Luda yã takada kↄ̃n Bokobaru yão DANIƐLI 7

Daniɛli wɛ́ɛgupu'ena pↄ́ bɛ̃ɛ mɛ̀n siigↄ̃ↄnↄ yã musu

1 Babilↄnu kí Bɛlisaza kíblena wɛ̃̀ káaku guu Daniɛli wɛ́ɛgupu è, à yãke è a laasuu guu gurↄↄ kɛ̀ à daɛna a gádoa, ben à wɛ́ɛgupu pì yã kɛ̃̀ takadan à à yã mìnↄ ò. 2 Daniɛli bè: Mɛ́ɛ guu gwaa wɛ́ɛgupu'ena guu gwãavĩ, ben ma ludambɛ ĩa mɛ̀n siigↄ̃ↄ è, aↄ̃ↄe kakaa ísia bítala. 3 Ben pↄ́ bɛ̃ɛ bíta mɛ̀n siigↄ̃ↄnↄ bↄ̀ ísiaan, aↄ̃ borii bↄ̀ doodo. 4 À káakudee bↄ̀ lán músu kɛ̀ à kúu dɛ̀bɛnↄ vĩi bà. Kɛ̀ mɛ́ɛ gwaa, wà à dɛ̀bɛ wòwoa, ben wà à sɛ̀ wà zɛ̀ à gbá plaaaa lán gbɛ̃ntee bà, ben wà gbɛ̃ntee swɛ̃̀ dànɛ. 5 Ben ma pↄ́ bɛ̃ɛ plaadee è, à bↄ̀ lán kpera bà. À gɛɛkɛsɛkɛna, gbã̀ntɛ̃wa mɛ̀n aagↄ̃ kpana à lɛ́zĩ. Ben wà bènɛ à fɛɛ à nↄ̀bↄ só maamaa. 6 Beee gbɛra ma guu gwà, ben ma pↄ́ bɛ̃ɛ pãnde è, à bↄ̀ lán gbèka bà. À dɛ̀bɛ vĩ a kpɛɛa lán bãa bà mɛ̀n siigↄ̃ bensↄ̃ à mì vĩ mɛ̀n siigↄ̃. Wà à kpà kpatan. 7 Beee gbɛra kɛ̀ mɛ́ɛ guu gwaa wɛ́ɛgupu pì guu gwãavĩ lɛ, ma pↄ́ bɛ̃ɛ siigↄ̃dee è, è tó vĩa gbɛ̃ kũ ai swɛ̃̀ kɛ̃n. À gbãaa sáa vĩro. À swaa nɛ́ mↄ̀simɛ bensↄ̃ à bíta, è pↄ́ sóo, à wíwi, è kɛ̀sɛ pɛ́ɛpɛɛ à kpaaa kɛ̀ gↄ̃̀a. À bↄ̀ ado kↄ̃n pↄ́ bɛ̃ɛ kɛ̀ aↄ̃ dↄ̀nɛ aɛnↄ. À koba mɛ̀n kuri. 8 Kɛ̀ mɛ́ɛ laasuu lɛɛ à koba pìnↄ yã musu, ben ma koba pãnde è, à nɛ́ngo èe bↄↄ ń tɛ́, ben koba káaku mɛ̀n aagↄ̃ↄnↄ wòwo aↄ̃ guu bↄ̀nɛ. Má è koba nɛ́ngo pì wɛ́ɛ vĩ lán gbɛ̃ntee pↄ́ bà. À lɛ́ vĩ dↄ kɛ̀ ègↄ̃ wada yã oo.

9 Kɛ̀ mɛ́ɛ gwaa, má è wà kíblekitanↄ kàɛ, ben Tontoride mↄ̀ à vɛ̃̀ɛa. À pↄ́kãsãanↄ dɛ pú fénfen lán buu bà, à mìkã dɛ lán sãkã bà. À kíblekita dɛ tɛ́nɛnɛ ũ, à górogbanↄ vĩ aↄ̃ↄe tɛ́ bↄↄ. 10 Tɛ́ bↄ̀ à gĩzĩ èe bàa lɛɛ à aɛ lán swaa bà. Gↄ̃ↄn bↄrↄ lɛo bↄrↄ e ìba bleenɛ, gbɛ̃ kɛ̀ aↄ̃ↄ zɛna à aɛnↄ kà gↄ̃ↄn miliↄ̃ basↄↄro. Yãkpaɛkɛrinↄ vɛ̃̀ɛ, ben wà takadanↄ wɛ̃̀wɛ̃. 11 Ben má kpɛ́ mɛ́ɛ tàasi kɛɛ wada yã kɛ̀ koba pì e oo yãnzi, ben má kpɛ́ mɛ́ɛ gwaa ai wà gàa wà pↄ́ bɛ̃ɛ pì dɛ̀ wà à gɛ̀ dúgu zↄ̃̀ wà sɛ̀ wà zù tɛ́n. 12 Wà pↄ́ bɛ̃ɛ pãndenↄ bↄ̀ kpatan, mↄde wà ń tó wɛ̃̀ndio ai gurↄ plaa.

13 Kɛ̀ mɛ́ɛ guu gwaa gwãavĩ wɛ́ɛgupu pì guu lɛ, ben ma pↄ́ è lán gbɛ̃ntee nɛ́ bà, èe mↄↄ ludambɛ luguun. Kɛ̀ à kà, ben wà à kpan'aɛ kɛ̀ wà gàao Tontoride kiia. 14 À à kpà kpatan à iko kpàa kↄ̃n gakuio, ben baade píngi dↄnzi kɛ̀nɛ, bùsu píngi gbɛ̃ kↄ̃n bori sãnda píngio. À iko égↄ̃ kuu gurↄ píngi à yãana vĩro, à kpata é mì dɛ zikiro.

Wɛ́ɛgupu bↄkↄ̃tɛna

15 Mamↄma Daniɛli ma pↄↄ yàka. Yã kɛ̀ mɛ́ɛ ee ma laasuu guu tò swɛ̃̀ kɛ̃̀magu. 16 Ma sↄ̃ gbɛ̃ kɛ̀ aↄ̃ↄ zɛna gweenↄ dokezi ma yã pìnↄ yãpuraa gbèkaa píngi. Ben à yã òmɛ à yã pìnↄ bↄ̀kↄ̃tɛmɛ. 17 Pↄ́ bɛ̃ɛ bíta mɛ̀n siigↄ̃ↄ pìnↄ nɛ́ kpata mɛ̀n siigↄ̃ↄ kɛ̀ aↄ̃é bↄ anduna guunↄmɛ. 18 Mↄde Luda Musude gbɛ̃nↄ bé wé kpata sí wà ble aↄ̃égↄ̃ vĩ gurↄ píngi, kpata pì égↄ̃ yãana vĩro. 19 Beee gbɛra má yezi mà yãpuraa dↄ̃ pↄ́ bɛ̃ɛ siigↄ̃de yã musu. À taka bↄ̀ ado kↄ̃n pↄ́ bɛ̃ɛ kpaaanↄmɛ, è tó vĩa gbɛ̃ kũ dɛ à kpaaanↄla. À swaa nɛ́ mↄ̀simɛ, à ↄnkↄkↄ nɛ́ mↄ̀gotɛ̃mɛ, è pↄ́ só à wíwi è kɛ̀sɛ pɛ́ɛpɛɛ à kpaaa kɛ̀ gↄ̃̀a. 20 Má yezi mà koba mɛ̀n kuri kɛ̀ aↄ̃ↄ kú à mìanↄ yáasi dↄ̃ dↄ kↄ̃n koba kɛ̀ bↄ̀ ben koba mɛ̀n aagↄ̃ↄnↄ wòwo wà guu tònɛo. Koba pì wɛ́ɛ vĩ kↄ̃n lɛ́o, è wada yã o, à zɛna gbãa dɛ à kpaaanↄla. 21 Kɛ̀ má kpɛ́ mɛ́ɛ gwaa, koba pì e zĩ̀ kaa kↄ̃n Luda gbɛ̃nↄ èe ń fuu. 22 Ben Tontoride pì mↄ̀ à yã nnaa kpà a gbɛ̃ pìnↄa, zaakɛ kpata gↄ̃na Luda Musude gbɛ̃nↄ pↄ́ ũ gurↄↄ bé à kà.

23 Wà bèmɛ lán kɛ̀ bà. Pↄ́ bɛ̃ɛ mɛ̀n siigↄ̃dee pì nɛ́ kpata siigↄ̃dee kɛ̀ eé bↄ anduna guumɛ. À taka bↄ̀ ado kↄ̃n kpata kpaaanↄ, eé da andunala píngi à kɛ̀sɛ pɛ́ɛpɛɛa à wíwi. 24 Koba mɛ̀n kuri pìnↄ nɛ́ kpata pì kína gↄ̃ↄn kuri kɛ̀ aↄ̃é kí bleenↄmɛ. Kína kɛ̀ bↄ̀ adona kↄ̃n à káakupↄnↄ é fɛɛ ń gbɛra eé kí gↄ̃ↄn aagↄ̃ↄnↄ bↄ kpatan. 25 Eé Luda Musude tↄ́ zaaa sí eé gbãa mↄ́ à gbɛ̃nↄnɛ eé wɛtɛ à zĩbaa gurↄↄnↄ kↄ̃n doka kɛ̀ Ludaa dìɛnↄ liɛ. Wà Luda gbɛ̃nↄ nànɛ à ↄzĩ wɛ̃̀ aagↄ̃ kↄ̃n a kusuo. 26 Mↄde yãkpaɛkɛrinↄ é vɛ̃ɛ aↄ̃ à bↄ kpatan, aↄ̃é kpata pì mì dɛ míↄmiↄ ai gurↄ píngi 27 gbasa wà anduna kpata píngi kíkɛ kↄ̃n ikoo kↄ̃n bítakɛɛo kpá Luda Musude gbɛ̃nↄa. À kpata pì nɛ́ kpata kɛ̀ eé yãaromɛ, kpatablerinↄ é dↄnzi kɛnɛ aↄ̃é mì siɛnɛ ń píngi. 28 Yã pì lɛ́n gwe. Mamↄma Daniɛli, ma laasuunↄↄ tò vĩa ma kũ maamaa, ma uu lìɛ, ben má yã pì kũna ma swɛ̃̀n.