Luda yã takada kũ Bisã yão Yonɑsi 1

YONASI

Tɔn dɑbirɑ tɑ Yonɑsin gɑri yɛ̃. Yonɑsi u ǹ kɑ Gusunɔn sɔmɔ goo weenɛ. Domi Gusunɔ u nùn sɔ̃ɔsi mɑ hɑnduniɑgibu kpurowɑ u kĩ, n ǹ mɔ Isirelibɑ tɔnɑ. Yen sɔ̃nɑ u nùn gɔrɑ u dɑ u Ninifugibu wɑɑsu kuɑ bu kɑ gɔ̃ru gɔsiɑ. Adɑmɑ Yonɑsi u yinɑ. Domi Ninifugii be, bɑ sɑ̃ɑwɑ Isirelibɑn yibɛrɛ kpokobɑ. Adɑmɑ Gusunɔ u nùn tilɑsi kuɑ u kɑ dɑ.

Tire ten gɑri yi sun gɔ̃ru gɔsiɑbun ɑrufɑɑni sɔ̃ɔmɔ. Yesu u Yonɑsin gɑri yi suɑ u kɑ win seebu gɔrin din gɑri tubusiɑ, Mɑteu 12:38-42.

Tire ten kpunɑɑ

1. Yonɑsin mɛm nɔɔbu sɑriru, wiru 1.

2. Yonɑsin kɑnɑru, wiru 2.

3. Yonɑsin wɑɑsu Ninifuɔ, wiru 3.

4. Gusunɔn durom Ninifugibun sɔ̃, wiru 4.

Yonɑsi u kookɑri kuɑ

u kɑ Gusunɔ dukɑ suuri

1 Sɔ̃ɔ teeru, Yinni Gusunɔ u Yonɑsi, Amitɑin bii sɔ̃ɔwɑ u nɛɛ, 2 Yonɑsi, ɑ seewo ɑ dɑ Ninifu wuu mɑro bɔkɔ gen mi. Kpɑ ɑ nɔɔgiru suɑ ɑ bu gerusi. Domi ben nuku kɔ̃suru tɑ bɑndɑ sere tɑ mɑn girɑri.

3 Adɑmɑ Yonɑsi u seewɑ u dukɑ suɑ u Tɑɑsisin swɑɑ wɔri, u wɑ u kɑ Yinni Gusunɔ tondɑ. Mɑ u dɑ Yɑfoɔ u goo nimkuu duɑ. Mɑ u yen dɑɑbun gobi kɔsiɑ. Nge mɛyɑ u kɑ Tɑɑsisin swɑɑ wɔri wi kɑ tɔn be bɑ dɔɔ Tɑɑsisi mi sɑnnu u wɑ u kɑ Yinni Gusunɔ tondɑ.

4 Adɑmɑ Yinni Gusunɔ u derɑ woo bɔkɔ gɑ seewɑ nim wɔ̃ku gen mi. Mɑ n sɑ̃ɑre goo ge, gɑ koo nim diirɑ. 5 Be bɑ goo ge tɛmɑmɔ, bɑ bɛrum soorɑ. Mɑ ben bɑɑwure u win bũu soku. Mɑ bɑ goo gen sɔmunu kɑwɑ bɑ sure nim wɔ̃kuɔ gen bunum mu kɑ kɑɑrɑ. Adɑmɑ Yonɑsi u dɑ u kpĩ u dò mɑm mɑm sere goo gen sɔɔwɔ. 6 Mɑ goo gen tɛmɔ tɔnwero u susi u Yonɑsi yɑmiɑ u nùn bikiɑ u nɛɛ, mbɑn sɔ̃nɑ ɑ dò. A seewo ɑ wunɛn bũu soku. Sɔrɔkudo u koo sun yɑɑyɑ kpɑ sɑ kun kɑm kue.

7 Mɑ bɑ gerunɑ bɑ nɛɛ, i nɑ su tubu tubu ko kpɑ su kɑ giɑ wìn sɔ̃ kɔ̃sɑ yeni yɑ sun deemɑ.

Yerɑ bɑ tubu tubu ye kuɑ. Mɑ yɑ Yonɑsi di. 8 Yerɑ bɑ nùn bikiɑ bɑ nɛɛ, ɑ sun sɔ̃ɔwɔ wi u sun kɔ̃sɑ yeni kpɑremɔ. Mɑn diyɑ ɑ wee. Amɔnɑ wunɛn yĩsiru. Bwese terɑ̀ ɑ sɑ̃ɑ. Sɔmbu teren sɔ̃nɑ ɑ wɑ̃ɑ mini.

9 Mɑ Yonɑsi u bu wisɑ u nɛɛ, nɑ sɑ̃ɑwɑ Heberu. Yinni Gusunɔwɑ nɑ rɑ sɑ̃ wi u wɔllu kɑ tem kɑ nim wɔ̃ku tɑkɑ kuɑ.

10-11 Yerɑ tɔn be, bɑ nɑndɑ ye bɑ giɑ mɑ Yonɑsi u Yinni Gusunɔ dukɑ suurimɔwɑ domi win tii u bu sɔ̃ɔwɑ mɛ. Mɑ bɑ nùn bikiɑ bɑ nɛɛ, mbɑn sɔ̃nɑ ɑ kuɑ mɛ. Amɔnɑ sɑ ko nun kuɑ nim mɛ, mu kɑ kpunɑ.

N deemɑ nim mɛ, mu seemɔ mu dɔɔwɑ. 12 Mɑ u bu wisɑ u nɛɛ, i mɑn suo i kpɛ̃ɛ nim wɔ̃ku ge sɔɔ. Sɑɑ yerɑ nim mɛ, mu koo mɑri. Domi nɑ yɛ̃ mɑ nɛn sɔ̃nɑ woo bɔkɔ geni gɑ seewɑ.

13 Kɑ mɛ, goo tɛmɔ be, bɑ seewɑ bɑ hɑniɑ mɔ̀ bu kɑ turi nim mɛn goorɔ. Adɑmɑ bɑ kpɑnɑ. Domi nim mɛ, mu seewɑwɑ. 14 Yerɑ bɑ Yinni Gusunɔ sokɑ bɑ nɛɛ, Yinni Gusunɔ, ɑ ku sun kpeerɑsiɑ tɔnu winin wɑ̃ɑrun sɔ̃. A ku sun wi u kun sun gɑ̃ɑnu kuen yɛm sɔbi. Domi ɑ rɑ kowɑ ye ɑ kĩ.

15 Yerɑ bɑ Yonɑsi suɑ bɑ kpɛ̃ɛ nim wɔ̃ku ge sɔɔ. Sɑɑ yerɑ gɑ kpunɑ sɛ̃ɛ. 16 Yerɑ tɔn be, bɑ Yinni Gusunɔ nɑsiɑ, bɑ nùn yɑ̃kuru kuɑ. Mɑ bɑ nɔɔ mwɛɛru kuɑ mɑ wiyɑ bɑ koo sɑ̃.