Bibeli Luayãtaalá Mise 3

3

Isaili dↄaanaↄ lelea

1 Ɔ̃ ma ɛa ma mɛ̀:

À swã́kpa á Yakↄbu bui kíaↄ,

á Isaili kpalablenaↄ!

I kũ àↄ yã́zɛde dↄ̃o lé?

2 Á za maau, á ye vãizi,

i ma gbɛ̃́ↄ báa bo,

i ń báasi wolo ń wáwa.

3 I ń mɛbaasi só,

i ń báa wolo ń mɛwa,

i ń wáↄ wíwi,

i ń nↄ̀ↄ fùukɛ dàau,

i tↄɛtↄɛ ka do'oou.

4 Tó aa wiilɛ̀a sa, má wemáo.

Gↄↄ bee má wɛsɛ mà ń kĩ́i gwao

yãvãi pↄ́ aa kɛ̀ yã́i.

5 Yã́ pↄ́ Dii òn kɛ, à mɛ̀:

Ãnabi pↄ́ aaì ma gbɛ̃́ↄ sã́sãↄ,

tó aa pↄ́ è aa sò,

aaì mɛ aafia aↄ ku.

Tó aai pↄ́ e aa dà lɛ́ɛo sↄ̃,

aaì mɛ aa zĩ̀ sↄukɛ.

6 A yã́i tò gwãasĩna a kúlɛwá,

wɛ́pungu'ea aↄ kuo.

Gusia a daálaɛ,

màsokɛa aↄ ku lↄo.

Ĩatɛ̃ a gɛ̃ ãnabipiↄnɛ kpɛ́u,

fãanɛ aↄ sianɛ́.

7 Wí a gu'enaↄ kṹ,

màsokɛnaↄ gɛɛ a gↄ̃ kpá ń wɛ́i.

Ampii aa ↄku ń lɛ́wa,

kɛ́ málɛ wemáo yã́i.

8 Mapi sↄ̃, gbãa mↄ̀a

Dii Nisĩna pↄ́ ũ.

Yã́zɛde dɛ̀dɛa ń ikoo

kɛ́ mà Yakↄbu buiↄ tàaeↄ onɛ́,

mà to Isailiↄ ń duuna dↄ̃.

9 À yã́pi ma á Yakↄbu bui kíaↄ,

á Isaili kpalablenaↄ!

Á ye yã́zɛde gĩyãio,

i yã́ pↄ́ zɛvĩ fuangbaɛ.

10 I Siↄna kã́fĩ ń gbɛ̃dɛao,

i to Yelusalɛũ zↄ̃ↄkũ ń yãdↄↄsaio.

11 A kíaↄ ì yã́gↄ̃gↄ̃ gbagusaɛ yã́i,

a sa'onaↄ ì yãdadanɛ́ ài'ea yã́i,

a ãnabiↄ ì màsokɛ ↄ̃a yã́i.

Ɔ̃ aaì Dii tↄ́ sɛ́ aa mɛ:

Dii kú wá guuo lé?

Yã́ a wá leo.

12 A yã́i wa Siↄna sa pa bugbɛ ũɛ,

Yelusalɛũ i gↄ̃ bɛzia ũ,

Lua kpɛ́ sĩ̀sĩ i gↄ̃ sĩ̀sĩ líkpɛde ũ.*

* 3:12 Zel 26.18