Bibeli Luayãtaalá Làasoode 12

1 To n Kɛna yã́ dↄngu n ɛ̀waasogↄↄ

e gu àↄ gɛ́ dↄinɛ vãi,

e wɛ̃ pↄ́ ńyↄ̃ mɛ n pↄ nawào aↄ gɛ́ kái.

2 To aà yã́ dↄngu

e ĩatɛ̃ ń gupuao àↄ lao,

e mↄvua ń saanaↄ aaↄ siakũ,

e loumaa gbɛa gu weesai àↄ gɛ́ mↄ́i.

3 Gↄↄ bee n ↄↄ lualua,

n gbáↄ koo,

n pↄ́sobↄↄ kã́mabo kɛ́ aa dasi lↄo,

n gugwabↄↄ gu'e ń tↄ́ↄnau dã̀adãa.

4 N lɛ́ aↄ kpaaũa gãaɛ,

wísilↄgbɛ kↄ̃fĩ a busɛkũnɛ.

Bãↄ wii a n vu iu,

mɛ́ nɛnↄɛnaↄ lɛ a kɛnɛ busɛ.

5 Ńyↄ̃ vĩakɛ gulɛsĩɛ ń bɛa zɛ́ guuo,

n mikã a pu lán gyavuwa.

Ńyↄ̃ nzĩa gálɛ lán kwa táa'oawa,

pↄe a n mɛ fɛlɛ lↄo,

asa gbɛ̃nazĩna ì gɛ́ a gɛ́kĩiɛ,

ↄ̃ ↄↄlↄnaↄ ìↄ bɛ gãaɛ.

6 To n Kɛna yã́ dↄngu

e n ã́nusu ba àↄ gɛ́ kɛ̃́i,

e n vua ta àↄ gɛ́ kpàolokũi,

e n nibↄna lo àↄ gɛ́ wíwii,

e n lↄ̀ↄ wuluu àↄ gɛ́ ɛ́i,

7 e n bùsuti à ɛa àↄ gɛ́ gɛ̃i tɛ̃́ɛnau,

gu pↄ́ à bↄ̀u,

e n nisĩna àↄ gɛ́ tái

Lua pↄ́ kpàma kĩ́i.

8 Mapi ma Làasoode ma mɛ̀:

Yãpã búubuu, yã́pii pãɛ.

Yã́pi midɛa

9 Bee gbɛa lá Làasoodepi ↄ̃nↄ, à dↄ̃a dàdanɛ́. À làasookɛ̀ à kpálɛkɛ̀ yã́ↄi, ↄ̃ à yáasiↄ kɛ̀kɛ dasi. 10 À kpálɛkɛ̀ yãmaai, ↄ̃ à yã́piↄ kɛ̃̀ a zɛ́wa, mɛ́ sĩanaɛ.

11 Ɔ̃nↄnaↄ yã́ↄ dɛ lán gése pↄ́ wì lɛ́ sↄ̃́uwaɛ,

an yã'onɛↄ dɛ lán kusa pↄ́ wa pà gíũgiũↄwaɛ.

Sãdãn mɛ̀ndona mɛ́ dànɛ́.

12 Ma nɛ́, laaika, ńsu yãe kã́fĩuo. Wì taalaↄ bↄ dasidasi a lɛ́ vĩo, mɛ́ kyokɛa zↄ̃ↄ ì mɛ kpasaɛ. 13 Wà apii mà, a midɛan kɛ:

Vĩakɛ Luaɛ,

níↄ aà yãdilɛaↄ kũa,

asa gbɛ̃́pii yã́n we.

14 Lua a yã́kpalɛkɛwanↄ wá yã́ píiwa,

baa asiiyã, a maa ge a vãin nò.