Bibeli Luayãtaalá Ozee 10

10

Isailiↄ kpala midɛa

1 Isailiↄá vɛ̃ɛli ↄtaaɛ yãa,

aaì nɛ'i ńzĩaɛ.

Lá an nɛ́piↄ kↄ̃̀,

màa an sa'okĩiↄ kↄ̃̀.

Lá an bùsu maakũ̀,

màa aa zãblè ń gbɛ̀ tã́aↄwa.

2 Mↄafili ń sↄ̃ pà,

an tàae a wi ń musuɛ sa.

Dii a ń sa'okĩipiↄ gbooɛ,

í ń gbɛ̀ tã́apiↄ wíwi,

3 aai gbasa mɛ: Wá kía vĩo,

kɛ́ wá Dii vĩa vĩo yã́i.

Baa tó wá kía vĩ,

bↄ́ a fↄ̃ wowɛ̃ɛi?

4 Aaì lɛ́ pãↄ gbɛ̃gbɛ̃,

aaì ɛɛↄ tóto,

aaì lɛdoũↄ kɛkɛńnↄ,

ↄ̃ kↄ̃ káalakɛa ì ligua

lán sàpaa dafu kàe nɛ́wa.

5 Samalideↄ mɛ a lua Bɛtavɛ̃ gáae yã́i,

wa ↄ́ↄlↄɛ̀, a sa'onaↄ i búbuapɛ.

A gawi a midɛ,

asa wa símá wà taòɛ.

6 Wa sɛ taò Asili bùsuu falu ũ an kía zↄ̃ↄɛɛ.

Ɛflaiũ buiↄ gɛɛ a gↄ̃ kpá ń wɛ́i,

wí a Isailiↄ kṹ zɛ́ pↄ́ aa sɛ yã́i.

7 Samali bùsu a midɛ,

a kía a gɛ̃zɛa

lán lí miↄna pↄ́ í lɛ́ sɛ́wa.

8 Gulɛsĩ pↄ́ wa bò tã́aↄnɛↄ bãdɛ,

asa a dɛ Isailiↄ duuna ũɛ.

Lɛↄ ń lá ṹadeↄ fɛlɛ da ń sa'okĩipiↄla,

aai o gbɛsiↄnɛ aa lɛ́lɛ simá,

aai o sĩ̀sĩↄnɛ aa kúńla.*

9 Za gↄↄ pↄ́ Isailiↄ duunakɛ̀ Gibɛa, aa zɛ̀òɛ.

Zĩ a yãbɛ̃ɛkɛnapiↄ le Gibɛao lé?

10 Gↄↄ pↄ́ má yei, má ń swã́gagaɛ,

buipãleↄ i mↄ kãaańzi,

aai mↄkamá ń duuna lɛɛ pla yã́i.

11 Ɛflaiũ buiↄá zununuɛ,

wà zĩdàɛ̀, a ye ésegbɛ̃ai.

Má zuudanɛ́ ń nↄɛ maaɛ,

mí tó aa soona gálɛ.

Yudaↄ i sapa,

Yakↄbu buiↄ i gudaaĩ.

12 À maa tↄ̃́, í kɛkɛ gbɛ̃kɛ ũ.

À kpase kɛ̃ wásawasa,†

asa Dii kĩ́i wɛɛlɛa gↄↄ kàɛ,

e aàↄ mↄ ɛ̀fãaiↄ pisiiwá.

13 A vãi tↄ̃̀ á kɛ̀kɛ yãbɛ̃ɛ ũ,

ↄ̃ a blɛ mↄafilidepi blè.

Kɛ́ a ázĩa gbãa náaikɛ̀,

mɛ́ a zɛ ń á zĩgↄ̃ dasiↄ yã́i,

14 wa zĩ̀ zↄadↄwá,

wa á wɛ̃́lɛ bĩ́ideↄ dúuzↄ̃,

lá kí Samana Bɛtaabɛ kàalɛ

à nↄɛↄ ń ń nɛ́ↄ wìwi zĩkagↄↄwa.

15 Màa wa kɛɛ́ Bɛtɛlideↄ,

asa á vãikɛa kɛ̀ zàiɛ.

Tó gu dↄ̀, Isailiↄ kía aↄ ku lↄo.

* 10:8 Luk 23.30, Zia 6.16 † 10:12 Zel 4.3