Bibeli Luayãtaalá Filemↄↄ 1

FILEMƆƆ

Yã́ pↄ́ kú láɛ bee guuↄ

Filemↄↄá Kↄlↄsi Yesude tↄdeɛ mɛ́ Pↄlu gbɛ̃naɛ (dↄ̀ↄ 1). A zↄe vĩ, aà tↄ́n Onɛziũ, à bàalɛ̀ɛ̀. Oneziũ Pↄlu dↄ̃̀ gↄↄ pↄ́ wà Pↄlupi dàkpɛuɛ. À gↄ̃̀ Yesude ũ sↄ̃, ↄ̃ Pↄlu zɛ̀ò à aà kpã́sã a diiɛ, ↄ̃ à láɛ bee kɛ̃̀ɛ̀, à wabikɛ̀wà asu aà si zↄ ũ lↄo, sema aà gbɛ̃do ũ naa Kilisiwa guu, asa wì zↄ pↄ́ bàalɛ̀ swã́gaga pãsĩpãsĩɛ.

Fↄkpaa Filemↄↄwa ń gbɛ̃́ pↄ́ aa kuaànↄↄ gbɛa (1-3), Pↄlu Dii sáaukpà Filemↄↄ luanaaikɛa ń aà ãiao yã́ musu (4-7). Bee gbɛa à Oneziũ pↄ́ lɛ́ tá a diiwa yã'ò (8-22). Lápi làa ń fↄkpaamáo, wà gbɛ̃́ pↄ́ an tↄ́ kú Kↄlↄsideↄ lá guuↄ è we (Kls 4.10, 12, 14). Aasipu (dↄ̀ↄ 2) tↄ́ kú Kls 4.17 guu lↄ.

Wá è lápi guu lá Pↄlu yã'ò a gbɛ̃́ Filemↄↄɛ busɛbusɛ. I yãe dilɛɛ̀o, i giɛ̀ ń Oneziũ zↄbleaɛo. Ãma à yã́ dↄ̀aàgu ń gbɛ̃́ pↄ lɛ́ láɛ bee kyokɛↄ píi, Kilisi yeawázi ì tó wá kua dafukũ, ì tó wà kɛ na ń kↄ̃o lↄ.

Pↄlu Filemↄↄ sáaukpaa

1 Ma Pↄlu, ma gbɛ̃́ pↄ́ wà ma dakpɛu Kilisi Yesu yã́i ń ma gbɛ̃do Timↄteeo, wámɛ wa láɛ bee kɛ̃̀nɛ, wá zĩkɛndee yenzide Filemↄↄ, 2 ń Yesude pↄ́ aaì kↄ̃ kãaa n bɛↄ ń wá nↄɛ yenzide Afiao ń wá zĩ̀kandee Aasipuo. 3 Lua wá Mae ń Dii Yesu Kilisio gbɛ̃kɛkɛnɛ, aai n gba aafia.

4 N yã́ ìↄ dↄmagu gↄↄpii ma wabikɛa Luawa guuɛ, ↄ̃ mi aà sáaukpa, 5 asa ma Dii Yesu náai pↄ́ ńlɛ kɛ bao mà ń n yea Lua gbɛ̃́ↄzio píi. 6 Mi wabikɛwà, kɛ́ n kuawanↄ Yesu zɛ́u a to n wɛ́ kɛ̃́ báaa pↄ́ wá vĩ píi naa Kilisiwa guu. 7 Ma gbɛ̃́, n yeańzi ma pↄ kɛ̀na maamaa, à ma nↄ̀sɛ nìnimɛɛ, asa n Lua gbɛ̃́ↄ sↄ̃ dànɛ́ doũ.

Pↄlu awakpaa Filemↄↄɛ Ɔnɛziũ yã́ musu

8 Ayãmɛto, baa kɛ́ ma zɛ́ kà naa Kilisiwa mà yã́ pↄ́ maa ǹ kɛ dilɛnɛ, 9 ń beeo ma awakpànɛ kɛ́ má yenzi yã́i. Mapi ma Pↄlu, ma maezↄ̃ↄ ia ń ma daakpɛu tia Kilisi Yesu yã́io, 10 ma awakpànɛ Ɔnɛziũ* pↄ́ gↄ̃̀ ma nɛ́ ũ kpɛ́u la yã́ musu. 11 A pãnɛ yãa, ãma tia a ài vĩwɛ̃ɛ, mpi ń mapio. 12 Ma aà gbàɛma, a dɛ ma sↄ̃ ũɛ. 13 Ma kua kpɛ́u Yesu baokpaa yã́i guu, má ye aàↄ ku ma saɛ, kɛ́ aàↄ dↄmalɛ n gbɛu, 14 ãma ma zɛò má yãe kɛ n lɛ́ saio, kɛ́ ńsu yãmaakɛmɛɛ teasio, sema ń pↄeão. 15 Àↄ Ɔnɛziũ kɛ̃ama yãa gↄↄpla dɛ kɛ́ aà ɛa suma àↄ kunnↄ gↄↄpii yã́iɛ. 16 A ɛa àↄ dɛnɛ zↄ ũ lↄo, asa a dɛ zↄa, a dɛ n gbɛ̃́ yenzide ũ naa Kilisiwa guuɛ. Ma gbɛ̃́ yenzideɛ. Wa n gbɛ̃́ pↄ́ a dɛ n zↄ ũ mɛ́ à gↄ̃̀ Dii pↄ́ ũ pↄ́ o lↄa?

17 A yã́i tò, tó n ma dilɛ n gbɛ̃́ ũɛ, gbãakpaaàzi, lá ńyↄ̃ kpamaziwa. 18 Tó à zã̀nɛ yãewa ge tó a n fĩa kũaɛ, bee gↄ̃̀ ma yã́ ũɛ. 19 Ma Pↄlu mámɛ ma yã́ɛ bee kɛ̃̀ ń mazĩa ↄo, má n fĩabonɛ. Kɛ́ ń ma fĩa kũa n misia ũ, má a yã'o lↄo. 20 Too, ma gbɛ̃́, maakɛmɛɛ Dii yã́i, ní ma sↄ̃ damɛɛ doũ wá naa Kilisiwa guu yã́i.

21 Ma lakɛ̃̀nɛ kɛ́ má dↄ̃ ńyↄ̃ ma yãma, mɛ́ ńyↄ̃ kɛ dɛ lá má ònɛa yã́iɛ. 22 Bee gbɛa pilakĩi kɛkɛmɛɛ lↄ, asa má a náai vĩ Lua a ma bↄɛ́ wabi pↄ́ álɛ kɛwà yã́i.

23 Ɛpafa pↄ́ wá sãnu kpɛ́u Kilisi Yesu yã́i fↄkpàma 24 ń ma zĩkɛndeeↄ Maaku ń Alisakao ń Demasio ń Lukuo. 25 Dii Yesu Kilisi gbɛ̃kɛkɛɛ́.