Bibeli Luayãtaalá Mise 4

4

Dii gbɛ̀sĩsĩ

(Isa 2.1-4)

1 Gↄↄgbɛzãzĩ

gbɛ̀sĩsĩ pↄ́ Dii kpɛ́ kuwà

a gↄ̃ gbɛ̀sĩsĩↄ mide ũ.

Wa sɛ lɛsĩ dɛ sĩ̀sĩↄla,

bui píi i siu we.

2 Buiↄ gɛ́ we dasi, aai mɛ:

À mↄ wà dɛdɛ Dii gbɛ̀sĩsĩwa,

wí gɛ́ Yakↄbu buiↄ Lua kpɛ́u,

i wá da a zɛ́wa, wíↄ bɛu.

Dii ikoyã a bↄ Siↄna,

aà yã́ a bↄ Yelusalɛũ.

3 A yã́gↄ̃gↄ̃ buiↄnɛ,

a yãkɛkɛ bùsu zã̀zã pↄ́ gbãa vĩↄnɛ,

aai ń fɛ̃ndaↄ gbɛ̃gbɛ̃ aa lilɛ soona ũ,

aai ń sↄ̃naↄ lilɛ máaso limibobↄ ũ.*

Buie a fɛ̃nda sɛ a deezio,

wa zĩkaa dada lↄo.†

4 Baade a zↄ̃lɛ a vɛ̃ɛli

ń a kaadↄɛnlio gbáu,‡

gbɛ̃e a vĩadadańzi lↄo,

asa Dii Zĩgↄ̃de lɛ́ mɛ́ ò.

5 Bui píi ìↄ kú ń ń tã́a tↄ́o,

wápiↄ sↄ̃, Dii wá Lua tↄ́ wáↄ kuò gↄↄpii.

6 Dii mɛ̀:

Gↄↄ bee má a gbɛ̃́ tↄ̃̀ↄlɛnaↄ kãaa,

má a gbɛ̃́ pↄ́ ma ĩadàmá ma ń yápiↄ naaa.

7 Má a gbɛ̃́ pↄ́ lɛ́ tↄ̃ↄlɛpiↄ kɛ ma gbɛ̃́ kↄ̃naↄ ũ,

má a gbɛ̃́ pↄ́ wà tàńnↄ zã̀piↄ kɛ bui gbãa ũ.

Za gↄↄ bee máↄ kiblemá

Siↄna gbɛ̀sĩsĩ musu e gↄↄpii.

8 Siↄna gbɛ̀sĩsĩá ma kpàsa dã́dãkɛgbaɛ,

aà kpala káau a ɛa suwà,

wiↄ kible Yelusalɛũ.

9 Bↄ́yãi álɛ búbuapɛi?

Kɛ́ á kía vĩo yã́i yã̀?

Á lɛdamade kuo,

ↄ̃ wãwã á kṹ lán nɛ'iwãwãwaa?

10 Siↄnadeↄ, à fĩaafĩaa ń wãwão

lán nↄɛ pↄ́ lɛ́ nɛ'iwa,

asa á bↄlɛ á wɛ̃́lɛ guu

à kálɛ sɛ̃uɛ, í tá Babɛli.

We Dii a á misiu,

we a á bↄu á ibɛɛↄ ↄzĩ.

11 Tia kɛ́wa buiↄ kãaaaázi,

aa mɛ̀ wa Siↄna ↄ̃̀ↄkpa,

wiↄ gwa wàↄ pↄnakɛ.

12 Aa Dii làasoo dↄ̃o,

aa yã́ pↄ́ àlɛ yá gbadↄ̃o,

asa à ń kãaa lán pↄ́ bàaawa pↄ́wɛngbɛ̃zɛuɛ.

13 Siↄnadeↄ, à fɛlɛ pↄgbɛ̃!

Má tó àↄ gbãa

lán zu pↄ́ a kↄ́ba dɛ mↄ ũ

mɛ́ a swɛ dɛ mↄgotɛ̃ ũwaɛ,

í bui dasipiↄ úlↄ.

Á ń pↄ́ pↄ́ aa è gbɛ̃blea guu kpaa,

an àizɛɛↄ i gↄ̃ mapi ma dṹnia Dii pↄ́ ũ.

14 Wɛ̃́lɛ bĩ́ideↄ, à á zĩgↄ̃ↄ kãaa,

asa wà koezↄ̃̀áziɛ.

Wa Isailiↄ dↄaana lɛ́ ń goo a gɛɛwa.

* 4:3 Yoɛ 4.10 † 4:3 Isa 2.2-4 ‡ 4:4 Zkl 3.10