Luda yã takada kↄ̃n Bokobaru yão 1 KINANƆ 13

Luda gbɛ̃ lɛ́kɛna Bɛtɛli sa'okiinɛ

1 Luda gbɛ̃ke bↄ̀ Yudanↄ bùsun à mↄ̀ Bɛtɛli lán Dii dànɛ nà gurↄↄ kɛ̀ Yeroboamu zɛna sa'okii pì saɛ lɛ à saa o. 2 Ben à sa'okii pì kà à bè: Sa'oki, sa'oki, Dii bè weé nɛ́ i Dauda bɛ, weé tↄ́ kpánɛ Yosia. Àpi bé eé saa omma kↄ̃n tãagbãgbãkii sa'ori kɛ̀ aↄ̃ↄe zĩi kɛɛ kɛ̀nↄ, eé gbɛ̃ntee wánↄ kpátamma. 3 Gwe gↄ̃ↄ Luda gbɛ̃ pì yã pì kɛna sèeda òńnɛ à bè: Sèeda kɛ̀ Dii òn yɛ̀. Sa'okii pì é parakↄ̃rɛ à túbu é kwɛ́ɛ.

4 Kɛ̀ kí Yeroboamu lɛ́ kɛ̀ Luda gbɛ̃ pì kɛ̀ Bɛtɛli sa'okii pìnɛ mà, ben à ↄ̀dↄa zaa sa'okiia gwe à bè: À à kũ! Ben ↄↄ kɛ̀ à dↄ̀a pì gbã̀gbã, eé fↄ̃ à kòko dↄro. 5 Ben sa'okii pì pàrakↄ̃rɛ à túbu kwɛ̀ɛ lán Dii dà Luda gbɛ̃ pìnɛ à ò nà. 6 Ben kína bè Luda gbɛ̃ pìnɛ: Ǹ agbaa kpámɛ Dii n Ludanɛ. Ǹ wɛ́ɛ kɛamɛ lɛ ma ↄↄ e à su a gbɛ̀n. Ben Luda gbɛ̃ pì agbaa kpà Diinɛ, ben à ↄↄ sù a gbɛ̀n lán a zii bà. 7 Ben kína bè Luda gbɛ̃ pìnɛ: Ǹ mↄ́ wà gá ma bɛ wà pↄ́ ble, mɛ́ gba dannɛ. 8 Ben à bè kína pìnɛ: Baa tó n n auziki kpadoo kpàma, mɛ́ gányoro. Mɛ́ pↄ́ ble ke mà í mi guu kɛ̀ro, 9 zaakɛ Dii bèmɛ màton pↄ́ ble kɛ̀ro, màton í mi kɛ̀ro, màton sↄ̃ tá kↄ̃n zɛ́ kɛ̀ ma mↄooro. 10 Ben à zɛ́ pãnde sɛ̀, èe zɛ́ kɛ̀ à mↄ̀o Bɛtɛli sɛ́ dↄro.

11 Annabi zi kee kú Bɛtɛli gwe. Kɛ̀ à nɛ́nↄ sù, aↄ̃ yã kɛ̀ Luda gbɛ̃ pì kɛ̀ gwe zĩ beeea tↄ̃kɛ̃̀ ń denɛ kↄ̃n yã kɛ̀ à ò kínanɛo píngi. 12 Ben aↄ̃ de ń lá à bè: Zɛ́ kpareen à sɛ̀? Ben à nɛ́nↄ zɛ́ kɛ̀ Luda gbɛ̃ kɛ̀ bↄ̀ Yudanↄ bùsun pì sɛ̀ gↄ̃̀gↄ̃nɛ. 13 Ben à bèńnɛ: À gàari yimɛ zaakinɛ. Ben aↄ̃ↄ yìnɛ aↄ̃ à dì à kpɛɛ. 14 Kɛ̀ à pɛ̀ɛ Luda gbɛ̃ pìzi, ben à à lè vɛ̃ɛna gbíi lí gbáru. Ben à à là à bè: Luda gbɛ̃ kɛ̀ bↄ̀ Yudanↄ bùsumn n ũↄ́? À wèàla à bè: Mámbee! 15 Ben annabi zii pì bènɛ: Ǹ mↄ́ wà gá ma bɛ, ǹ pↄ́ ble. 16 À wèàla à bè: Mɛ́ fↄ̃ mà ɛara mà tányoro. Mɛ́ fↄ̃ mà pↄ́ ble ke mà í minyo guu kɛ̀ro, 17 zaakɛ Dii bèmɛ màton pↄ́ ble ke mà í mi kɛ̀ro, màton sↄ̃ tá kↄ̃n zɛ́ kɛ̀ ma mↄooro. 18 Ben annabi zii pì bènɛ: Annabin ma ũ lán n bà. Malaika ke bé à Dii yã òmɛ à bè mà pɛ́ɛnzi mà sunyo ma bɛ, lɛ ǹ pↄ́ ble ǹ í mi. Mↄde ɛgɛɛn annabi pì e too. 19 Ben Luda gbɛ̃ pì ɛ̀arao, à pↄ́ blè à bɛ à í mì. 20 Gurↄↄ kɛ̀ aↄ̃ↄ vɛ̃ɛna pↄ́bleezi, Dii yã sù annabi zii kɛ̀ sùo pìa, 21 ben à wii lɛ̀ Luda gbɛ̃ kɛ̀ bↄ̀ Yudanↄ bùsun pìa à bè: Dii n Luda bè, lán n gi a yã mazi nà, nɛ́ɛ yã kɛ̀ à ònnɛɛ maro, 22 n ɛara n mↄ n pↄ́ blè n í mì guu kɛ̀ à ònnɛ ǹton pↄ́ blenlo ǹton í minlo pì, weé n vĩi kↄ̃n n dezinↄoro. 23 À pↄ́blena kↄ̃n à íminao gbɛra, annabi kɛ̀ sùo pì gàari yìnɛ zaakia. 24 Kɛ̀ à dà zɛ́n, ben à kpàkũ kↄ̃n músuo, músu pì à dɛ̀. À gɛ̀ gↄ̃̀ diɛna zɛ́n, ben zaaki kↄ̃n músuo gↄ̃̀ zɛna à gɛ̀ pìzi. 25 Kɛ̀ gbɛ̃ kɛ̀ aↄ̃ↄe gɛ̃tɛɛnↄ à gɛ̀ è daɛna zɛ́n gwe kↄ̃n músu kɛ̀ zɛzio, ben aↄ̃ gàa wà à baaru kpà wɛ́tɛ kɛ̀ annabi zii pì kún guu. 26 Kɛ̀ annabi kɛ̀ sùo pì à baaru mà, à bè: Luda gbɛ̃ kɛ̀ gì Dii yã mazin gwe. Ben Dii à kpà músua, à à ɛ̀'ɛkↄ̃rɛ à dɛ̀ lán Dii ònɛ nà. 27 Ben à bè a nɛ́nↄnɛ: À gàari yimɛ zaakinɛ. Ben aↄ̃ↄ yìnɛ. 28 À dà zɛ́n, ben à gàa à à gɛ̀ lè daɛna, zaaki kↄ̃n músuo zɛzi. Músu pì e gɛ̀ pì sóro bensↄ̃ èe zaaki pì ɛ́'ɛkↄ̃rɛro. 29 Ben annabi pì Luda gbɛ̃ pì gɛ̀ sɛ̀ à dì zaaki musu à sùo a bɛ wɛ́tɛn, lɛ à gɛ̀ ↄ́ↄ dↄ à à vĩi. 30 Ben à à vĩ̀i a zĩnda mirawɛɛn, à ↄ́ↄ dↄ̀ à bè: Wãiyoo ma gbɛ̃! 31 Kɛ̀ à à vĩ̀i à yã̀a, à bè a nɛ́nↄnɛ: Tó ma ga, à ma vĩi mirawɛɛ kɛ̀ ma Luda gbɛ̃ pì vĩ̀in à wa gɛ̀ kpákↄ̃zi. 32 Zaakɛ yã kɛ̀ Dii dànɛ à ò Bɛtɛli sa'okii musu kↄ̃n tãakpɛ kɛ̀ kú Samaria bùsu wɛ́tɛ tãagbãgbãkiianↄ é kɛ yãpura.

33 Baa kↄ̃n beeeo Yeroboamu e kpɛɛ li a yãzaakɛnanɛro, à ɛ̀ara à Isaraili bori píngi dìɛ tãagbãgbãki sa'orinↄ ũ dↄ. Gbɛ̃ kɛ̀ aↄ̃ↄ yezi wà gↄ̃ tãagbãgbãki sa'orinↄ ũun à ń kɛ́ à ũ. 34 Durun kɛ̀ tò wà Yeroboamu boriinↄ dúgu zↄ̃̀ aↄ̃ yã̀a anduna guun gwe.