Bibeli Luayãtaalá Làasoode 11

11

1 Ɔzↄ̃ gbɛ̃́ↄnɛ blɛi,

gↄↄewa ńyↄ̃ e lↄ.

2 Biilɛ gbɛ̃ↄn soplaↄnɛ ge swaaↄ̃,

asa ń músi pↄ́ a bùsu le dↄ̃o.

3 Tó luabɛsiana pà ń ío, ì ma tↄↄlɛ lou ũɛ,

tó lí lɛ̀lɛ gukpɛ ge bɛ'aɛn nò,

gu pↄ́ à lɛ̀lɛu, we ìↄ wúlɛu.

4 Gbɛ̃́ pↄ́ a wɛ́ dↄ ĩ́anai lí pↄ́tↄ̃o,

gbɛ̃́ pↄ́ lɛ́ luabɛsia gwa lí pↄkɛkɛo.

5 Lá ń wɛ̃nibↄkĩi ge nɛ́ daalɛa nɛasakpɛu dↄ̃o,

ńyↄ̃ fↄ̃ ǹ Lua Pↄ́piikɛna yãkɛa dↄ̃o.

6 Pↄ́tↄ̃ kↄↄ, ńsu ↄkpa n kùɛ oosio,

asa ń dↄ̃ a kpele mɛ́ a kɛ báaa vĩo.

Kɛ́ bee yã̀, ge kee yã̀,

ge aaↄ maa ḿpii yã̀, ń dↄ̃o.

7 Gupua na,

mɛ́ wɛsia ĩatɛ̃lɛ ì káńgu.

8 Lá gbɛ̃́ wɛ̃ni lɛ́ gɛ́ lɛ́u,

aà pↄnakɛu píi.

Ń beeo aà làasookɛ gusia gↄↄↄwa,

asa aaↄ dasiɛ.

Yã́ pↄ́ lɛ́ mↄ́ píi pãɛ.

Lɛdaa ɛ̀waasoↄwa

9 Ɛ̀waaso, pↄnakɛ n ɛ̀waasogↄↄ,

to n pↄ kɛ n ɛ̀waasogↄↄwa na.

Yã́ pↄ́ n pↄ gbà kɛ,

tɛ yã́ pↄ́ kàngui,

ãma apii guu ǹyↄ̃ dↄ̃

kɛ́ Lua a yã́kpalɛkɛnnↄ.

10 Ńsu to n pↄ yao,

ǹ n gu'ĩaↄ bↄnla,

asa ɛ̀waasokɛ ń mikã siao ì gɛ̃zɛaɛ.