2
Ewe apwüpwülü lon Kana
2.1-12
1 Iwe, mürin ruu rän a fis eu apwüpwülü lon ewe telinimw Kana lon Kalilea. Inen Jesus we a nom ikenan.
2 Pwal Jesus me nöün kewe chon kaiö ra kö pwe repwe eti ewe apwüpwülü.
3 Iwe, lupwen a it ünümer wain, inen Jesus a üreni, “Esap chüen wor ünümer wain.”
4 Nge Jesus a pölüeni, “Nemin, kosap üreniei mine üpwe föri. Esamwo tori ai fansoun.”
5 Mürin inen Jesus a üreni ekewe chon angang, “Oupwe chök föri mine a ürenikemi.”
6 Iwe, a wor än ekewe chon Juta allükün ar lamalam usun ar repwe limeti inisiir me mettochur lupwen repwe fel ngeni Kot. Iei mine a wor wonu lenien koluk lon ewe imw, masouen eu me eu ina epwe ükükün rüe ika ilik kalon.
7 Iwe, Jesus a üreni ekewe chon angang, “Oupwe alölöü ekei lenien koluk ren koluk.” Iwe, ra alölöör tori ra urela.
8 Mürin Jesus a üreniir, “Iei oupwe üfi och ena koluk o uweela ren ewe chon nemeni ewe kametip.” Iwe, lupwen ra uwala ren ewe koluk
9 mi wiliti wain, ätewe a neni. I esap silei ia ei wain a feito me ie. (Nge ekewe chon angang mi üfi ewe koluk ra silei.) Iei mine ewe chon nemeni ewe kametip a köri ewe mwän apwüpwülü söfö
10 o üreni, “Aramas meinisin ra akomwen uwawu ewe wain mi fokun mürina. Mürin än ekewe chon kökköto ünümi chomong, epwe uwawu ewe wain mi mökükün. Nge en ka amwöchü ewe wain mi fokun mürina tori iei.”
11 Iei aeuin manaman Jesus a föri lon Kana lon Kalilea, iwe, nöün kewe chon kaiö ra lükü i.
12 Mürin ei, Jesus me inan we me pwiin kewe pwal nöün kewe chon kaiö ra feila Kapernaum. Ikenan ra nonom lon ekoch rän.
Jesus a feila lon ewe imwenfel
2.13-22
(Mat 21.12-13; Mark 11.15-17; Luk 19.45-46)
13 Iwe, lupwen a arap fansoun än ekewe chon Juta chulapen Pasofer, Jesus a feila Jerusalem.
14 A tolong lon ewe imwenfel o a küna ekewe mwän mi amömö kow, sip me lisom, pwal ätekewe mi mot ngeni chepel o akasiwili moni.
15 Iei mine a piti efoch säl o aea le cheela ekewe sip me ekewe kow meinisin seni lon ewe imwenfel. A atoropasa ekewe föün moni o akulätä ekewe chepel än ekewe chon akasiwili moni.
16 Iwe, a kapas pöchökül ngeni ekewe mwän mi amömö ekewe lisom, “Oupwe uwawu ekei mettoch seni ikei. Oupwe ükütiu le föri pwe imwen Semei epwe eu imwen amömö.”
17 Iwe, nöün kewe chon kaiö ra chechemeni pwe a mak lon ekewe Toropwe mi Pin, “Ai Kot, ai ekipwichi imwom mi pin a küküri le üti usun eu ekkei.”
18 Mürin ekewe nöüwisen chon Juta ra üreni, “Meni sokun manaman ka tongeni föri om kopwe pwäri ngenikem pwe mi wor om pwüüng pwe kopwe föri ekei föför?”
19 Jesus a pölüeniir, “Oupwe ataela ei imwenfel, nge ngang üpwe aüsefälietä lon ükükün ülüngat rän.”
20 Iwe, ra aisini, “Ifa usun, en ka tongeni aüsefälietä ei imwenfel lon ükükün ülüngat rän? Nge ekewe chon aüetä ei imwenfel ra angang ngeni lon ükükün faik me wonu ier!”
21 Nge ewe imwenfel Jesus a kapas usun, iei inisin.
22 Iei mine lupwen Jesus a manausefäl, nöün kewe chon kaiö ra chechemeni pwe a fen apasa ei. Ra lükü mine a mak lon ekewe Toropwe mi Pin, pwal mine Jesus a apasa.
Jesus a silei usun lapalapen aramas
2.23-25
23 Iwe, lupwen Jesus a nom lon Jerusalem fansoun chulapen ewe Pasofer, chomong aramas ra lükü i, pun ra küna ekewe manaman a föri.
24 Nge Jesus esap lükü ngeniir inisin, pun a silei ekiekin letiper.
25 Esap wor lomoten än eman epwe pwäri ngeni usun eman, pun a püsin silei mine a nom lon leluker.