6
Daniɛli zuna músunↄ wɛ̀ɛn
1 À kà Dariusunɛ à bùsu gbãadeenↄ diɛ gↄ̃ↄn baswɛɛdo, ben à ń díɛdiɛ a bùsun píngi.
2 À gↄ̃ↄn aagↄ̃ↄ dìɛ ń gbɛ̃nsinↄ ũ. Daniɛli nɛ́ gↄ̃ↄn aagↄ̃ↄ pìnↄ dokemɛ. Bùsu gbãadeenↄ è ń yãnↄ tↄ̃kɛ̃ gbɛ̃ pìnↄnɛ, lɛ wàton ásaru kɛ kínanɛro yãnzi.
3 Daniɛli ↄ̃ndↄ̃ↄ wɛ́ɛbↄna dɛ gbɛ̃nsinↄla kↄ̃n bùsu gbãadeenↄ ń píngi, ben kína zɛ̀o à à diɛ a bùsu gbɛ̃nsi ũ.
4 Ben gbɛ̃nsinↄ kↄ̃n bùsu gbãadeenↄↄ e zɛ́ wɛtɛɛ wà yãke ea kpata kɛ̀ à blè yã musu, mↄde à taari vĩro, aↄ̃ↄe yãke earo, zaakɛ à náanɛ vĩ a yãkɛna guu píngi. È pã kpá yãkeziro è sãsã yãkearo.
5 Ben aↄ̃ bè: Wé yãkee e Daniɛliaro, tó èe kɛ à Luda doka musu baasiro.
6 Ben gbɛ̃nsinↄ kↄ̃n gbãadeenↄ mì pɛ̀kↄ̃rɛ aↄ̃ gàa wà kína lè wà bè: Kí Dariusu, wà n dↄ̃ kↄ̃n aafiao!
7 Wamↄwa gbɛ̃nsinↄ kↄ̃n kínanↄ kↄ̃n zĩ̀kpɛ gbɛ̃nsinↄ kↄ̃n gbãadeenↄ kↄ̃n lɛ́dammarinↄ kↄ̃n n ìbanↄ ń píngi, wa lɛ́ kpàkↄ̃sↄ̃ wá è à maa ǹ yã kɛ̀ diɛ ǹgↄ̃ zĩi kɛɛa. Gurↄ baaakuri daguran tó gbɛ̃ wɛ́ɛ kɛ̀ dii kea ke gbɛ̃nteen yoo, tó èe kɛ mpi baasiro, wà adee sɛ́ wà zu músunↄ wɛ̀ɛn.
8 Kí, ǹ yã pì diɛ sa ǹ ↄ da takada kɛ̀n, lɛ gbɛ̃ke tón yã pì liɛro yãnzi. Eégↄ̃ dɛ Midiãnↄ kↄ̃n Pɛsianↄ doka kɛ̀ weé fↄ̃ wà gbororoo ũ.
9 Ben kí Dariusu yã pì dìɛ à a ↄↄ dà takadan.
10 Kɛ̀ Daniɛli mà wà yã pì dìɛ, à tà bɛ. À kpɛ́ kɛ̀ kú musu windonↄↄ aɛ dↄ Yerusalɛmua wɛ̃wɛ̃na. Ben à kùɛ à adua kɛ̀ à Luda sáabu kpà, lán è kɛ nà lán guu e dↄↄ nà gɛ̃̀n aagↄ̃gↄ̃.
11 Ben gbɛ̃ pìnↄ mì pɛ̀kↄ̃rɛ aↄ̃ gàa wà à è èe adua kɛɛ èe dↄnlɛ wɛ́ɛ kɛɛ Ludaa.
12 Ben aↄ̃ gàa wà kína lè yã kɛ̀ à dìɛ pì musu wà bè: N yã dìɛ n bè ai gurↄ baaakuri dagura gbɛ̃ kɛ̀ wɛ́ɛ kɛ̀ dii kea ke gbɛ̃nteen yoo, tó èe kɛ mpi baasiro, weé adee sɛ́ wà zu músunↄ wɛ̀ɛ guumɛ. Ben kína bè: Yã pì seka vĩro, à gↄ̃̀ Midiãnↄ kↄ̃n Pɛsianↄ doka kɛ̀ weé fↄ̃ wà gbororoo ũmɛ.
13 Ben aↄ̃ bènɛ: Yudanↄ bùsu zĩ̀zↄ Daniɛli è n yã daro ke yã kɛ̀ ń dìɛ pì. Ègↄ̃ adua kɛɛ lán guu e dↄↄ nà gɛ̃̀n aagↄ̃gↄ̃mɛ.
14 Kɛ̀ kína yã pì mà, à kɛ̀nɛ zaa maamaa. À zɛ̀o à Daniɛli mì sí, ben èe à bↄna zɛ́ wɛtɛɛ ai ↄfãntɛ̃ gàa à gɛ̃̀o kpɛ́n.
15 Ben gbɛ̃ pìnↄ ɛ̀ara wà pɛ̀kↄ̃rɛ wà gàa wà kína lè wà bè: Kí, ń Midiãnↄ kↄ̃n Pɛsianↄ doka dↄ̃, wà bè yã kɛ̀ kína dìɛ kↄ̃n yã kɛ̀ à gìzio liɛna vĩro.
16 Ben kína bè wà mↄ́ kↄ̃n Daniɛlio wà à zu músunↄ wɛ̀ɛn. Kína bè Daniɛlinɛ: N Luda kɛ̀ nɛɛ̀gↄ̃ dↄnzi kɛɛnɛ gurↄ píngi n bↄ!
17 Kɛ̀ wà à zù wɛ̀ɛ pì guu, wà gbɛ̀ sɛ̀ wà tàta wɛ̀ɛ pì lɛ́a, ben kína sèeda kɛ̀a kↄ̃n a tãngao kↄ̃n a bùsu gbãadeenↄ tãnganↄ, lɛ gbɛ̃ke tón yãke liɛ Daniɛli musuro yãnzi.
18 Ben kína tà bɛ à gì pↄ́ ble gwãavĩ beeeazi, bensↄ̃ èe a nↄgbɛ̃ ke yã gbekaro. Èe fↄ̃ à ii òro.
19 Kɛ̀ guu dↄ̀, guwɛɛ e kɛ̃ɛ, ben kína pì fɛ̀ɛ à gàa músunↄ wɛ̀ɛ pì kiia kpakpaa.
20 Kɛ̀ à sↄ̃̀ wɛ̀ɛ pìzi, à lɛ́ zù Daniɛlizi kↄ̃n pↄsiaao à bè: Daniɛli, Daniɛli, Luda Wɛ̃̀ndide zↄ̀bleri! N Luda kɛ̀ nɛɛ̀gↄ̃ dↄnzi kɛɛnɛ gurↄ píngi fↄ̃̀ à n bↄ músunↄ lɛ́zĩↄ́?
21 Daniɛli wèàla à bè: Luda n dↄ̃ aafiao Zaaki!
22 Ma Luda a malaika zĩ̀, à mↄ̀ à músunↄ lɛ́ nàkↄ̃a, aↄ̃ↄe ma kɛ̃nnaro, zaakɛ ma dɛnɛ taarisaidee ũ. Kí, mɛ́ɛ taari ke kɛnnɛ zikiro.
23 Kína pↄↄ kɛ̀ nna maamaa, ben à bè wà Daniɛli gá wà à bↄ wɛ̀ɛ pì guu. Kɛ̀ wà à bↄ̀, wèe e à kɛ̃̀nna gukearo kɛ̀ à Luda náanɛ kɛna yãnzi.
24 Ben kína bè wà mↄ́ kↄ̃n gbɛ̃ kɛ̀ aↄ̃ yã dì Daniɛlianↄ, ben wà ń zúzu wɛ̀ɛ pì guu se kↄ̃n ń nɛ́nↄ kↄ̃n ń naↄ̃nↄo. Ai aↄ̃gↄ̃ gá tↄↄtɛ le, músunↄ ń dã aↄ̃ ń kũkũ aↄ̃ ń wánↄ wìwi píngi.
25 Kí Dariusu takada kɛ̃̀ gbɛ̃ kɛ̀ aↄ̃ↄ kú a bùsu guunↄnɛ ń píngi kↄ̃n bori sãnda píngio à bè: Àgↄ̃ kú aafiao maamaa!
26 Ma yã kɛ̀ dìɛ ma bùsu gbɛ̃ pínginɛ, kɛ̀ aↄ̃gↄ̃ Daniɛli Luda vĩa vĩ aↄ̃ dↄnzi kɛnɛ. Zaakɛ Luda Wɛ̃̀ndide kɛ̀ kuu gurↄ píngin à ũ. À kpata yãana vĩro, ègↄ̃ kí blee gurↄ píngimɛ.
27 È gbɛ̃ mì sí è ń bↄ. È dabuyãnↄ kↄ̃n yãbↄnsaɛnↄ kɛ musu kↄ̃n tↄↄtɛo. Àmbe à Daniɛli bↄ̀ músunↄ lɛ́zĩ.
28 Daniɛli gbãaa è Dariusu kíblegurↄ kↄ̃n Pɛsia bori Sirusu kíblegurↄↄo.