7
Kisia mɛ̀n kuri zĩna Igipitia
1 Ben Dii bè Musanɛ: Ǹ gwa! Ma n kɛ lán ma bà Fili'aunanɛ, bensↄ̃ n vĩ̀i Aruna dɛ n lɛ́gbɛkpari ũ.
2 Ǹ yã kɛ̀ má ònnɛ píngi o n vĩ̀i Arunanɛ, eé o Fili'aunanɛ à Isarailinↄ gbarɛ aↄ̃ bↄɛ a bùsun.
3 Baa kↄ̃n beeeo mɛ́ à kùgbãa kũ. Mɛ́ sèedanↄ kↄ̃n dabuyãnↄ kɛ Igipiti pari,
4 mↄde Fili'auna é a yã maro. Mɛ́ ↄ tↄ̃ Igipitia mà yãkpaɛ kɛńyo pãsĩpãsĩ, mɛ́ bↄ kↄ̃n ma zĩ̀kpɛ Isarailinↄo.
5 Tó ma bↄ ma gbãaao Igipitia, mɛ́ Isarailinↄ bↄɛn, Igipitinↄ é dↄ̃ sa kɛ̀ mámbe Dii ũ.
6 Ben Musa kↄ̃n Arunao kɛ̀ lán Dii òńnɛ nà.
7 Gurↄↄ kɛ̀ aↄ̃ yã ò Fili'aunanɛ, Musa kuu wɛ̃̀ basiigↄ̃, Aruna sↄ̃ wɛ̃̀ basiigↄ̃ awɛɛ'aagↄ̃.
8 Ben Dii bè Musanɛ kↄ̃n Arunao:
9 Tó Fili'auna dabuyã gbèkamma, ǹ o Arunanɛ à a gò sɛ́ à pãɛ à aɛ, eé li mlɛ̃̀ ũ.
10 Kɛ̀ Musa kↄ̃n Arunao gàa Fili'auna kiia, aↄ̃ↄ kɛ̀ lán Dii òńnɛ nà. Aruna a gò sɛ̀ à pã̀ɛ Fili'auna kↄ̃n a ìbanↄ aɛ, ben à lì mlɛ̃̀ ũ.
11 Ben Fili'auna Igipiti wɛ́ɛzɛ̃rinↄ kↄ̃n ɛ̃zɛ̃deenↄ sìsi, ben aↄ̃ dabuyã dↄ̃nkↄ̃ pìnↄ kɛ̀ se ń ɛ̃zɛ̃dekɛɛ guu.
12 Kɛ̀ aↄ̃ baade a gò pã̀ɛ, ben aↄ̃ gò pìnↄ lì mlɛ̃̀nↄ ũ, ben Aruna gò ń pↄ́nↄ mↄ̀mↄ.
13 Fili'auna swã gbãa, èe ń yã maro lán Dii ò nà.
Ínↄ lina aru ũ
14 Dii bè Musanɛ: Fili'auna kù gbãa à gì gbɛ̃nↄ gbarɛzi.
15 Ǹ gá ǹ à le zia kↄngↄ gurↄↄ kɛ̀ èe gaa swaazi. Ǹgↄ̃ à dãa Nili saɛ gwe. Ǹgↄ̃ n gò kɛ̀ lì mlɛ̃̀ ũu pì kũna.
16 Ǹ benɛ mamↄma Dii Eberunↄ Luda ma n zĩa, ń ònɛ à ma gbɛ̃nↄ gbarɛ aↄ̃ gá dↄnzi kɛmɛ gbáan, mↄde ai tia à gìmazi.
17 Mamↄma Dii ma bè, yã kɛ̀ eé tó àgↄ̃ dↄ̃ kɛ̀ mámbe Dii ũun yɛ̀. Tó n Nili í lɛ̀ kↄ̃n gò kɛ̀ ń kũnao, eé li aru ũ.
18 Kpↄ̀ kɛ̀ aↄ̃ↄ kú í pì guunↄ é gaga, Nili í é gũu sↄ̃, Igipitinↄ é fua wà mi.
19 Ben Dii ɛ̀ara à bè Musanɛ: Ǹ o Arunanɛ à a gò sɛ́ à dↄ Igipiti ínↄla, aↄ̃ swaanↄ kↄ̃n ń swa'ↄnɛnↄ kↄ̃n ń íbↄkiinↄ kↄ̃n ń íkakiinↄ píngi é gↄ̃ aru ũ. Aru égↄ̃ dagula Igipiti, baa kpɛ̃ɛnↄ kↄ̃n orozã guunↄ.
20 Ben Musa kↄ̃n Arunao kɛ̀ lán Dii òńnɛ nà. Aruna a gò pì sɛ̀, à Nili í lɛ̀o Fili'auna kↄ̃n a ìbanↄ wáa, ben í pì gↄ̃̀ aru ũ píngi.
21 Kpↄ̀ kɛ̀ aↄ̃ↄ kú à guunↄ gàga, ben Nili í pì gũu sↄ̃̀, Igipitinↄ fùa wà mi. Aru dagula Igipiti.
22 Igipiti ɛ̃zɛ̃deenↄↄ kɛ̀ lɛ se ń ɛ̃zɛ̃dekɛɛ guu, ben Fili'auna kùgbãa kũ̀, èe ń yã maro lán Dii ò nà.
23 Fili'auna lìara à tà a bɛ, èe yã pì da sero.
24 Igipitinↄ íbↄkii yↄ̃̀yↄ̃ Nili baa lɛ wà í mi, zaakɛ aↄ̃ↄe fↄ̃ wà swada í mìro.
25 À kuu lɛ ai gurↄ swɛɛplaamɛ Dii Nili lɛna gbɛra.