9
1 Yesu ya falibadi iyen,
E faliba dudulaimiu mate salumadi haisa ibege ti peꞌi ee–, Yaubada Aba Baꞌisa ma gigibwalina ya laoma sa ita.
Yesu Nenena ya Bui
Maleko 9:2-13
(Matiu 17:1-13, Luka 9:28-36)
2 Lahai faligigi esega mulidi yai Pita, Diyemsi yo Diyon, Yesu ya foya hudoꞌiyedi be sa lau tuꞌa lofalofana yai. Sa itaꞌita lau na Yesu nenena ya lau hudoꞌi.
3 Ana leli sa kafu wananaha be sa famata anꞌan. Hige gonowana tanoꞌubu yai te sai laꞌi i ankaisu be ti kafu doha.
4 Yo fede Ilaidiya yo Mose sa taumahata be maꞌedi Yesu sa libaliba.
5 Pita iyen,
Tanuwaga, ya loholoho wananaha be ai amaiteꞌi! Haba gwaꞌu faihona ꞌe ginaulidi. Um em, Mose ena, yo Ilaidiya ena.
6 (Sa ꞌwasabu wananaha be Pita ya libaliba gaibu.)
7 Habahim yada ya laoma be ya fakoudi na ganahewana yai alina hudoꞌi sa atahi iyen,
Itete Natugu, E fanuha wananahai. Au ataꞌatahi lau lisina!
8 Yo fede sa itaꞌita asiꞌasi na hige sai laꞌi ti ita. Yesu moho maꞌedi.
9 Tuꞌa yai sa letama, Yesu ya laugagayoꞌedi iyen,
Somo ami ita tabu sai laꞌi au faliba ya lau wee–, Doga Natuna ya obiyo fuyo peꞌi yai.
10 Ena laugagayo sa lau watan na iti ibodi moho sa lau fadosi tiyen,
“Obiyo fuyo peꞌi yai” aniyona somo?
11 Yo fede Yesu sa fatiꞌoi, iyen,
Sidohana be laugagayo tau lau faꞌataenna tiyen, “Ilaidiya haba ya laoma bwaꞌi?”
12 Alinadi ya bui iyen,
Moꞌisa, Ilaidiya haba ya bwaꞌi, be ginauli mahudoꞌina ya faloholoho bodai. Buka Tabuna yai sa libaen mate, “Yau, Doga Natuna, haba E ankamkamna suꞌusuꞌu yo haba sa ꞌwaiyoꞌoꞌegu?”
13 E falibamiu mate Ilaidiya haꞌa ya laoma be dodoga sa fahisu faheyaya doha Buka Tabuna ya libaen. (Matiu 17:13; 1 Kin 19:1-10)
Keliso ena Gigibwali yai, Gwama Kiukiu ya Faloholoho
Maleko 9:14-29
(Matiu 17:14-21; Luka 9:37-43a)
14 Fuyanna Yesu maꞌana hewali faihona tuꞌa yai sa fuyoma baiwa laꞌilaꞌi haidadi sa gana fataꞌiꞌilidi na maidadi laugagayo tau lau faꞌataenidi sa faifaibayaho sa itadi.
15 Maihalana yai baiwa Yesu sa ita be sa tauhiti. Sa lautafo lau lisina be sa lautoꞌiyen.
16 Yesu ana hewahewali ya fatiꞌoidi, iyen,
Somo ami faibayahoꞌen maidamiu dodoga ni?
17 Taumoho hesa pwalu yai, iyen,
Tanuwaga, natugu E leyama lisim paꞌana yaluwa heyaheyayana lisina yai be hige i libaliba.
18 Yena ya luhufi haba ya lofe lidiyen ai tanohi yo ya gwasagwasa pulo na moꞌana ya nalididiꞌi yo tauna sa siꞌololo. Am hewahewali E falibadi bena sa liba dui. Na hige gonowadi.
19 Yesu dodoga ya falibadi, iyen,
Gwama ni au leyama lisigu. Tau kawawananaha gesa hitimiu, hige emi sunuma. Ai lisimiu haba E miya lofana doha somo? Ma fisa haba emi mwahu E bahei?
20 Yo fede sa leyama lisina. Maihalana yai Yaluwa heyaheyayana ya itaꞌita lau be Yesu ya ita yo fede yaluwa ni, gwama ya pei lidiyen tanohi yai be ya tapitapi pili yo ya gwasagwasa pulo.
21 Yesu ya fatiꞌoi iyen,
Atasina yai ya fatubu?
Gwama tamana iyen,
Ma kiukiuna ya fatubu.
22 Fuya ouꞌouli ya pei lawen ai oyagi alaꞌalana yo ai hoꞌowa be bena ya wunui. Aee–, yena gonowam u nuwatohatohaimai be u saguhimai.
23 Yesu iyen,
Sidohana be wa liba, uwen, “Yena gonowam?” Tau sunuma gonowana ginauli mahudoꞌidi ya ginaulidi.
24 Yo fede gwama tamana ya yoga lau, iyen,
E kawawananaha! In moho egu kawawananaha hige i laꞌi, be u saguhigu.
25 Pwalu ya suꞌusuꞌuma Yesu lebena yai yo fede ya libalau yaluwa heyaheyayana lisina iyen,
Um yaluwa doꞌodoꞌona yo libaliba gesana, E falibam gwama ni u kalamahano afulen na tabu u luhu fuyoi.
26 Yaluwa heyaheyayana ya ꞌwalaꞌui na gwama ya kamfafatabubu na ya kalamahano. Gwama itaꞌitana doha doga peꞌipeꞌina be mahudoꞌidi tiyen,
Haꞌa ya peꞌi!
27 Yesu ya abilau gwama nimana yai be ya faꞌobiyo.
28 Habahim, sa lau luma ganahewana na ana hewahewali sa fatiꞌo modigafui,
Sidohana be yaluwa heyaheyayana ni hige ai liba dui?
29 Yesu iyen,
Hige somo laꞌi gonowana. Lauꞌuꞌula moho gonowana yaluwa heyaheyayadi doha ite ya duidi sa lau ganamuli.
Yesu ena Peꞌi ya Libaen Bodai
Maleko 9:30-32
(Matiu 17:22-23; Luka 9:43b-45)
30 Nuꞌu ni sa lau afulen na sa lau Galili. Yesu hige i fanuha bena sai hesa i sibai mate in somo yai,
31 paꞌana tau famuli watanina, ya fatalahadi. Ya libalau lisidi iyebom,
Doga Natuna haba sa fele lawen dodoga dodoga nimadi yai, be sa wunui na lahai fafaihonana yai haba ya mwahuli fuyo.
32 In moho liba te aniyona hige ti nuwatuhu lobahi. Sa ꞌwasabu be hige ti fatiꞌoi.
Sai Mate ya Hasai Wananaha?
Maleko 9:33-37
(Matiu 18:1-5; Luka 9:46-48)
33 Kapanayum nuꞌuna yai sa mahano lau be sa lau luma ganahewana. Habahim Yesu tau famuli watanina ya fatiꞌoidi iyebom,
Edaꞌeda yai somo ami faibayahoꞌen?
34 In moho hige alinana ti bui paꞌana edaꞌeda yai ibodi sa faifaibayaho mate sai haba ya hasai wananaha.
35 Yesu ya taꞌai na habahim ana hewahewali safuhudohudoꞌi luwaga ya yoga gogondima na ya falibadi iyen,
Yena sai ya fanuha ya bwaꞌi mate bena ya mulita wananaha yo in mate dodoga mahudoꞌidi edi tau lau fayofayo.
36 Yo fede wawaya kiukiu hesa ya faꞌobiyo atiꞌatipudi yai. Ya fagado bainewaꞌen na ya falibadi iyen,
37 Sai laꞌi hesagu yai wawaya doha itete ya yoga hitin mate,
yau hinaga ya yoga hitinigu,
yo sai ya yoga hitinigu,
mate tau fatamaliguma hinaga ya yoga hitin. Hige ibogu moho!
Sai ya Fanuhada, Mate Eneheda
Maleko 9:38-41
(Luka 9:49-50)
38 Diyon ya libalau Yesu lisina iyen,
Tanuwaga, doga hesa ꞌe ita hesam yai demoni ya liba duidi. Yo fede ꞌe lau biliyen paꞌana in hige i laulau watanida.
39 Yesu ya falibadi iyen,
Tabu au lau biliyen paꞌana hige sai laꞌi noꞌo laulaudi hesagu yai i lau ginauli na haba feula i liba faheyayagu.
40 Sai hige i ꞌwaiyoꞌoꞌeda mate eneheda.
41 E faliba dudulaimiu mate yena sai hoꞌowa ya felemiu, paꞌana umi enehegu, haba maisana ya abi.
Sunuma ana Lauꞌita
Maleko 9:42-50
(Matiu 18:6-9; Luka 17:1-2)
42 Yena sai hesa wawaya kiukiu ya foya ponoli be ena sunuma ya fagogoma, loholohona mate dogana ai gadona umeꞌehu laꞌilaꞌi sofana habahim fakapulolona ai gabogabo.
43 Ibe nimam hesa ya falau ponom be heyaya wa ginauli u ibo motu! Ya loholohona ma nima eseꞌesegam, haba wa mwahuli. Hige i loholoho ma nima luwaluwagam sa lawem oyagi alaꞌalana hige anadan.
44 Amainiya, hulohulo ibege ti peꞌi
yo oyagi alaꞌalana ibege ti fatuwa funuhi.
45 Na ibe ahem hesa ya falau ponom be heyaya wa ginauli, u ibofahi! Ya loholoho ma ahe eseꞌesegam, haba wa mwahuli. Hige i loholoho bena ma ahe luwaluwagam sa pei lawem ai oyagi alaꞌalana.
46 Amainiya hulohulo ibege ti peꞌi
yo oyagi alaꞌalana ibege ti fatuwa funuhi.
47 Yo ibe matam hesa ya falau ponom be heyaya wa ginauli u limofahi! Ya loholohona ma mata eseꞌesegam, haba wa lau Yaubada Aba Baꞌisa. Hige i loholoho ma mata luwaluwagam sa pei lawem ai oyagi alaꞌalana.
48 Amainiya hulohulo ibege ti peꞌi
yo oyagi alaꞌalana ibege ti fatuwa funuhi.
49 Doga mahudoꞌina haba sa faꞌaꞌa doha antalasam sa faꞌaꞌa alita yai. (Lewitikusi 2:13 yo Namba 18:19)
50 Alita mate ya loholoho in moho yena amnana ya ofi haba sidohana em fafaꞌalita fuyoina? Alita ai nuwamiu i ota, na au miya gogo, ma nuwa esegamiu.