Luda yã takada kↄ̃n Bokobaru yão BƆNA 6

Dii lɛ́gbɛ̃na Musanɛ Isarailinↄ mìsina yã musu

1 Ben Dii bènɛ: Nɛ́ yã kɛ̀ mɛ́ kɛ Fili'aunanɛ e tia. Eé ń gbarɛ ma gbãa bíta yãnzi. Eé pɛ́ḿma a bùsun ma gbãa bíta yãnzi. 2 Ben Luda ɛ̀ara à yã ò Musanɛ à bè: Mámbe Dii ũ, 3 ma bↄ ma mↄ Ibraĩ kↄ̃n Isaakuo kↄ̃n Yakubuozi Luda Gbãapingide ũ, mↄde aↄ̃ↄe ma dↄ̃ ma tↄ́ Diiaro. 4 Ma bà kúńyo, ma bè mɛ́ Kanaa bùsu kɛ̀ aↄ̃ↄ kú à guu gbɛ̃ zĩ̀tↄ ũ kpáḿma. 5 Ma Isarailinↄ mbona mà aↄ̃ zↄ̀blena Igipitinↄnɛ yãnzi, ben ma bà kɛ̀ kúńyo pì yã e sãmaguro. 6 Beee yãnzi ǹ o Isarailinↄnɛ kɛ̀ mámbe Dii ũ. Mɛ́ a bↄ zĩ gbãaa kɛ̀ Igipitinↄↄ dàaree guu, mɛ́ a bↄ zↄ̀bleen. Mɛ́ yãkpaɛ kɛńyo mà a bↄ kↄ̃n ma gã̀sã gbãaao. 7 Mɛ́ a sɛ́ ma gbɛ̃nↄ ũ, mɛ́gↄ̃ dɛ a Luda ũ, égↄ̃ dↄ̃ kɛ̀ mámbe Dii a Luda kɛ̀ à a bↄ Igipiti zĩ gbãaa guu ũ. 8 Mɛ́ gáao bùsu kɛ̀ ma à lɛ́ gbɛ̃̀ Ibraĩnɛ kↄ̃n Isaakuo kↄ̃n Yakubuo guu. Mɛ́ a gba àgↄ̃ vĩ. Mámbe Dii ũ.

9 Musa yã pì ò Isarailinↄnɛ, mↄde aↄ̃ↄe à yã maro kɛ̀ zↄ̀zĩ pãsĩ ń mɛ̀ yↄ̀ yãnzi. 10 Ben Dii ò Musanɛ à bè: 11 Ǹ gá ǹ o Igipiti kí Fili'aunanɛ à Isarailinↄ gbarɛ aↄ̃ bↄɛ a bùsun. 12 Ben Musa wè Diila à bè: Lán Isarailinↄ è ma yã maro nà, mamↄma kɛ̀ ma lɛ́ tìisi, dian Fili'auna é ma yã ma nà?

Musa kↄ̃n Arunao bori bↄzia

13 Dii yã ò Musanɛ kↄ̃n Arunao Isarailinↄ yã musu kↄ̃n Igipiti kínao, à òńnɛ aↄ̃ bↄɛ kↄ̃n Isarailinↄ Igipiti. 14 Aↄ̃ bori uabɛde káakunↄ tↄ́n yɛ̀. Isaraili daudu Rubɛni nɛ́gↄ̃gbɛ̃nↄn yɛ̀: Anↄku, Palu, Ɛzɛrↄnu, Kaami. Rubɛni boriinↄn gwe danɛdanɛ. 15 Simɛↄ nɛ́gↄ̃gbɛ̃nↄn yɛ̀: Yemuɛli, Yami, Oada, Yakĩ, Zoa kↄ̃n Kanaa nↄgbɛ̃ nɛ́ Soluo. Simɛↄ boriinↄn gwe danɛdanɛ. 16 Levi nɛ́gↄ̃gbɛ̃nↄ tↄ́n yɛ̀ aↄ̃ boriinↄa: Gɛsↄnu, Koa, Mɛrari. Levi kɛ̀ wɛ̃̀ baswɛɛdo akuri awɛɛswɛɛplaamɛ. 17 Gɛsↄnu nɛ́gↄ̃gbɛ̃nↄn yɛ̀ aↄ̃ boriinↄa danɛdanɛ: Libini kↄ̃n Simɛio. 18 Koa nɛ́gↄ̃gbɛ̃nↄ tↄ́n yɛ̀: Amlamu, Iza, Ɛblↄnu, Uziɛli. Koa kɛ̀ wɛ̃̀ baswɛɛdo akuri awɛɛ'aagↄ̃mɛ. 19 Mɛrari nɛ́gↄ̃gbɛ̃nↄn Mali kↄ̃n Musio ũ. Levi boriinↄn gwe danɛdanɛ.

20 Amlamu a dasɛ̃ Yↄkɛbɛdi sɛ̀ nↄↄ ũ, ben à Aruna kↄ̃n Musao ìo. Amlamu kɛ̀ wɛ̃̀ baswɛɛdo akuri awɛɛswɛɛplaamɛ. 21 Iza nɛ́gↄ̃gbɛ̃nↄn Kora kↄ̃n Nɛfɛgio kↄ̃n Zikirio ũ. 22 Uziɛli nɛ́gↄ̃gbɛ̃nↄn Misaili kↄ̃n Ɛlɛzafão kↄ̃n Sitirio ũ. 23 Aruna Aminadabu nɛ́ Ɛlisɛba, Nasↄ̃ dãre sɛ̀ nↄↄ ũ, ben à Nadabu kↄ̃n Abiuo kↄ̃n Ɛlɛazao kↄ̃n Itamao ìo. 24 Kora nɛ́gↄ̃gbɛ̃nↄn Asi kↄ̃n Ɛlɛkanao kↄ̃n Abiasafao ũ. Kora boriinↄn gwe danɛdanɛ. 25 Aruna nɛ́ Ɛlɛaza Putiɛli nɛ́nↄgbɛ̃nↄ doke sɛ̀ nↄↄ ũ, ben à Finɛasi ìo. Levi bori uabɛde káakunↄn gwe danɛdanɛ.

26 Aruna kↄ̃n Musa kɛ̀ Dii òńnɛ aↄ̃ Isarailinↄ bↄɛ Igipiti gãli kↄ̃n gãlion gwe. 27 Aↄ̃pinↄ bé wà yã ò Igipiti kí Fili'aunanɛ lɛ aↄ̃ Isarailinↄ bↄɛ Igipiti. 28 Kɛ̀ Dii yã ò Musanɛ Igipiti, 29 à bè ambe Dii ũ, yã kɛ̀ ée oonɛn à o Fili'aunanɛ píngi. 30 Ben Musa bènɛ a lɛ́ tìisi, dian Fili'auna é a yã ma nà?