A bécéiuhe tii
te
Pétéru
Atabuhi ko a tii
Woo na e tii a tii ce?
Wo Simon Pétéru, pa apostolo, ke pa apulie na piubwo nang ne hadenii ni acéihi. E picani ten wo Silas (omehi 5.12), be wieli e temehi pwotii he pwo grek.
E tii éniile?
Ha awieme a jo 62 me 64, ha a benaamwon na wo pa daame he lépwo Roma wo Néron, ke e pwotahi ne ko lépwo acéihi ne ko Iésu. Wieli e tii mu Rome wo Pétéru (he na pii kon lang pie ‘Babulona’ ne ha a niide a tii 5.13).
E tii me dee?
Te lépwo acéihi ne ko Iésu Kériso na time uce lépwo Juif, na lé mulie ha a province Asia te lépwo Roma, ha a duaan na pii kon pie Turki jenaa. Ke e pwotii nge céii mwo ati lépwo acéihi na pwotahi ne kolé.
É ko ade na e tii?
Wo lépwo acéihi, ke lé mu ha a péém he ni jo na hiwon. Kehe icehi ana pwo ni apulie na lé tabuhi cubwonilé, ke lé pwotahi ne kolé. Ke lé cine pa daame he lépwo Roma, wo Néron, beme e pwotahi ne kolé mwo. E tii wo Pétéru, beme e pamwoiu lépwo acéihi ne he ni picani na lé mu hen.
Ade ace âne a tii ce?
Wogenye na genye céihi ne ko Iésu, ke genye caa apulie ne ha a bele te Padué, mu ko a bwo pwoâpwailo ko Iésu Kériso. Caa puukenye ne he nii Kériso, ke wâé heme nye mulie ha a mulie na iitihi ati he ni tan. Hemepie pwotahi ne konye, ke wâé heme nye niimihi pie junihe pwotahi ne ko Iésu, ke wâé heme nye picani ha a pipwodéén pwohewiieng. Be me wonaa, ke e o mu konye ni adéihi mu jeda he miiden na e o tee mu dieli mwo (1.3−4, 5.12).
A bwomune a tii 1 Pétéru
Pipwobwocu (1.1−2)
E celuimikenye wo Padué, ke e adéikenye (1.3−12)
Mulie ha a mulie na iitihi (1.13―2.10)
A mulihenye ne pele nina time lé uce temehieng (2.11−25)
A pwooti ne te lu aadomwin (3.1−7)
Nye adéilé heme lé pwotahi ne konye (3.8―4.19)
A pwooti ne te lépwo apihuô (5.1−4)
Bénebwéne pwooti ke bépinelé (5.5−14)
1
Pipwobwocu
1 Woéo Pétéru, na é pwotii, woéo pa *apostolo te Iésu *Kériso. [Be e neéo ngen beme é patemehi a pwooti ten.] É pwotii lé céiikewé lépwo apulie te Padué, na geé mu he ni pétaapwo province: Pont †, Galat, Kapados, Asia ke Bitini.
2 Wo Padué Caa, ke e caa pipégalikewé, be weengaa a âniimihinaado ten na caa te bwolihi. Ke a *Jenen Iitihi ten, ke e ne me wogewé a puapulie ten, na iitihi. Ke wo [pa Naîn] Iésu Kériso, ke e caa pétaabwon ni ta pwo tewé, ko a bwo tée na a cewéhen. Ke caa wogewé lépwo apulie na geé piténedehi.
Wâé heme etewé a pipwoééhe me a péém na piwéden!
E celuimikenye wo Padué
3 Pipaunu Padué, pa Caa te Padaame henye, Iésu Kériso! Be te nihe ubwo wéden a pipwoééhe ten me denye. Ke e ne tenye a mulie na mwo coho mu ko a bwo mulie cemwo mu ha amele te Iésu Kériso. Ke é mu ko anaa, ke etenye a céihi na mang,
4 é ne ko ati ni *adéihi na nye ucéihi. Ke weengi: Ke o tai ni de ni naî Padué a mulie na e jeda he miiden, é he na time uce ta ni naado nelang, ke time uce alili, ke time uce tieden, be e mu dieli mwo!
5 Be e celuimikenye wo Padué mu ko a céihi tenye [ne ko Iésu Kériso]. Ke e wéikenye ko a niihen ke a junuun, beme nye bo hegi ati ni adéihi ten, na e bo habwii tenye ha a *Tan Alece.
6 É mu ko ati ninaa, ke wâé heme geé pipwodéén, heme geé muko pétaapwo mu he ni picani na téé. Be wâé heme wonaa ha a benaamwon ce te ju bahin,
7 beme e tacebwénihi a céihi tewé. Be pwohewii a mwani megele na cini ne pwo miû, beme pétaabwon ana alili mu kon. Ke a céihi, ke te nihe a junaado koja a mwani megele, be o tieden ha ace céiu tan. Ke mepie te mang a céihi tewé, ke [é alecehe ni tacebwén] ke geé bo hegi a pipwowâé na nihe ubwo ke piwéden, ha a tan na e bo pihabwiieng de ati ni apulie wo Iésu Kériso.
8-9 Time geé mu uce ali Iésu, kehe icehi ana o eânimewé ten. Ke time geé uce téele alieng, kehe icehi ana geé tee ko céihi ne kon. Ke é mu ko anaa, ke e celuimikewé wo Padué, ke o te junihe ubwo wéden a pipwodéén dewé, na pwocoon me nye pii.
Patemehi ânebun a bwo celuimikenye
10-11 Lé mi pébé a pwooti te Padué wo lépwo *péroféta bwolihi, ke lé cihe ko a âpipati na genye bo hegi: a bwo celuimikenye. Be e mu kolé, ke a Jenen Iitihi te Kériso, ke e ne me lé pii pwaatihi a bwo picani ke a bwo mele te Kériso, me a bwo ubwo na a wâé ten alecehen. [Kehe icehi ana time lé uce temehi a pwooti na lé pébé] ke lé te nihe hane me lé temehi pie o [wooélé, ke] éniile, ke o woté.
12 Be e pii telé wo Padué pie, ati ni naado na lé pii pwaatihi ne he niin, ke e bo pacuwohi alecehelé, me denye jenaa. Ke [weengaa ana e tuiebé. Be] li apulie [li e pahedelé ngen wo Padué] ke lé caa patemehi tewé a *Pwooti Wâé, ne ha a junuu a Jenen Iitihi na e âbé mu he miiden. Ke a Pwooti Wâé naa, ke te nihe nime lépwo *âcélo me lé temehi [ke me lé alihi aceli e o bo âbé alecehen].
Mulie ha a mulie na iitihi
13 É mu ko anaa, ke geé pipwoiipikewé, ke geé tee ûmiê, ke geé tee niimihi ni adéihi na e bo ne tewé ha a tan na e bo pihabwiieng hen wo Kériso.
14 Geé piténedehi, be wogewé ni naîn, ke geé nemwo âcehi nina te nimewé kon na ta ânebun, he time geé uce téele temehi Kériso.
15 Geé pipaciitikewé ne he ni huô tewé, be wo Padué na e todekewé, ke Padué na e iitihi.
16 Be caa te tii ne he ni *tii iitihi pie: Geé pipaciitikewé, be é iitihi.Lévitique 19.2
Paciiti Padué
17 Geé pwoiitihi te Padué, ke geé pii kon pie Caa. Ke [wâé heme geé tee niimihi pie] te weeng na e bo muko tautikenye ko nina nye pwo, ke time e uce pipwoinen ne ko ni apulie. Ke é ko anaa na me geé paciitieng he geé mwo ko mulie éni pwo bwohemwo.
18 Be geé te temehi ehi pie [wogewé ni apulie ten jenaa. Be] e pwocuhikewé ko a cuhin na te junihe ubwo. E celuimikewé mu ha a mulihewé ânebun na geé pé koja lépwo watihewé; a mulie na time uce jan me e ne tewé a ju adéihi.
Time e uce pwocuhikewé ko mwani megele ai mwani pwojo, ai ko ce béé naado celi nyaale, ke muti.
19 Ûhu! E celuimikewé ko a cewéhe Kériso [na e tée he li e mele me dewé]: a cewéle na nihe ubwo wéden a cuhin. Wo Kériso, ke te tice ta kon, pwohewii a nahi muto na *pwoâpwailo kon, na te tice alili me cunu kon.
20 Be e caa mi pipégalieng wo Padué, ânebuhe a bwo tabuhi na a bwohemwo [beme e bo mele, ke me e tuwokenye mu he ni ta pwo tenye]. Ke e habwiieng tewé wo Padué he ni benaamwon ce, be caa *ni bénebwéne tan.
21 É mu ko Kériso na geé céihi ne ko Padué na e caa pwo me e mulie cemwo mu ha amele, ke e ne ten a bwo ubwo na a wâé. Weengaa ana me geé temehi pie, wo Padué, ke e bo ne tewé ana e caa te pii. Ke geé *ucéihi ne ha a céihi.
Geé pipwoééhewé
22 Geé caa hegi a [pwooti na] juuju: [a Pwooti Wâé ko Iésu Kériso] ke geé piténedehi, ke caa ciitili taabwon ni ta pwo tewé mu he ni pwonimewé. Ke é mu ko anaa, ke caa jan me geé pipwoééhe lépwo acéihi bééwé mu he ni ju pwonimewé. Ke te nihe wâé heme geé te cuwo ko wonaa.
23 Be geé caa âbeele cemwo, ke a mulie na geé caa hegi, ke te nihe piwéden koja ana geé hegi koja lu nyaa me caa tewé! Be anaa, ke o nyaale ke tépu. Kehe te icehi a mulie na mwo coho na é pii, ke e o mu dieli mwo, be e âbé mu ko a pwooti te Padué, a pwooti na e *mulie dieli mwo.
24 Ati ni apulie,
ke lé pwohewii ni muu meté.
O meiu jélé ati.
O tieden a bwo wâé jélé,
pwohewii a muu buké
na caa meiu, ke e tupwo.
25 É ne ko a pwooti te Padaame,
ke e o te mu die ha a pwonehin!
Ke e o tee cumang dieli mwo.
Ésaïe 40.6−8
A pwooti naa, ke a Pwooti Wâé na caa patemehi tewé!