Bibeli Luayãtaalá Ɛbɛluↄ 1

ƐBƐLUƆ

Yã́ pↄ́ kú láɛ bee guuↄ

Kɛ́ wà íbɛlɛsɛ̀ ń Yesudeↄ, bee mɛ́ tò an gbɛ̃eↄ ye fu, ↄ̃ lápi kɛ̃na lɛ́ tɛ́kpańgu aa zɛ gbãa Dii náaikɛa guu. À mɛ̀ Kilisi zↄ̃ↄ dɛ malaikaↄ ń ãnabiↄla píi, mɛ́ zĩ pↄ́ a kɛ̀ gbɛ̃́pii yã́ musu dɛ an pↄ́la píi. Za lápi daalɛawa à mɛ̀ Lua azĩa ↄ̀lↄwɛ̃ɛ a nɛ́ Yesu Kilisi ũ (1.1-3). Lápi kpaalɛa lɛɛ pla:

A sɛ̃́ia (1.4-10.18) lɛ́ Kilisi dɛa pↄ́piia yã́ bↄↄlɛkɛ. Ãnabiↄ ↄ̃ a dɛńla adoo (1.1), a dɛ malaikaↄla lↄɛ (1.4-2.18), a dɛ Mↄizi ń Yozueeola (3.1-4.13). A dɛ luabaakuańnↄ káau sa'onkiaↄla (4.14-7.28). À azĩa kpà sa'obↄ ũ à gà lipãakↄ̃awa gbɛ̃́piiɛ, ↄ̃ bee dɛ sa dasi pↄ́ Isailiↄ ò yãala píi (8.1-10.18). À zɛwɛ̃̀wɛ̃ɛ wà sↄ̃ Luazi, zɛ́ pↄ́ sa'oa pãle i e wɛ̃̀ yãao.

A plaade (10.19-13.17) lɛ́ tɛ́kpawágu wà zɛ gbãa Yesu náaikɛa guu (10.19-39). Wekĩi luabaakuańnↄ káau luanaaikɛnaↄ yã́ kúu (lɛɛ 11). Àlɛ lɛdawá wà wɛ́pɛ Yesu Kilisiwa, kɛ́ wà e íbɛlɛsɛawanↄ fↄ̃ laaàwa (12.1-11). Lɛdama gbɛzãↄ ń gbɛ̃́ↄ gbaa laaio gbɛa (12.12-13.19), lápi kɛ̃na fↄkpàmá à báaadàńgu (13.20-25).

Lua Nɛ́ dɛ malaikaↄla

1 Lua dↄ̀aa ãnabiↄnɛ yãa dodo dasi, ↄ̃ aa yã́zɛ ò wá deziↄnɛ dasi, 2 ãma aà Nɛ́ mɛ́ yã'òwɛ̃ɛ gↄↄ gbɛzãɛ beeↄ zĩ́ sa. Nɛ́pi sabai ↄ̃ Lua dṹnia kɛ̀, a dìlɛ ↄ̃mɛ a gↄ̃ pↄ́pii vĩ. 3 Ɔ̃mɛ Lua gawi tɛkɛa ũ, aà kua ũ zálala. Ɔ̃mɛ pↄ́pii kũa ń a yã'oa gbãao. Gbɛ̃́ↄ duunawoloa gbɛa à gɛ̀ zↄ̃̀lɛ musu Zↄ̃ↄde ↄplaai. 4 Lá tↄ́ pↄ́ a blè gbia dɛ malaikaↄ pↄ́a, màa aà zↄ̃ↄ dɛńla lↄ. 5 Lua yã́ɛ bee ò malaikaeɛ yãae?

Ma Nɛ́n n ũ, n Maen ma ũ gbã,*

ge mámɛ máↄ dɛ aà Mae ũ,

aàpi iↄ dɛ ma Nɛ́ ũ.†

6 Kɛ́ Lua tò a yoa mↄ̀ dṹnia guu, à mɛ̀ a malaikaↄ kúlɛɛ̀ píi. 7 Malaikaↄ yã́ musu à mɛ̀,

i a ìwaↄ li ĩ́ana ũ,

i a zĩkɛnapiↄ li tɛ́vua ũ.‡

8 Aà Nɛ́ yã́ musu sↄ̃, à mɛ̀:

Lua, ńyↄ̃ↄ zↄ̃lɛa báawa gↄↄpiiɛ,

niↄ n kíakɛ lípana kũa yã́zɛde ũ.

9 Ń ye maakɛai, ń za vãikɛau.

A yã́i tò Lua, n Lua, n kpa kpalau,

à pↄna pìsima dɛ n gbɛ̃́ↄla.§

10 Wa ò lↄ:

Dii, n tↄↄlɛ kàlɛ asĩnizĩ,

musuá n ↄzĩkɛaɛ.

11 Ampii aa gɛ̃, kási ńyↄ̃ↄ kuɛ.

Aa zikũ lán pↄkasawa,

12 ní ń koo lán pɛwa,

ní ń lilɛ lán pↄkasawa.

Mpi sↄ̃ ńyↄ̃ↄ doũ gↄↄpiiɛ,

n gↄↄ láaa vĩo.*

13 À yã́ɛ bee ò malaikaeɛ yãae?

Zↄ̃lɛ ma ↄplaai

e màↄ n ibɛɛↄ kɛnɛ n gbadibↄ ũ.†

14 Malaikaↄá zĩkɛnaↄnɛ ḿpii, nisĩna pↄ́ Lua ì ń zĩ dↄi gbɛ̃́ pↄ́ aa bↄ ziaↄlɛɛ.

* 1:5 Soũ 2.7 † 1:5 2Sam 7.14 ‡ 1:7 Soũ 104.4 § 1:9 Soũ 45.7-8 * 1:12 Soũ 102.25-27 † 1:13 Soũ 110.1