34
Israelchich kurak tiptsiree mantsir ksutarangana anoo kamanchintspa
1 Apanll nuwaa Esekiyelaatsi tárangiya.
2 Esekiyelaa, nutsish musásimashtaati, ashiritaa nuwaa kuki Israelchichee kurak kamanishini. Ashiri tángcha. Paptsa. Apanll siyaa kurakaatsis waneerunts. Siy Israelchichee wanasir ksutangtsa. Opeeja ksutamapan tamatarparee shingtsa. Itaru, siy nda ashkus saanaatstamari ksutaksa.
3 Nduntaa opeeja siy ksutkus, itaru mimireetsimsha kis waaksa. Mishat, purootstam kamareemis k'tayarus, kamartaksa. Yuwaatssha yungantataru anoo pachaksa.
4 Ashkitaatis, nda yuwaa opeej wanguytaku anoo nda yaramaam zandaksa. Mishat, yuwaatstam kuchakcharu anoo nda irimiypa puntayarus yaraksa. Mishat, yuwaa suwakana anungaz nda nachungayarus, yamayarus waashtam watandpunush wayaksa. Itaru, siysa opeejareetsis mangu kiyung yachaksa, nuw siyaa ksutamapaneetsis atina.
5 Ashiri nuw tputsiri opeej tamapari ashiriya. Kurak nuwaa tputsiri nda ksutkusin, opeeja ksutamapan ndunar, yapsha waritaku ambsha masatumbachusin, tumuzsha anoo katungtariya, nuw tputsiri ashikpaz ashkanaya.
6 Ashiriya, opeej manginap, misha machpitam suwasuwarangana, anungaz ¿chakshtaja nayaniku nachungayach? watam tputs anoo ksutamapan ndunariwa.
7 Ashiri na ksutamapanis nuwaa kuki kaapaniri mazinangtsa.
8 Nuw Apanlli Taarashipani zurampatari siyaa ksutamapaneetsis atina. Ngichkinaareena, tsipatspatari tuwapchima. Siy nda tputsireetsi wanasir ksutkus, saanaatstamari ksutarangus, nuw tputsiri opeej tamatarpari ashirusin masatambarangusin, siy nda nachungakus, tumuzeewsha anoo zayarusin katungaranganaya.
9 Ashirucha, nuw Taarashipani siyaa ksutamapaneetsis atashina. Yuwaa nuw tsiyatkachi anoo kaapaniri mazinangtsa.
10 Nuw Apanlli Taarashipani siyaa atina. Nuw siyaa kundartaktana, watam tputsireetsi istamaam nda zandaksawa. Nuwaa tputsiri ¿tamareeja ksutarangis? anoo mashchintspa. Ashiri yuwaa ashirangis anoo yasayaruri, siyaa tashitungakchuri, ndusha nuwaa tputsiri ksutatssa. Watam nda wanasir ksutkus, kiyung yachaksawa. Ashkachuri, nuwaanasha tputsireetsi ksutchima, Apanll átcha, nuw Esekiyeli siyaa atina.
11 Apanll Taarashipan átcha. Nuwaanasha tputsireetsi ksutkuri taachima.
12 Ksutamapan wanasirimish opeejarini tsípakchu, anungaz urutari nachungtaru, nuwsha ashiritam tputsiri tsípachusin, anungaz uru nachungakuri taachima. Ashiri masatkatssin, tapishpaz ashiru kiyung kachiykachinllina. Anoo uru tapachindachima.
13 Minupsha tsap naatambarangana, anoo yamayaruri, yusur waanshutam watsapun wayachima. Sheeruri, Israelap mach machima. Mishat, wazawpitam kungup machima. Ichingaru yakat yámandachima.
14 Anush wanasirsha katungats katungchinllinaya. Sheersin, Israelamun mach taachinllinaya. Anush nuwaana katungtsee panakuri, katungkusin, anshurisha kanuskusin taachinllinaya.
15 Nuwaantari opeejaa ksutamapan ashiruri, ksutkuri taachina. Ashkuri, tputsiri nizichinllina, anoo wanasirsha wayakchuri, uru kanuschinllinaya, nuw Apanll Taarashipani atina.
16 Tputsireetsi nuwaana wanasir ksutchima. Ksutamapan wanasir opeejarineetsi ksutaru ashtachima. Tputsiri masatkatssin nuwaanasha anungaz uru nachungayaruri, yusur anshutam wayachima. Wandtaati wats chpamawsha yamayachuri, nuwaanasha anoo tapatstashipa tapatstayaruri, uru yarchima. Nuw wanguyawaa, misha matambsheetam, wanuts kapunguwaatstam tatsamooru ksutchima.
17 Nuw Apanlli Taarashipani siyaa atina; mazinangtsa. Ashpatamtis opeej tamapari ashirus taaksa. Itaru, ashpatamtis kaapar tamapari ashirus taaksa. Opeejaa, misha kaaparaatstam tatsamooru nuw wanichima.
18 Ashpatamtis pastoo wanasirimshee kis katungeerus, tazazarus, anootstam pastoo ktsiptis tayutaritamaam kapchaksa. Wakunguree wiree kis waayarus, itaru anootstam kapchayarus kasaksa.
19 Ashiriya, yuwaa pastoo siy kapcharangis anoo nuwsha opeejari nda kis katungkanaya. Yuwaatssha kungoo kaptsayarus, shshutaramchu kasarangis, anootstam nduntam kis waakanaya.
20 Ashirucha, nuw Apanlli Taarashipani atina. Opeej yungatataru an xangitamaa kiyung yachaksin, nuw tatsamooru yasayaruri, wanichima, atina.
21 Siy matambsheewis wizpureerus wanguyawaa kitsiptis kayungambayarus, tununeerus tuzanganiksa. Ashkus, suwasuwakanaya.
22 Itaru, ashkitaatis, nuwaanasha kiyung kachiykana anoo tapachindachima. Antaati anoo opeejareetsi shuchichtarusin, taamaam zandkeezi. Nuwaana opeejareetsi tatsamooru wanasir wayachima.
23 Dapiyaa nuwaanaatsi tputsiri amb zanganchima. Uwsha anush ksutamapan taachiya. An kizpurcha wanasiri. Uwaatssin ksutku taachiya.
24 Nuwaa Apanlleetsi Apanllirineem ínachinllinaya. Tputsireetsshiti Dapiyaa urkareem ínachinllinaya, nuw Apanlli atina.
25 Ashiri nuwsha Israelchichpa tputs wanasir tatsuyakchuri, kissha taachinllinaya. Kpachamsheetssha arap zanganchima. Tputsiri mapiyshtisin kis taaksin, mzatsish, misha manginshutam kis maachinllinaya.
26 Nuw tputsireetsi nuwaanshu pangi tipuranllizee machish wayachima. Nuwaana istakuri sinaatssha zangankachuri, yuwash waritakchu anush sin sinaku taachiya.
27 Tatsumarini wanasir mazarish yusiychiya. Tsap tatsumaam wanasir yanungaku, zapan yusiyku, anoo pusaksin, waanshu watsapun taachinllinaya. Tputsireetsi wanasirsha wayakchuri, yuw tputsireetsi kiyung yachaksin, tumuchchurtarangana, anshtisin tputs nuwaa naatstakchusin, in Apanll Taarashipancha, táchinllinaya.
28 Arapcheewtam tputs ndusha tputsireetsi kiyung yachaksin taachinllinaya. Mishat, manginshuchtam kázamish ndusha zayaru katungku, uru kissha taaksin, nda punichinllinaya.
29 Anuw nuw tsap wanasir wayakchuri, zapan tatsumarineetsi pusachinllinaya. Ashkusin, ndusha marizimum kiyung kachiychinllinaya. Mishat, nduntam tputs waatsin tayutaritkusin, michitchinlliniya.
30 Anumun tputs nuwaa yasachinllinaya, nuw Apanlleeruri tputsiripti taaki anootsi. Nuw Israelchichee tputsirtana. Nuw zurampatari atina.
31 Nuw tputsireetsi opeej tamapari ashiruri siyaa ksutchima. Siysa nuwaa apartana taatssa, nuw Apanlli Taarashipani siyaa atina, Apanll siyaa Israelchicheetsis átcha, nuw Esekiyeli atina.
Ashiriya, kamaneena yuwaa Israelchich kurak tiptsiree mantsir ksutarangsin, itaru Apanllsha waana wanasir ksutchu anootsi.