8
Dodoga 4,000 Yesu ya Fakalahedi
Maleko 8:1-10
(Matiu 15:32-39)
1 Lahaidi yai ni baiwa hesa ya faꞌoigogoma, mate hige adi kalahe. Yo fede Yesu ana hewahewali ya yogaidima na iyen,
2 Dodoga te, E fanuwatohatohaedi, na adi kalahe sa ofi, paꞌana lahai faihona ma afa haidagu.
3 Yena E duidi sa lau edi luma ma guliyamdi haba matadi sa kwadekwade ai edaꞌeda paꞌana haisa adi eda sa lofa.
4 Tau famuli watanina sa fatiꞌo tiyen,
Ai malatupwam te haba ai somo kalahe te lobahi be te fakalahedi?
5 Yesu ya fatiꞌoidi iyen,
Fwalawa fisa lebemiu yai?
Alinana sa bui tiyen,
Faligigi luwaga moho.
6 Dodoga ya falibadi be sa taꞌai tanohi yai. Habahim fwalawa faligigi luwaga ya abidi na Yaubada ya lautoꞌiyen. Ya ifidi na tau famuli watanina ya feledi be sa soiyedi baiwa lisidi yai.
7 Hama fisa Yesu ya abidi na Yaubada ya lautoꞌiyen be tau famuli watanina ya feledi sa soiyedi hinaga.
8-9 Mahudoꞌidi sa kalahe be bogadi sa yahayaha. Ouꞌoulidi doha 4,000. Adi antole sa tanogogondi be noho faligigi luwaga sa famohafudi. Habahim Yesu ya duidi be sa lau.
10 Na maꞌana hewahewali waga yai sa lau Dalamanuta nuꞌuna.
Falesiya Noꞌo Abiꞌabidi sa Fanuha
Maleko 8:11-13
(Matiu 16:1-4)
11 Falesiya edi fanuha bena Yesu sa fasai buluhi yo fede sa laoma be sa fatiꞌoi bena galewa fafaꞌilalana ya faꞌitadi.
12 Yo fede Yesu ya nahasi na iyebom,
Sidohana be hiti te ami fanuha bena fafaꞌilala E ginauli be ami ita? E faliba dudulaimiu mate ibege laꞌi ya ginauli.
13 Yo fede ya lau afuledi na ya awa waga yai be sa lau gabogabo tefana.
Falesiya yo Heloda adi Yisti
Maleko 8:14-21
(Matiu 16:5-12)
14 Tau famuli watanina nuwadi sa fui be hige fwalawa adi ti abi faꞌouli. Esega dumaduma mate waga yai.
15 Yesu ya falibadi iyen,
Au ita komakoman! Falesiya yo Heloda adi yisti ibe au abi.
16 Liba wa ibodi sa fafadosi tiyen,
Nuwana fwalawa hige laꞌi ta abi, logena ya liba doha.
17 Edi nuwanuwatuhu, mate Yesu haꞌa ya sibai yo fede ya fatiꞌoidi iyen,
Paꞌana somo ami liba auwen, “Hige ama fwalawa?” Hige somo au nuwatuhu lobahi, Nuwanuwamiu sa poꞌi?!
18 Matamiu yo beyamiu na hige hola somo au ita yo au atahi lobahi. Nuwamiu sa fui
19 Fuyana fwalawa faligigi E ifidi dodoga 5,000 adi, anꞌan otafahidi ami tanogogo mate noho fisa ami famohafudi?
Alinana sa bui tiyen,
Noho safuhudohudoꞌi luwaga.
20 Na Yesu ya fatiꞌo boda iyen,
Fuyana fwalawa faligigi luwaga E ifidi dodoga 4,000 adi, mate antoledi ami tano gogoidi be noho fisa ami famohafudi?
Alinana sa bui tiyen,
Noho faligigi luwaga.
21 Yo fede Yesu ya fatiꞌoidi iyen,
Na sidohana be hige au nuwatuhu lobahi?
Taumoho Mata Toutouna Betesaida yai
Maleko 8:22-26
22 Betesaida nuꞌuna yai sa laoma yo fede dodoga haisa amainiya taumoho mata toutouna sa leyama Yesu lisina be sa anꞌetai bena ya abiꞌina.
23 Yesu taumoho wa ya abi nimai be ya foya hudoꞌiyen tefa hesa yai. Matana ya kanisoidi, na muli yai ya abilau tauna yai na iyen,
Somo laꞌi wa ita, e higeꞌe?
24 Taumoho wa ya itaꞌita hasa na iyen,
Ii–, dodoga E itadi doha oyagi sa laulau tiga.
25 Yesu nimana ya tole fuyoi taumoho matana yai. Habahim matana sa nega be ginauli ya ita lobahidi.
26 Ya faliba iyen,
Tabu u fuyo duhu laꞌi yai.
Habahim ya dui.
Pita Iyen, “Yesu Mate Keliso!”
Maleko 8:27-30
(Matiu 16:13-20; Luka 9:18-21)
27 Habahim Yesu yo tau famuli watanina sa lau luma haisa Sesaliya Filipo sadaina yai na edaꞌeda yai ya fatiꞌoidi iyen,
Dodoga haba tiyen, “Yau sai?”
28 Yo fede tau famuli watanina tiyen,
Dodoga haisa tiyen, “Um Diyon Babasito.” Haisa tiyen, “Um Ilaidiya,” na haisa tiyen, “Um mate peloweta hesa.”
29 Be ya fatiꞌoidi iyen,
Na umi haba auwen, “Yau sai?”
Alinana, Pita ya bui,
Um mate Keliso, Yaubada ena Fasinabo Dogana.
30 Yesu ya laugagayoꞌedi, iyebom,
Ami nuwa gado. Tabu au fatala libalibaegu.
Yesu Ena Peꞌi ya Liba Bwaꞌiyen
Maleko 8:31-9:1
(Matiu 16:21-28; Luka 9:22-27)
31 Yesu ya fatubu tau famuli watanina ya faꞌatadi iyen,
Doga Natuna haba kamkamna boludi ya fahoinadi. Haba babada yo tau antalasam babaꞌisadi yo laugagayo tau lau faꞌataena sa ꞌwaiyoꞌoꞌen. Haba sa wunui na lahai faihona ai mulidi ya mwahuli fuyo.
32 Liba te Yesu ya dede faneganega. Yo fede Pita ya foya hudoꞌiyen, be ya liba suꞌui.
33 In moho, Yesu ya timuli bui ana hewahewali lisidi, na ma liba suꞌu hinaga, In ya libalau Pita lisina, iyebom,
Satani, u lau afulegu! Em nuwanuwatuhu doha dodoga edi nuwatuhu. Hige Yaubada ena nuwatuhu!
34 Habahim tau famuli watanina yo baiwa ya yoga gogondima lisina be ya falibadi iyebom,
Yena sai ya famuli watanigu ginauli mahudoꞌidi ti otawa. Ena kolosi moho i bahei na i lau watanigu.
35 Yena sai ena mwahuli ya modemodeꞌen, mate ibege ana loge. Na sai ena mwahuli ya nuwa afulen, yau debagu yai yo wasa loholohona debana yai mate haba ya mwahuli.
36 Ibe sai tanoꞌubu nuwanuwatuhudi moho ya modemodeꞌedi, na yaluwana hige i nanabuwen ai somo haba dudulai ya abi?
37 Somo haba doga ya ginauli be yaluwana ya une fafuyo?
38 Umi mate tau muli suhasuha Yaubada matana yai. Lahai pilipilidi yai te yena hiti heyaheyayadi ganahewadi yai sai ya taumayamayaꞌegu yo egu liba hinaga ya taumayamayaꞌen, mate Doga Natuna haba ya taumayamayaꞌen ena fuya laoma yai maidana anelu tabudi Tamada ena namanamali yai. (Delamaiya 3:8)