2
Yonɑsin kɑnɑru
swɑ̃ɑn nukurɔ
1 Yinni Gusunɔ u derɑ swɑ̃ɑ bɑkɑ yɑ Yonɑsi mwɛ. Mɑ u kuɑ wɔ̃kuru itɑ kɑ sɔ̃ɔ sɔɔ itɑ swɑ̃ɑ yen nukurɔ.
2 Swɑ̃ɑ yen nukurun diyɑ Yonɑsi u Gusunɔ win Yinni kɑnɑ.
3 U nɛɛ,
Yinni Gusunɔ, sɑnɑm mɛ nɑ wɑ̃ɑ nuku sɑnkirɑru sɔɔ,
nɑ nun nɔɔgiru sue, mɑ ɑ mɑn wisɑ.
Sɑɑ gɔribun wɑ̃ɑ yerun di nɑ nun sokɑ.
Mɑ ɑ nɛn nɔɔ nuɑ.
4 Wee ɑ mɑn kpɛ̃ɛ sere nim wɔ̃kun sɔɔwɔ.
Mɑ nim mɑn mwɛ.
Nim kurenu kpuro mɑn tɑɑre.
5 Nɑ rɑɑ tii sɔ̃ɔmɔ nɑ mɔ̀, wee ɑ mɑn girɑ wunɛn wuswɑɑn di,
nɑ dɑ sere mi n tomɑ.
Adɑmɑ wee tɛ̃, kon mɑɑ wunɛn sɑ̃ɑ yee dɛɛrɑru wɑ.
6 Nim mɑn mwɛ sere nɑ kĩ n gbi.
Mu mɑn wukiri, mɑ yɑkɑ si su wɑ̃ɑ mɛn sɔɔwɔ
su mɑn tɛ̃kusi sere wirɔ.
7 Nɑ numɑ nɑ dɑ sere guunun kpɛɛkpɛɛkuɔ,
mɑ tem sɔɔwɔn gɑmbobɑ bɑ mɑn kɛnusi dim dim.
Adɑmɑ Gusunɔ nɛn Yinni, ɑ mɑn yɑrɑ min di wɑsiru.
8 Sɑnɑm mɛ nɑ kom yɑɑ biɑ
nɑ wunɛ Yinni Gusunɔ yɑɑyɑ,
mɑ ɑ nɛn kɑnɑru nuɑ wunɛn sɑ̃ɑ yee dɛɛrɑrun mi.
9 Be bɑ bũnu sɑ̃ɑmɔ, bɑ ǹ mɑɑ wunɛn durom wɑsi.
10 Adɑmɑ nɛ, kon nun yɑ̃kuru kuɑ.
Kon nun siɑrɑ,
kpɑ n nɛn nɔɔ mwɛɛru yibiɑ.
Yinni Gusunɔ, wunɑ ɑ rɑ mɑn fɑɑbɑ ko.
11 Sɑɑ yerɑ Yinni Gusunɔ u swɑ̃ɑ ye sɔ̃ɔwɑ u nɛɛ, yu doo yu Yonɑsi siɑ kɑsɑɔ. Mɑ swɑ̃ɑ ye, yɑ dɑ kɑsɑɔ yɑ Yonɑsi siɑ.