ་ན་གཞོན་ཞིང་། ཁོ་ནི་ཆུང་ངུ་ནས་དམག་རྩལ་ཅན་ཡིན་ནོ་ཞེས་སྨྲས་ནས།
34 དཱ་བིད་ཀྱིས་སོ་ལོ་ལ། ཁྱེད་ཀྱི་ཞབས་ཕྱི་བདག་གིས་ཕ་ཡི་ལུག་ཁྱུ་སྲུང་བའི་ཚེ། སེང་གེ་དང་དོམ་སོ་སོར་འོངས་ཏེ་ལུག་ཁྱུ་ལས་ལུ་གུ་ཁྱེར་ཐེངས་རེར།
35 བདག་ནི་རྗེས་སུ་དེད་ཅིང་དེར་བརྡུངས་ཏེ་གཅན་གཟན་དེའི་ཁ་ནས་ལུ་གུ་བསྐྱབས་པ་ཡིན། ཡང་གཅན་གཟན་དེ་བདག་གི་མདུན་དུ་ཀེར་གྱིས་ལངས་པས། བདག་གིས་དེའི་ཁ་སྤུ་ནས་བཟུང་ཞིང་བརྡུངས་ནས་བསད་པ་ཡིན།
36 ཁྱེད་ཀྱི་ཞབས་ཕྱི་བདག་གིས་སེང་གེ་དང་དོམ་གཉིས་བསད་པ་ལྟར། མཚན་སྐྱི་མ་བཅད་པའི་ཕེ་ལེ་ཤེད་པ་དེ་ཡང་དེ་དང་འདྲ་བར་འགྱུར། གང་ལ་ཞེ་ན། མི་དེས་གཏན་དུ་གསོན་པོར་བཞུགས་པའི་དཀོན་མཆོག་གི་དམག་དཔུང་ལ་སྨད་པས་སོ་ཞེས་སྨྲས།
37 ཡང་དཱ་བིད་ཀྱིས། དཀོན་མཆོག་ཡ་ཝཱེས་བདག་ནི་སེང་གེ་དང་དོམ་གཉིས་ཀྱི་ལག་ནས་བསྒྲལ་བ་ལྟར། ཕེ་ལེ་ཤེད་པ་འདིའི་ལག་ནས་ཀྱང་སྒྲོལ་བར་འགྱུར་ཞེས་ཞུས་པས། སོ་ལོས་དཱ་བིད་ལ། ད་སོང་ཞིག དཀོན་མཆོག་ཡ་ཝཱེ་ཁྱོད་དང་མཉམ་དུ་བཞུགས་པར་གྱུར་ཅིག་ཅེས་བསྐུལ་ནས།
38 སོ་ལོས་དཱ་བིད་ལ་རང་གི་གོས་བསྐོན་ཏེ། ལི་ཡི་རྨོག་མགོ་ལ་བཞག་ནས་ཁྲབ་ཀྱང་བསྐོན་ཏོ། །
39 དེ་ནས་དཱ་བིད་ཀྱིས་གོས་དེའི་སྟེང་དུ་རལ་གྲི་བཏེགས་ནས་འགྲོ་ཐུབ་མིན་ལ་བལྟས་ཙ་ན། སྔར་ནས་གྱོན་པར་གོམས་མེད་པས། དཱ་བིད་ཀྱིས་སོ་ལོ་ལ། སྔར་ནས་གྱོན་པར་གོམས་མེད་པས་ང་བགྲོད་པར་མི་ནུས་ཞེས་ཞུས་པས་དཱ་བིད་ཀྱིས་དེ་རྣམས་ཕུད་པ་རེད།
40 དེ་ནས་ཁོས་རང་གི་དབྱུག་པ་ལག་པར་བཟུང་ཞིང་། གྲམ་པ་ནས་རྡོ་འཇམ་པོ་ལྔ་བདམས་ཏེ། རང་ལ་ཡོད་པའི་ལུག་རྫིའི་བྲོ་ཁུག་གི་ནང་དུ་བཞག་པ་དང་ལག་ཏུ་འུར་ཆ་བཟུང་སྟེ་ཕེ་ལེ་ཤེད་པ་དང་ཉེ་བར་ཕྱིན།
41 ཕེ་ལེ་ཤེད་པ་ཡང་འོངས་ནས་དཱ་བིད་དང་ཉེ་བར་སླེབས་པ་དང་། ཕུབ་འཁུར་བའི་མི་དེ་ཁོའི་མདུན་དུ་སོང་།
42 ཕེ་ལེ་ཤེད་པས་ཕར་བལྟས་པའི་ཚེ། དཱ་བིད་ནི་བྱད་གཟུགས་ལེགས་ཤིང་ངོ་མདངས་དམར་བའི་གཞོན་ནུ་ཞིག་ཡིན་པ་མཐོང་བས་དེ་ལ་སྨད་པ་བཏང་།
43 དེ་ནས་ཕེ་ལེ་ཤེད་པས་དཱ་བིད་ལ། བེར་ཀ་ཁུར་ནས་ངའི་མདུན་དུ་འོང་དོན་ཅི་ཡིན། ང་ཁྱི་ཡིན་ནམ་ཞེས་སྨྲས་ཤིང་། ཕེ་ལེ་ཤེད་པས་རང་གི་ལྷའི་མིང་བརྗོད་ནས་དཱ་བིད་ལ་དམོད་མོ་བཏབ་པ་རེད།
44 དེ་ནས་ཕེ་ལེ་ཤེད་པས་དཱ་བིད་ལ། ངའི་མདུན་དུ་ཤོག་དང་། ངས་ཁྱོད་ཀྱི་ཤ་ནམ་མཁའི་བྱ་དང་ཐང་གི་གཅན་གཟན་རྣམས་ལ་གཏོང་ངོ་ཞེས་པའི་ལན་དུ།
45 དཱ་བིད་ཀྱིས་ཕེ་ལེ་ཤེད་པ་ལ། ཁྱོད་ནི་རལ་གྲི་དང་མདུང་རིང་ཐུང་ཐོགས་ནས་ངའི་རྩར་འོངས་པ་དང་། ང་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ། ཁྱོད་ཀྱིས་སྨད་པའི་ཡེས་ར་ཨེལ་གྱི་དམག་ཚོགས་ཀྱི་འགོ་འདྲེན་ལགས་པ་དཀོན་མཆོག་གི་མཚན་ལ་བརྟེན་ནས་ཁྱོད་ཀྱི་མདུན་དུ་འོངས་པ་ཡིན།
46 དེ་རིང་ཉིན་མོར་དཀོན་མཆོག་ཡ་ཝཱེས་ཁྱོད་ནི་ངའི་ལག་ཏུ་སྤྲད་པ་སྟེ། ངས་ཁྱོད་བསད་ནས་ཁྱོད་ཀྱི་མགོ་གཅོད་པར་བྱ། ཡང་ཕེ་ལེ་ཤེད་པའི་དམག་ཚོགས་ཀྱི་རོ་ཐམས་ཅད་དེ་རིང་ཉིན་མོར་ནམ་མཁའི་བྱ་དང་ས་གཞིའི་གཅན་གཟན་རྣམས་ལ་གཏོང་བར་བྱ། ཡེས་ར་ཨེལ་གྱི་ནང་དཀོན་མཆོག་ཅིག་ཡོད་པ་ས་གཞི་འདི་ཐམས་ཅད་ལ་མངོན་པར་འགྱུར།
47 ཡང་དཀོན་མཆོག་ཡ་ཝཱེའི་རྒྱལ་ཁ་ནི་རལ་གྲིའམ་མདུང་ལ་རག་མི་ལས་པ་ནི་འདི་རུ་འཛོམས་པའི་མི་ཚོགས་ཐམས་ཅད་ཀྱིས་ཤེས་པར་འགྱུར། འཐབ་འཁྲུག་གི་རྒྱལ་ཁ་འདི་དཀོན་མཆོག་ཡ་ཝཱེའི་ཡིན་པས། ཁོང་གིས་ཁྱོད་རྣམས་ང་ཚོའི་ལག་ཏུ་སྤྲོད་པར་འགྱུར་ཞེས་སྨྲས་པ་དང་།
48 ཕེ་ལེ་ཤེད་པ་ལངས་ནས་ཚུར་འོངས་ཏེ་དཱ་བིད་དང་ཉེ་བར་ཐུག་ལ་ཁད་དུ། དཱ་བིད་མྱུར་བར་ཕར་ཕེ་ལེ་ཤེད་པའི་ཕྱོགས་སུ་ཤོར་ཅིང་གཡུལ་སར་བརྒྱུགས་ནས།
49 རང་གི་བྲོ་ཁུག་ནང་དུ་ལག་པ་བཏང་ཞིང་རྡོ་བ་ཞིག་བླངས་ཏེ་འུར་ཆར་བཞག་སྟེ་བརྒྱབ་ནས་ཕེ་ལེ་ཤེད་པའི་དཔྲལ་བར་ཕོག་ཅིང་། རྡོ་དེ་དཔྲལ་བའི་ནང་དུ་ཟུག་པ་དང་ཕེ་ལེ་ཤེད་པ་ཁ་སྦུབ་ཏུ་འགྱེལ་ཏོ། །
50 དེ་ལྟར་དཱ་བིད་ཀྱིས་འུར་ཆ་དང་རྡོ་ཡིས་བརྒྱབ་ཅིང་ཁོ་རང་ཕེ་ལེ་ཤེད་པ་དེ་ལས་དཔའ་ཞིང་རྟུལ་ཕོད་ཆེ་བས་ཕེ་ལེ་ཤེད་པར་བརྡུངས་ཏེ་བསད་པ་དང་། དཱ་བིད་ཀྱི་ལག་ཏུ་རལ་གྲི་མེད་པ་རེད།
51 དཱ་བིད་རྒྱུག་སོང་ནས་ཕེ་ལེ་ཤེད་པ་དེའི་གམ་དུ་ལངས་ཏེ། དེའི་རལ་གྲི་ཤུབས་ནས་ཕྱུང་ཞིང་དེ་བསད་ནས་མགོ་བཅད། ཕེ་ལེ་ཤེད་པ་རྣམས་ཀྱིས་ཁོ་ཚོའི་གྱད་པ་དེ་ཤི་ཟིན་པ་མཐོང་བས་བྲོས་སོ། །
52 དེ་ནས་ཡེས་ར་ཨེལ་པ་རྣམས་དང་ཡ་ཧུ་དཱ་པ་རྣམས་ལངས་ནས་འབོད་སྐད་བསྒྲགས་ཤིང་། ལུང་པ་ཞིག་ དང་ཨེག་རོན་གྲོང་ཁྱེར་གྱི་རྒྱ་སྒོར་སླེབས་པའི་བར་དུ་ཕེ་ལེ་ཤེད་པའི་རྗེས་དེད། ཕེ་ལེ་ཤེད་པ་སྣད་པོ་རྣམས་ནི་ཤ་ཨ་ར་ཡིམ་ནས་གཱད་དང་ཨེག་རོན་བཅས་ཀྱི་བར་དུ་ལྷུང་ངོ་། །
53 དེ་ནས་ཡེས་ར་ཨེལ་པ་རྣམས་ཕེ་ལེ་ཤེད་པའི་རྗེས་དེད་ནས་ཕྱིར་ལོག་སྟེ། དེ་རྣམས་ཀྱི་དམག་སྒར་ཐམས་ཅད་བཤིག་ཅིང་ནོར་རྫས་ཁྱེར་བ་རེད།
54 དེ་ནས་དཱ་བིད་ཀྱིས་ཕེ་ལེ་ཤེད་པའི་མགོ་བླངས་ཏེ་ཡེ་རུ་སཱ་ལེམ་དུ་ཁྱེར་ཡང་དེའི་གོ་མཚོན་ནི་རང་གི་གུར་དུ་བཞག་གོ །
55 སྔར་སོ་ལོས་དཱ་བིད་ཕེ་ལེ་ཤེད་པ་དང་འགྲན་པའི་ཕྱིར་འགྲོ་བ་མཐོང་བའི་ཚེ། དམག་དཔོན་ཨབ་ནེར་ཞེས་པ་དེ་ལ། ཀྱེ་ཨབ་ནེར། གཞོན་ནུ་དེ་ནི་སུའི་བུ་ཡིན་ཞེས་དྲིས་པའི་ལན་དུ་ཨབ་ནེར་གྱིས། ཀྱེ་རྒྱལ་པོ་ལགས། ངས་ཁྱེད་ཀྱི་མདུན་དུ་དམ་བཅའ་བར་བྱ་སྟེ་ངས་གཏན་ནས་མི་ཤེས་ཞུས་པས།
56 རྒྱལ་པོས་གཞོན་ནུ་དེ་སུའི་བུ་ཡིན་པ་དྲིས་ཤིག་ཅེས་སྨྲས་པས།
57 དཱ་བིད་ཀྱིས་ཕེ་ལེ་ཤེད་པ་བསད་ནས་ཕྱིར་སླེབས་ཤིང་། ཁོའི་ལག་ཏུ་ཕེ་ལེ་ཤེད་པའི་མགོ་བཟུང་ཡོད་ལ། ཨབ་ནེར་གྱིས་དཱ་བིད་ཁྲིད་ནས་སོ་ལོའི་དྲུང་དུ་ཕྱིན།
58 དེ་ནས་སོ་ལོས་ཁོ་ལ། ཀྱེ་གཞོན་ནུ། ཁྱོད་སུའི་བུ་ཡིན་ནམ་ཞེས་པའི་ལན་དུ་དཱ་བིད་ཀྱིས། བདག་ནི་པེད་ལེ་ཧེམ་ནས་ཡིན་པའི་ཁྱེད་ཀྱི་ཞབས་ཕྱི་ཡེ་སེའི་བུ་ཡིན་ཞེས་ཞུས་སོ། །