Bibeli Luayãtaalá Ozee 11

11

Lua yea Isailiↄzi

1 Kɛ́ Isailiↄ dɛ ɛ̀waasona ũ,

ma aà gbɛ̀si Egipi.*

2 Ãma lá málɛ lɛzuńzi,

màa aalɛ zã̀ kũmanↄ.

Aaìↄ sa'o tã́aↄwa,

aaìↄ tulaletikatɛa ń diipiↄnɛ.

3 Mámɛ ma tá dàda Ɛflaiũ buiↄnɛ,

ma ń kpá ma kùɛ,

ↄ̃ aai dↄ̃ kɛ́ mámɛ ma ń gbá aafiao.

4 Ma gbɛ̃kɛ galakpànɛ́,

ma ń gálɛ ń yenzi bao,

ma zuubↄ̀lɛnɛ́,

ma naalɛ ma blɛ kpàmá.

5 Lá aa gì nↄ̀sɛlilɛi,

aa ɛa ta Egipio lé?

Asiliↄ mɛ́ aaↄ kiblemá.

6 Fɛ̃nda a tɛkɛ an wɛ̃́lɛↄ guu,

wa ń bↄlɛ gbã́aↄ wíwi.

Wa ń lɛkpaaĩ gboo,

7 asa ma gbɛ̃́piↄ bↄ̀ ma kpɛ.

Baa tó aalɛ lɛzumazi,

ma Musude, má ń gba gbãao.

8 Ń beeo á Ɛflaiũ buiↄ,

má fↄ̃ ↄkpaázio,

á Isailiↄ, má fↄ̃ mà á kpámáo.

Má fↄ̃ mà kɛɛ́ lá má kɛ̀ Adamaɛwao,

má fↄ̃ mà á baa daaa ń Zeboiũoo.†

Ma nↄ̀sɛlìlɛ á yã́ musu,

ma wɛ̃nadↄ̃aɛ́ fɛ̀lɛ.

9 Má ɛa Ɛflaiũ buiↄ ásookɛ lↄo,

má pↄkũma pãsĩ bↄbↄmáo,

asa Luan ma ũ,

i kɛ gbɛ̃nazĩnan ma ũo.

Lua pↄ́ a kua adoan ma ũ á guu,

má mↄ́ á kaalɛio.

10 Má pala lán nↄ̀ↄmusuwa,

aai tɛmazi.

Tó ma pala,

ma nɛ́piↄ bↄ bɛ'aɛ oi,

aai mↄ ma kĩ́i ń lualuao.

11 Aa bↄ Egipi ń lualuao lán bãↄwa.

Aa bↄ Asili bùsuu lán felenaↄwa,

mí ń kálɛ ń bɛ.

Ma Dii mámɛ má ò.

* 11:1 Bↄa 4.22, Mat 2.15 † 11:8 Iko 29.23