3
Kunna kↄ̃o
1 Nↄgbɛ̃nↄ sↄ̃, à á zĩda kpá á zãnↄa. Tó ń gbɛ̃kenↄ tɛn Luda yã daro, á kunna ni ń litɛ. Bee tó ádi yãke ońnɛro,
2 oni e kũ á kun gbãsĩ sari, akũsↄ̃ a á zĩda kpàḿma.
3 Àsun tó á nↄmanakɛ gↄ̃ mɛ̀ yã ũro, mìtãna ke nↄmanablebↄnↄ ke pↄ́kasadanaan yá.
4 Ama àgↄ̃ de á nɛ̀sɛgũnyã kũ àdi lákaro ũ, nɛ̀sɛyĩda kũ zĩdabusanaao. Abirekũ mɛ́ à bɛ̀ɛrɛ vĩ Ludanɛ.
5 Zaakũ lɛn nↄgbɛ̃ donyĩri kũ ń wɛ́ dↄ Ludai yãnↄ ń zĩda kɛ̀kɛ lɛ, ò ń zĩda kpà ń zãnↄa.
6 Lɛn Sara de lɛ, àdi Ibrahĩ yã ma, àdi a sísi Baa. Tó átɛn yã mana kɛ, tó átɛn pↄ́ kũ òdi vĩna kɛnɛ yã daro, a Sara dàa sɛ̀n gwe.
7 Gↄ̃gbɛ̃nↄ sↄ̃, àgↄ̃ kú kũńwo nↄgbɛ̃kɛ dↄ̃nnɛnaa gũn, àgↄ̃ yã maḿma, de pↄ́ke sún kpáárɛ á aduakɛnaa gũnlo, zaakũ á de wɛ̃̀ndi gbablerinↄ ũ lɛɛlɛmɛ.
8 Abire gbɛra àgↄ̃ lɛ́dokↄ̃nↄ vĩ kↄ̃o á pínki. Àgↄ̃ kↄ̃ wɛ̃nda dↄ̃, àgↄ̃ yekↄ̃i, àgↄ̃ gbɛ̃kɛ vĩ kↄ̃o, à busakↄ̃nɛ.
9 Àsungↄ̃ a vãni fĩna bo kũ a vãnioro. Àsungↄ̃ gbɛ̃ kũ à á sↄ̃sↄ̃ sↄ̃sↄ̃ro. À sa mana onɛ, zaakũ Luda á sisi de à arubarika daágu yãimɛ.
10 Gbɛ̃ kũ à ye àgↄ̃ kú nnamanan,
akũsↄ̃ à ye a kunna gↄ̃ mana,
à a lɛ́ kũ kũ yãvãni'onaao,
àsun tó ɛ́kɛ bo a lɛ́nlo.
11 Ade kpɛ li a vãninɛ, à a mana kɛ,
à aafia zɛ́ wɛtɛ àgↄ̃ tɛ́i.
12 Zaakũ Dikiri dìgↄ̃ gbɛ̃ mananↄ tàasi ká,
a sã kpá ń aduakɛnaai,
ama àdi mìkpɛrɛ zu yãvãnikɛrinↄnɛ.
Wɛ́tãmmana yãmanakɛna yãi
13 Tó á kokari vĩ kũ yãmanakɛnaao, dí mɛ́ ani wɛ́ tãáwaa?
14 Bee tó a wari kɛ̀ yãmanakɛna yãi, á arubarika vĩ. Àsungↄ̃ vĩna kɛ ń wɛ́tãmmanaanɛro, àsun tó á swɛ̃̀ kɛ̃águro.
15 À Kirisi dↄ̃ Dikiri ũ á swɛ̃̀ɛ gũn. Àgↄ̃ kú soru gũn gↄrↄ sĩnda pínki, de à le à yã we gbɛ̃ kũ àtɛni á la yã kũ á wɛ́ dↄii mìiia.
16 Àgↄ̃ ońnɛ busɛbusɛ kũ bɛ̀ɛrɛlinnɛnaao. À ońnɛ kũ nɛ̀sɛpurao dↄ, de wé'i gbɛ̃ kũ òtɛni á sↄ̃sↄ̃ á yãmanakɛna Kirisi gũnnↄ kũ.
17 Warikɛna Luda pↄyenyĩnaa gũn yãmanakɛna yãi mana de warikɛna yãvãnikɛna yãila.
18 Kirisi gà gɛ̃̀n do durunnakɛ̃mmana yãi. Taarisaride gà ókↄ̃nↄ taaridenↄ yãi, de à le à gɛ́ kũoo Luda kĩnaa. Ò a dɛ̀ mɛ̀ɛ gũn, akũ Luda a vù ninikɛ gũn.
19 A ninikɛ pìi gũn à gɛ̀ɛ à waazi kɛ̀ gyãwãnde kũ ò ń ká kpɛ́sirannↄnɛ.
20 Ò bò Luda yã kpɛmɛ yã, gↄrↄ kũ à mɛna ari Nuhu gɛ̀ɛ à gó'itɛ kɛ̀ à làkao. Gbɛ̃ kũ ò bò ín aafia gó pì gãinↄn dasiro, gbɛ̃nↄn sↄraakↄ̃.
21 Í pì mɛ́ à de á da'itɛkɛna kũ àdi á sura ba tera taka ũ. Da'itɛkɛnaa pì bi mɛ̀ gbãsĩworona yãnlo, lɛ́sɛna Ludanɛ kũ nɛ̀sɛpuraomɛ. Àdi ń sura ba, kũ Yesu Kirisi bò gan yãi.
22 À gbãna blè malaikanↄa kũ tãnanↄ kũ ń gbãnadenↄ kũ ń ikodenↄ, akũ à tà ludambɛ, à kú Luda ↄplai.