4
Bona kunna zĩn
1 Lákũ Kirisi wari kɛ̀ a mɛ̀n nà, ákↄ̃nↄ se à nɛ̀sɛ bire buri sɛ́, zaakũ gbɛ̃ kũ à wari kɛ̀ a mɛ̀n, ade mìi kɛ̃̀ durunnaamɛ.
2 Gↄrↄ kũ à gↄ̃̀árɛ á kunnaa gũn, á dà vãni súngↄ̃ doárɛ arɛ doro, séde Luda pↄyenyĩnaa.
3 Á kunna kifirinↄ yãkɛnaa gũn yã mↄ̀ lɛ. Yã á kú wé'isariyãkɛnaa gũn kũ dàvãninidɛnaao kũ wɛ̃dɛkɛnaao kũ pãpã kↄ̃kↄ̃o kũ wɛ̃mikↄ̃kↄ̃ bɛ̃̀nɛɛo kũ tãnagbagbana kũ Luda zã̀aguo.
4 Kũ adì kakara kũńwo ń pãpã zↄ̃kↄ̃ↄ pì kɛnaa gũn doro, àdi kɛńnɛ yãbonsarɛ ũ, akũ òdi á tↄ́ vãni sí.
5 Oni ń yãkɛnanↄ baba Ludanɛ, kũ à yãkpatɛkɛna kũ gbɛ̃ bɛ̃nɛnↄ kũ gyãwãndenↄ soru kɛ̀.
6 Ò baaru nna kpà bee gyãwãnde pìnↄnɛ se, de ò le ògↄ̃ kú ninikɛ gũn lán Luda bà, bee kũ yã vùtɛḿma mɛ̀ɛ gũn lán gbɛ̃ sĩnda pínki bà.
Ludayãmarinↄ
7 Pↄ́ sĩnda pínki lakanaa kà kãni. Abire yãi àgↄ̃ de laakaridenↄ ũ, àgↄ̃ á zĩda kũna dↄ̃ de àgↄ̃ adua kɛ yãi.
8 Yã kũ à de a pínkilan dí: Àgↄ̃ yekↄ̃i kũ nɛ̀sɛ mɛ̀n doo, zaakũ yenyĩ dì pↄ́ kútɛ durunnanↄa dasi.
9 À yàri kɛkↄ̃nɛ yãketekanaa sari.
10 Lákũ Luda gba dà á baadinɛ nà, à kpákↄ̃i kũ gba pìnↄ Luda gba buri donadona zĩkɛri mananↄ ũ.
11 Gbɛ̃ kũ à de waazikɛri ũ, à Luda yã ońnɛ. Gbɛ̃ kũ à de kpanyĩri ũ, à kpáńyĩ kũ gbãna kũ Luda a gbào, de à Luda tↄ́ kpá yã sĩnda pínki gũn Yesu Kirisi gãi. Àkũ mɛ́ à gakuri vĩ kũ gbãnao gↄrↄ sĩnda pínki! Aami.
Warikɛna Yesudekɛ yãi
12 Ma gbɛ̃ yenyĩdenↄ, àsun tó yↄ̃ogwana pãsĩ kũ àtɛni á le bo á sarɛ lákũ yã dufu mɛ́ à á lé bàro.
13 Lákũ á bàka kú Kirisi warikɛnaa gũn nà, à pↄnna kɛo de à le àgↄ̃ pↄnna zↄ̃kↄ̃ vĩ gↄrↄ kũ Kirisi pì ni bo gupuraa kũ gakurio.
14 Tó ò á sↄ̃sↄ̃ Kirisi tↄ́ kũ à kúáwa yãi, á arubarika vĩ, zaakũ Luda Nini gakuride kúáwa.
15 Á gbɛ̃ke sún wari kɛ gbɛ̃dɛna ke kpãni'ona ke yãbɛ̃nɛkɛna ke gudɛ yãiro.
16 Tó a wari kɛ̀ á Yesudekɛ yãi, àsun kɛárɛ wé'iyã ũro. À Luda sáabu kpá kũ Yesu tↄ́ kúáwa yãi.
17 Zaakũ wɛ́tãmmagↄrↄ kà, Luda gbɛ̃nↄn à nàa kũńwo. Lákũ ókↄ̃nↄmɛ à nàa kũoo káaku nà, ani láka kũ gbɛ̃ kũ ò gì Luda baaru nna mainↄo deramɛɛ?
18 Zaakũ gbɛ̃ mananↄ surabana zĩ'ũ,
yã ni bo kũ ludayãdarisarinↄ kũ durunnakɛrinↄo deramɛɛ?
19 Abire yãi gbɛ̃ kũ òtɛn wari kɛ Luda pↄyenyĩnaa gũnnↄ ń zĩda na ń Kɛ̀ri náanidenɛ a ↄĩ, ò kpɛ́ ògↄ̃ yã mana kɛ.