12
Isarailinↄ bↄna Reoboamu kpɛɛ
1 Reoboamu gàa Sɛkɛmu, zaakɛ gwen Isaraili bori píngi gàan lɛ wà à ká kí ũ.
2 Kɛ̀ Nɛbati nɛ́ Yeroboamu à baaru mà, ben à bↄ̀ Igipiti à sù, zaakɛ gwen à kún zaa gurↄↄ kɛ̀ à bàa sì Sulemanunɛ.
3 Ben Isaraili kɛ̀ aↄ̃ kↄ̃ kàkↄ̃a pìnↄ à sìsi, ben aↄ̃ gàa wà yã ò lɛdo kↄ̃n Reoboamuo wà bè:
4 N de zĩ gbãaa dàwe pãsĩpãsĩ. Mmↄn sↄ̃, ǹ zĩ gbãaa pì kↄ̃n aso tìisi kɛ̀ à dìweeo lago, wé mì siɛnnɛ.
5 Ben à wèńla à bè: À tá gĩa ai gurↄ aagↄ̃, gbasa à ɛara à mↄ́. Ben aↄ̃ tà.
6 Kí Reoboamu yã pì gbã̀ gbɛ̃nsi kɛ̀ aↄ̃ↄ dɛ a de Sulemanu ìba ũunↄnɛ à bè: Yã kpareen á è à maa mà sí gbɛ̃ pìnↄlaa?
7 Ben aↄ̃ wèàla wà bè: Tó n mì sìɛńnɛ gbã̀a, ben n yã maaa sìńla, aↄ̃égↄ̃ dɛ n zↄ̀blerinↄ ũ gurↄ píngi.
8 Ben Reoboamu gì gbɛ̃nsi pìnↄ lɛ́dammazi, à gàa à yã pì gbã̀ a ìba gↄ̃kparɛ kɛ̀ aↄ̃ nɛ́ blè lɛdoonↄnɛ.
9 À ń lá à bè: Gbɛ̃ kɛ̀ aↄ̃ bèmɛ mà zĩ gbãaa kɛ̀ ma dee dàńnɛ lagońnɛ pìnↄ, yã kpareen á è à maa wà síńlaa?
10 Ben gↄ̃kparɛ pìnↄ wèàla wà bè: Gbɛ̃ kɛ̀ aↄ̃ bènnɛ n de aso tìisi dìńnɛ ǹ lagońnɛ pìnↄ, ǹ ońnɛ n ↄnɛzãa gbère dɛ n de piila.
11 N de aso tìisi dìńnɛ, mmↄn sↄ̃, nɛ́ asoo pì kaarańnɛ. N de wɛ́ɛ tã̀ḿma kↄ̃n flã̀omɛ, mↄde flã̀ lɛ̀deen nɛ́ wɛ́ɛ tãoḿma.
12 À gurↄ aagↄ̃dee zĩ Yeroboamu kↄ̃n Isarailinↄ ɛ̀ara wà mↄ̀ wà Reoboamu lè ń píngi, lán à òńnɛ nà à bè, aↄ̃ ɛara wà mↄ́ gurↄ aagↄ̃ↄ gbɛra.
13 Ben kína gì gbɛ̃nsinↄ lɛ́dammazi à yã wèńla pãsĩpãsĩ.
14 À tɛ̀ gↄ̃kparɛnↄ lɛ́dammazi à bè: Aso tìisin ma dee dìare, mamↄma sↄ̃ mɛ́ asoo pì kaaraaremɛ. Flã̀n ma de wɛ́ɛ tã̀oawa, mapi sↄ̃, flã̀ lɛ̀deen mɛ́ wɛ́ɛ tãoawa.
15 Ben kína gì Isarailinↄ yã mazi, zaakɛ yã pì bↄ̀ Dii kiiamɛ, lɛ yã kɛ̀ à ò Nɛbati nɛ́ Yeroboamunɛ annabi Ahia, Silo gbɛ̃ gãzĩ e à kɛ yãnzi.
16 Kɛ̀ Isarailinↄↄ è kína gì ń yã mazi, aↄ̃ bènɛ:
Wa bà kú kↄ̃n Daudaoro,
wa lɛ́ kú Yɛsɛ nɛ́ yãnlo.
Isarailinↄ, a baade tá a bɛ!
Dauda bori, ǹ n zĩnda bɛ kũ!
Ben Isarailinↄ tà ń bɛ.
17 Isaraili kɛ̀ aↄ̃ↄ kú Yuda boriinↄ wɛ́tɛ guunↄn Reoboamu gↄ̃̀ ń kína ũ ado.
18 Kí Reoboamu a zↄ̀zĩ gbɛ̃nsi Adoniramu zĩ̀ Isarailinↄa, ben aↄ̃ à pàpa gbɛ̀o wà à dɛ̀. Ben kí Reoboamu fɛ̀ɛ kↄ̃n wãaao à sì a sↄ̃goron à bàa sì à tà Yerusalɛmu.
19 Lɛn Isarailinↄ gì Dauda boriinↄzi lɛ ai kↄ̃n a gbã̀ao.
20 Kɛ̀ Isarailinↄↄ mà ń píngi kɛ̀ Yeroboamu sù, ben aↄ̃ à sìsi kakↄ̃ana guu, ben aↄ̃ à kà Isaraili boriinↄ kína ũ. Isaraili bori kee e zɛ kↄ̃n Dauda boriinↄo dↄro, tó èe kɛ Yuda boriinↄ baasiro.
21 Kɛ̀ Reoboamu kà Yerusalɛmu, à Yudanↄ kàkↄ̃a ń píngi kↄ̃n Bɛyãmi boriinↄ. Zĩ̀kari pìnↄ gↄ̃ↄn bↄrↄ bakɛ̃ndomɛ. Ben aↄ̃ↄe gaa zĩ̀ ká kↄ̃n Isarailinↄ, lɛ wà e wà Sulemanu nɛ́ Reoboamu kpata sínɛ wà kpáa dↄ.
22 Ben Luda yã sù Luda gbɛ̃ kɛ̀ wè be Semayaa à bè:
23 Ǹ o Yudanↄ kí Sulemanu nɛ́ Reoboamunɛ kↄ̃n Yudanↄ ń píngi kↄ̃n Bɛyãmi boriinↄ kↄ̃n gbɛ̃ kpaaanↄ,
24 mamↄma Dii ma bè, àton gá zĩ̀ ká kↄ̃n a Isaraili daanↄoro. A baade tá a bɛ, zaakɛ yã kɛ̀ kɛ̀ pì bↄ̀ ma kiiamɛ. Ben aↄ̃ yã kɛ̀ Dii òńnɛ mà aↄ̃ tà.
25 Yeroboamu Sɛkɛmu kɛ̀ kú Ɛflaimu gu kpiideen bĩi bò, ben à vɛ̃̀ɛn. Zaa gwen à gàa à Pɛniɛli kɛ̀kɛ à kàɛ.
26 Ben à laasuu lɛ̀ à bè: Weé ɛara wà Dauda borii sↄkpa kpatammɛ fá!
27 Tó Isarailinↄↄ e gaa saa o Dii ua Yerusalɛmu, aↄ̃é ɛara wà zɛ kↄ̃n ń dii Yudanↄ kí Reoboamuomɛ, aↄ̃é ma dɛ wà zɛo.
28 Kɛ̀ kína yã pì gwà, ben à vura zùswarenɛ bↄ̀rↄnↄ pì mɛ̀n plaa, ben à bè gbɛ̃nↄnɛ: Isarailinↄ, a gana Yerusalɛmu mↄ̀ lɛ. A dii kɛ̀ aↄ̃ a bↄɛ Igipitinↄn yɛ̀!
29 Ben à à doo dìɛ Bɛtɛli, à doo sↄ̃ ai Dani.
30 Ben yã pì gↄ̃̀ńnɛ durun ũ, aↄ̃è gá dↄnzi kɛ à doonɛ Bɛtɛli, à doo sↄ̃ ai Dani.
31 Yeroboamu kpɛ́ bò zù pìnↄnɛ tãagbãgbãkiinↄa, ben à gbɛ̃ dìɛ sa'orinↄ ũ, baa kↄ̃n gbɛ̃ kɛ̀ aↄ̃ↄ dɛ Levi borii ũroonↄ.
32 Ben à mↄ sↄraagↄ̃de gurↄ gɛ̃rodee dìɛ zĩbaa ũ lán Yudanↄ pↄ́ bà se, ben à saa ò tãagbãgbãkii kɛ̀ kú Bɛtɛli pìa. À saa ò zùswaree kɛ̀ à pì pìnↄa, ben à sa'orinↄ dìɛ gwe.
33 Ben à saa ò sa'okii kɛ̀ à kɛ̀ Bɛtɛli pìa mↄ sↄraagↄ̃de gurↄ gɛ̃rodee zĩ. Gurↄↄ pìn à dìɛ a zĩnda pↄyezia zĩbaa ũ Isarailinↄnɛ.