15
Cũai Ntrớu Têq Sang Toam Yiang Sursĩ?
1 Yiang Sursĩ ơi! Noau têq mut tâng Dống Sang Toâr anhia?
Cớp noau têq ỡt tâng cóh Si-ôn la ntốq sang toam anhia?
2 Yiang Sursĩ ta‑ỡi neq: “Cũai tỡ bữn lôih ntrớu nheq dỡi tamoong án.
Án táq ranáq tanoang o níc, cớp táq ntỡng ŏ́c pĩeiq ca loŏh tễ mứt pahỡm.
3 Án tỡ bữn apớt cũai canŏ́h.
Án tỡ bữn táq ranáq tỡ o chóq yớu, tỡ la voŏq sâuq yớu.
4 Khân cũai aléq Yiang Sursĩ pai loâi, án pruam ngkíq tê,
ma án khễn cũai ca ngcŏh Yiang Sursĩ.
Án táq yỗn moâm dũ ramứh án khoiq par‑ữq tễ nhũang,
tỡ bữn tếng lớp lơi.
5 Án yỗn cũai canŏ́h mian práq, ma án tỡ bữn ĩt lơi ntrớu tễ cũai ki.
Án tỡ bữn ĩt práq noau chang ễq án tũn apớt cũai tỡ bữn táq lôih ntrớu.”
Cũai aléq ma táq tapun máh santoiq ki,
cũai ki lứq bữn mứt pahỡm sabớng o mantái níc.