2
1 É hemepie wonaa, ke tahi taabwon ni huô na ta, pwohewii a pipwohuô, a gele, a pipwokonaado, me a pipii apulie.
2 Wâé heme geé pwohewii a cuwo nahi ewa na mwo ju picileeng, be te céiu cehi a naado na wâé ten, ke a dile ten. Ke wâé heme geé wonaa ko a pwooti te Padué. Geé nenimewé ne kon, ke geé te nihe ilehi, be weengaa a wiinaado [ne ko a pwonimewé] na time e uce pimu ibu me ace céiu naado. Ke e ne tewé, beme ubwo gewé da ne ha a mulie na mwo coho na e kowé.
3 Be geé caa nemi mu ko a bwo wâé Padaame.
Wo Iésu ke pa ju péi paamwa
4 Geé âbé céii Padaame Iésu. Be weeng pa péi na e mulie, [ke pa paa a mulihenye]. Lé téétieng wo lépwo apulie [na ta jélé] kehe icehi ana e pipégalieng wo Padué, be te junihe pwonaado ne kon.
5 Ke wogewé mwo, ke geé pwohewii ni péi na lé mulie. Wâé heme geé pinekewé [te Padué] beme e nekewé ha a Mwaiitihi ten na e ko bahi. A céiu mwo, ke geé pwohewii ni *apwoâpwailo [âpipégali te Padué]. Ke a penem dewé, ke me geé ne ten ni âpwailo, mu ko a *Jenen Iitihi na e kowé. Ke e bo hegi wo Padué mu ko ana e pwo wo Iésu Kériso.
6 Be caa te tii ne he ni tii iitihi [ko Iésu] pie:
Go téne ani, go a puapulie!
É ne ha amu *Sion a péi
na te junihe pwonaado ne kon,
beme a péi paan.
Ke wo pana e céihi ne kon,
ke time e o uce tupwo.
Ésaïe 28.16
7 Te junihe a junaado ne tenye a péi naa, [wo Iésu Kériso] be genye caa céihi ne kon. Kehe icehi ana [weengi a pwooti ko] lépwona muhi telé me lé céihi ne kon:
Ali péi li lé tahi taabwon
wo lépwo abahi mwa,
ke te anaa kuti a ju paamwa.
Psaume 118.22
8 Ke a céiu mwo:
Ke a péi na lé téneda kon;
Ke a péi na e pwo me lé tupwo.
Ésaïe 8.14
Be te muhi telé me lé mwomwohi a pwooti te Padué. Ke wonaa ana me e tuie ne kolé.
Wogewé a puapulie te Padué
9 Kehe wogewé, ke a puapulie na e pipégali, beme e pipwoâpwailo te Padaame: a amu na iitihi, a bele ten. E todekewé mu ha a melepiing nge ha a pwéélang den na junihe wâé, beme geé pii ni wâé ten.
10 Wogewé ânebun lépwona time geé uce puapulie ten, kehe é jenaa, ke wogewé a puapulie te Padué. É ânebun, ke time geé uce hegi a pipwoééhe te Padué, kehe é jenaa, ke geé caa hegi.
A mulihenye ne pele @ nina time lé uce temehieng
11 Wogewé ni ju bééng, wogewé ni apulie na geé âbé ke geé o te engemwo mu pwo a bwohemwo ce. É mu ko anaa, na é ilekewé pie, geé nemwo âcehi nina te nimewé kon na ta, na lé pwopa ne ko a mulihewé.
12 Geé pwo me wâé ace bwopemikewé ne ha awieme nina time lé uce temehi Padué. Be mepie lé pipé ne kowé pie geé pwo aceli ta, ke lé bo alihi nina geé pwo na wâé. Ke me wonaa, ke lé bo pipaunu Padué ha a tan na e bo âbé hen.
Geé piténede lépwo apihuô ha amu
13 Geé piténede lépwo apihuô, wonaa mu ko Padaame: wo pa daame he amu,
14 ke wo lépwo gupéno mwo. Be nelé ngen beme lé pwocuhinaado te lépwona lé pwo ana ta, ke me lé piwâé lépwona lé pwo ana wâé.
15 Be nime Padué ko ani: É mu ko ni bwopemikewé na wâé, ke me geé capuhi ni pwo nina time lé uce temehinaado, be te ju piticenaado ne ko nina lé pii.
16 Geé engen ehi ne he ni bwomu tewé, be caa tuwokewé mu he na geé mu lang. Ke ni bwomu tewé naa, ke me time e uce neduwohi ni penem dewé na ta. Geé engen ehi pwohewii lépwo eabwé te Padué.
17 Geé éewo ko ni apulie ati. Ke geé pwo me eânimewé te ni bééwé, ke geé pipaunu Padué, ke geé éewo ko pa daame he amu.
Nye pwo me piwahin genye @ pwohewii Kériso
18 Wogewé ni *apenem tice ja kon, ke geé ténede lépwo caa tewé ko penem: time uce é ne ko lépwona wâé jélé cehi, ke wâé telé gewé, kehe é ne mwo ko lépwona lé pwo a okéé.
19 Geé mu he ni picani, na me time geé uce mu hen. Ke heme wonaa be nimewé me geé ténede Padué, ke anaa a naado na junihe wâé.
20 Be é hemepie geé pwo ana ta, ke ade aceli wâé heme geé mu he ni picani kon?
Ke hemepie geé cumang ne he ni picani hemepie geé pwo ana wâé, ke a naado na te junihe wâé ne he pwahamii Padué.
21 Be é mu ko anaa, na e todekewé wo Padué. Ke wo Kériso, ke e te mu mwo he ni picani me dewé. Ke e habwii a pwaaden beme geé uti ni apuwon.
22 Weeng panaa:
Time e uce pwo aceli ta.
Mwo te time e uce téele
pipwohuô te pace céiu.
Ésaïe 53.9
23 Lé pii nina ta ne kon,
ke time e uce hegi ko a ta.
É he e mu he ni picani,
ke time e uce heni pace céiu.
E ne a céihi ten ne ko Padué,
na e tauti ne ha a mwomwon.
24 E pé ne ha a één ni ta pwo tenye
ne ko a *kuricé.
É mu ko anaa, ke nye nebwén
me genye mulie ha a ta,
ke jan me genye mulie
ne ha a mulie na wâé te Padué.
É mu ko ni ahinaado kon
na e pwo me wâé gewé.
25 Ânebun, geé pwohewii
lépwo muto na lé pipatieden,
kehe é jenaa,
ke geé caa mwojuia mwobé
céii pa awéihi muto
na e wéihi ni mulihewé.