14
Jesus a apöchöküla eman mwän mi samau
14.1-6
1 Iwe, lon eu ränin sapat Jesus a feila pwe epwe mongö lon imwen eman souemwenin ekewe Farisi. Iwe, ekewe aramas ra chök opoperi.
2 Ikenan a wor eman mwän a feito ren Jesus mi pwo unusen inisin.
3 Iwe, Jesus a aisini ekewe Sensen Allük me ekewe Farisi, “Ifa usun, allükün ach lamalam a mwütätä ach sipwe apöchöküla aramas lon ränin sapat ika sisap?”
4 Nge ir resap apasa och. Iei mine Jesus a amwochatä ewe mwän, a apöchöküla o tinala.
5 Mürin Jesus a üreniir, “Are eman leimi a wor eman nöün ät ika eman nöün kow, a fis ngeni pwe a turulong lon eu chönüttu lon eu ränin sapat, ifa usun, ousap müttir le efietä seni lon ewe chönüttu, inamwo ika a sereni ewe ränin sapat?”
6 Nge ir resap tongeni pölüeni och usun kei kapas.
Tipetekison me etiwetiwöch
14.7-14
7 Iwe, Jesus a küna pwe ekoch wasöla mi fiti ewe mongö ra chök fili ekewe lenien mot än ekewe aramas tekia, iei mine a üreniir meinisin ei pworausen awewe:
8 “Lupwen eman a köruk om kopwe fiti eu kametipen apwüpwülü, kosap mottiu won ewe lenien mot än ekewe aramas tekia. Pun a tongeni fis, pwe eman aramas mi tekia senuk a pwal kö ngeni ewe kametip.
9 Iwe, mürin ewe mi kökkörikemi me ruoman epwe feito o apasa ngonuk, ‘Kopwe tötiu seni ei lenien mot, pwe ätei epwe mot won.’ Mürin kopwe säw o mottiu won eu leni mi tekison.
10 Ina mine, lupwen om kopwe kö, kopwe feila o mottiu won eu lenien mot mi tekison, pwe ewe mi köruk epwe feito o ürenuk, ‘Pwii, kopwe tötä won eu kei lenien mot mi tekia.’ Ren ei epwe wor iteüöchum fän mesen ekewe chon kökköto meinisin.
11 Pun eman aramas mi püsin atekiatä, epwe tekisonotiu, nge eman mi püsin atekisonatiu, epwe tekiatä.”
12 Mürin Jesus a üreni ewe mwän mi köri, “Lupwen ka föri eu mongön leoloas are lekuniol, kosap köri chiechiom kewe ika pwiüm kewe ika aramasom kewe ika chon arum kewe mi pisekisek, pun mürin repwe pwal kökköruk o aliwini ngonuk mine ka fen föri ngeniir.
13 Nge lupwen ka föri eu kametip, kopwe köri ekewe chon mwelele, ekewe chon ter, ekewe chon pechemä me ekewe chon chun.
14 Iwe, ren ei kopwe feiöch, pun resap tongeni aliwini ngonuk mine ka föri ngeniir. Kot epwe liwini ngonuk lon ewe ränin manausefälin ekewe chon pwüng.”
Pworausen awewe usun ewe kametip mi watte
14.15-24
(Mat 22.1-10)
15 Iwe, lupwen eman lein ekewe mwän mi mot ngeni chepel a rong ekei kapas, a üreni Jesus, “Ra feiöch chokewe mi mot ngeni ewe kametip lon Mwün Kot!”
16 Nge Jesus a üreni, “A wor eman mwän a föri eu kametip mi watte o köri chomong aramas pwe repwe eti.
17 Lupwen a tori fansoun ewe kametip, a tinala nöün kewe chon angang pwe repwe asile ngeni ekewe chon kökköto, ‘Oupwe etto, a molotä meinisin.’
18 Nge ir meinisin ra popuetä le künetipingen, eman mürin eman. Ewe aemanün a üreni ewe chon angang, ‘Üa fen möni eu fanü, nge iei üpwe feila o nenengeni. Kose mochen kopwe amusaeila.’
19 Pwal eman a apasa, ‘Üa fen möni engol kow, nge iei üpwe feila o sotuniir. Kose mochen kopwe amusaeila.’
20 Nge pwal eman a apasa, ‘Üa kärän angei eman pwülüei, iei mine üsap tongeni feila.’
21 “Iwe, ewe chon angang a liwinsefäliti an we masta o apworausa ngeni meinisin mine a fis. Mürin ewe masta a fokun lingeringer o üreni nöün we chon angang, ‘Kopwe müttir le feila ngeni ekewe alelap me ekewe alekis lon ewe telinimw o emwenato ekewe chon mwelele, ekewe chon ter, ekewe chon chun me ekewe chon pechemä.’
22 Mürin ewe chon angang a üreni, ‘Ai samol, mine ka allük ngeniei a pwönüetä. Nge a chüen wor leni.’
23 Iei mine ewe masta a üreni ewe chon angang, ‘Kopwe feila lükün ewe telinimw won ekewe al me ünükün ekewe tit o pese ngeni ekewe aramas pwe repwe feito, pwe imwei epwe ur.
24 Pun üa ürenikemi, pwe esap eman ätekewe mi kö repwe neni mongön ai kametip.’ ”
Usun manauen eman nöün Jesus chon kaiö
14.25-33
(Mat 10.37-38)
25 Lon eu rän, lupwen eu mwichen aramas mi chomong ra eti Jesus le fetal, a sap ngeniir o üreniir,
26 “Iö a feito rei esap tongeni nei chon kaiö, are esap echeniei lap seni an echeni saman me inan, pwülüan me nöün kana, pwiin me fefinan kana, pwal mwo nge püsin manauan.
27 Iö esap mwärei püsin an iräpenges o tapweto müri, esap tongeni nei chon kaiö.
28 “Are eman leimi a ekieki an epwe aüetä eu imw tekia, epwe akomwen mottiu o kütta fite ükükün liwinin pisekin, pwe epwe silei are a naf nöün moni an epwe tongeni awesala ewe angang.
29 Are esap föri iei usun, esap tongeni awesala ewe imw tekia mürin an föri longolongun. Iwe, aramas meinisin mi küna met a fis repwe popuetä le takiri ewe aramas
30 o apasa, ‘Ei mwän a popuetä le aüetä eu imw tekia, nge esap tongeni awesala.’
31 “Are eman king me engol ngeröü nöün sounfiu ra feila pwe repwe maun ngeni pwal eman king me rüwe ngeröü nöün sounfiu, ewe king epwe akomwen mottiu o ekieki are epwe naf an pöchökül an epwe tongeni maun ngeni pwal ewe eman king.
32 Nge are a mefi pwe esap tongeni maun ngeni, epwe tinala nöün chon künö ren pwal ewe eman king o tüngor ngeni won met epwe wor ren kinamwe lefiler me mwen an epwe feito.
33 Ina chök usun, esap wor eman a tongeni nei chon kaiö are esap pölükü meinisin mine a eäni.
Salt mi nepatapat
14.34-35
(Mat 5.13; Mark 9.50)
34 “Salt a mürina. Nge are salt a nepatapatala, esap wor och mine sipwe anekenikensefäli ngeni.
35 Esap wor lomotan ngeni ewe pwül ika ngeni an epwe koiasi, epwe chök koturula. Iö a wor selingan epwe rongorong.”