Luda yã takada kↄ̃n Bokobaru yão DANIƐLI 8

Sãkaro swèekɛna kↄ̃n blèkofĩio

1 Bɛlisaza kíblena wɛ̃̀ aagↄ̃dee guu mamↄma Daniɛli ma wɛ́ɛgupu è à kɛ̀ má è káaku baasi. 2 Mɛ́ɛ guu gwaa ma wɛ́ɛgupu'ena pì guu, ben má è má kú kíbɛ Susa wɛ́tɛdaan Elamu bùsun. Má kú swaa kɛ̀ wè be Ulai saɛ. 3 Ma wɛ́ɛ sɛ̀ ma guu gwà, ben ma sãkaro è zɛna swaa pì lɛ́a. À koba vĩ mɛ̀n plaa. Aↄ̃ↄ gbã̀a, mↄde à doo gbã̀a dɛ à doola, à kɛ̀ gbã̀a pì bↄ̀ zãamɛ. 4 Ma sãkaro pì gwà, èe sↄ̃ dadaa ↄfãntɛ̃gɛ̃kpɛn kpa kↄ̃n gu'igbãroo kpaao kↄ̃n sↄↄmɛtɛ kpaao, èe koba máɛmaɛɛ. Nↄ̀bↄ kee e fↄ̃ à zɛ̀ à gìnɛro, gbɛ̃kee e fↄ̃ à bↄ̀ à gbãaa ↄzĩro. Ègↄ̃ a zĩnda pↄyezi kɛɛmɛ, ben à a zĩnda sɛ̀ lezĩ.

5 Mɛ́ɛ laasuu lɛɛ yã pìa, ben ma blèkofĩi è bↄna ↄfãntɛ̃gɛ̃kpɛn kpa, à bà andunala píngi à gbá e pɛ́ɛ tↄↄtɛro. À koba bíta vĩ a wɛ́ɛgbãtãn. 6 À gàa sãkaro kɛ̀ zɛna swa lɛ́a pì kiia, ben à kúu òa kↄ̃n pↄfɛ̃ pãsĩo. 7 Kɛ̀ má è à sùzi kↄ̃n pↄfɛ̃o lɛ, à à gbɛ̃̀gbɛ̃ ai à à koba mɛ̀n plaaa pìnↄ ɛ̀'ɛ, ben sãkaro pì e fↄ̃ à pɛ̀aro. Blèkofĩi à nɛ̀ à kɛ̀sɛ pɛ̀ɛpɛɛa, gbɛ̃kee e fↄ̃ à à bↄ̀ à ↄzĩro. 8 Ben blèkofĩi a zĩnda dì, mↄde kɛ̀ à pɛ̀ɛ maamaa, à koba bíta pì ɛ̀, ben koba pãndenↄ bↄ̀ɛ wà kpà mɛ̀n siigↄ̃ à gɛ̃ɛ ũ, aↄ̃ lɛ́ dↄdↄ anduna gooda siigↄ̃ↄnↄa.

9 Koba pìnↄ doke gbã̀dã nɛ́ngo bↄ̀, ben à bíta kũ̀ maamaa. À gàa sↄↄmɛtɛ kpa kↄ̃n ↄfãntɛ̃bↄɛ kpaao kↄ̃n bùsu maaa kpaao. 10 À bíta kũ̀ ai à gàa pɛ́ ludambɛ zĩ̀kpɛɛnↄa, ben à sↄsↄnɛ kenↄ wòro à ń kwɛ́ɛ tↄↄtɛ à kɛ̀sɛ pɛ̀ɛpɛɛḿma. 11 À a zĩnda sɛ̀ à kɛ̀ sáa kↄ̃n zĩ̀kpɛɛ pìnↄ Kínao. À saa kɛ̀ wègↄ̃ ooa lán guu e dↄↄ nà mì dɛ̀ à à kúkii kɛ̀ bɛzĩ ũ. 12 Wà zĩ̀kari pìnↄ nànɛ à ↄzĩ kↄ̃n saa kɛ̀ wègↄ̃ oo lán guu e dↄↄ nào bↄnkpɛɛyã kɛ̀ wà kɛ̀ yãnzi, ben à yãpuraa pã̀ɛ tↄↄtɛ. Yã kɛ̀ à kɛ̀ píngi bↄ̀ maa. 13 Ben má mà malaika e yã oo, ben malaika pãnde à là à bè: Wɛ́ɛgupu'ena yã pì é gá kɛ ai bↄrɛmɛ? Saa kɛ̀ wègↄ̃ oo lán guu e dↄↄ nà yã pì kↄ̃n bↄnkpɛɛyã kɛ̀ è guu yaka pìo kↄ̃n Luda kpɛ́ kpaḿmanao kↄ̃n kɛ̀sɛpɛɛpɛɛna zĩ̀kpɛɛ pìnↄao. 14 Ben à bèmɛ: Eégↄ̃ gaa ai gurↄ wàa kuri awɛɛdo kpɛ́ basↄↄro sa'ona kↄngↄ kↄ̃n uusiɛo gbɛra, Luda kpɛ́ é gbasa à bↄ maa.

Wɛ́ɛgupu bↄkↄ̃tɛna

15 Gurↄↄ kɛ̀ mamↄma Daniɛli mɛ́ɛ wɛ́ɛgupu pì ee lɛ, mɛ́ɛ zɛ́ wɛtɛɛ mà à yáasi dↄ̃, ben ma pↄ́ke è zɛna ma aɛ à bↄ̀ lán gↄ̃gbɛ̃ bà. 16 Ben ma gbɛ̃ntee kòto mà bↄna Ulaizi à lɛ zù à bè: Gabliɛli, ǹ wɛ́ɛgupu kɛ̀ gbɛ̃ pì è bↄkↄ̃tɛnɛ. 17 À sↄ̃̀mazi ma zɛkiia. Kɛ̀ èe mↄↄ, vĩa ma kũ, ben ma daɛ ma puua. À bèmɛ: Gbɛ̃ntee nɛ́, ǹgↄ̃ dↄ̃ kɛ̀ wɛ́ɛgupu kɛ̀ ń è dɛ andunayãagurↄ yã ũmɛ. 18 Gurↄↄ kɛ̀ èe yã oomɛ, ii ma kũ gbãa, má daɛna ma puua. Ben à ↄ nàma à ma fɛɛ à ma zɛ. 19 À bè: Mɛ́ɛ yã kɛ̀ eé mↄ́ Luda pↄfɛ̃pitammagurↄ ziakpɛɛ zĩ oonnɛmɛ, zaakɛ andunayãagurↄ yãmɛ. 20 Sãkaro kobamɛmplaadee kɛ̀ ń è pì dɛ Midiãnↄ kↄ̃n Pɛsia kínanↄ ũmɛ. 21 Blèkofĩi sↄ̃ nɛ́ Girisi kpatamɛ. Koba bíta kɛ̀ dↄ à wɛ́ɛgbãtãn dɛ à kína káaku ũ. 22 Koba mɛ̀n siigↄ̃ↄ kɛ̀ aↄ̃ bↄ̀ɛ koba kɛ̀ ɛ̀ gɛ̃ɛ ũu pì nɛ́ kpata mɛ̀n siigↄ̃ↄ kɛ̀ aↄ̃é bↄɛ à borii guunↄmɛ, mↄde aↄ̃ gbãaa é ká lán à bàro.

23 Aↄ̃ kíblena gurↄ zãa zĩ, tó aↄ̃ taarikɛna lɛ́ kà, kína uu fɛ̃kpana mↄnafikide kàsara é fɛɛ. 24 À gbãaa é kaara, èe kɛ kↄ̃n à zĩnda gbãaaonlo. À pↄ́kaatɛna é swɛ̃̀ kɛ̃ńgu. Yã kɛ̀ eé kɛ píngi égↄ̃ papanamɛ, eé gↄ̃sagbãaanↄ kↄ̃n Luda gbɛ̃nↄ dúgu zↄ̃. 25 À ↄ̃ndↄ̃ↄ guu à mↄnafiki égↄ̃ papanamɛ, eégↄ̃ daa a ka. Tó gbɛ̃nↄ yãke dↄ̃naro, ben eé ń dúgu zↄ̃ paripari eé fɛɛ kↄ̃n kínanↄ Kínao. Weé à kaatɛ, mↄde gbɛ̃ntee ↄↄnlo.

26 Sa kↄngↄ kↄ̃n sa uusiɛo ogurↄ wɛ́ɛgupu kɛ̀ ń è nɛ́ yãpuraamɛ. Ǹ yã pì ká takadan, zaakɛ eé kɛ ziakpɛɛ zĩmɛ. 27 Mamↄma Daniɛli ma gbãaa yã̀a, ben ma gyãa kɛ̀ gurↄ plaa. Kɛ̀ ma fɛɛ, ma ɛara ma zĩi kɛ̀ kínanɛ. Ma bídi kɛ̀ wɛ́ɛgupu kɛ̀ má è pì yãa, mɛ́ɛ à bↄkↄ̃tɛna dↄ̃ro.