1 Lon eu rän, lupwen chomong chon ioni takises me chon tipis ra mwicheto ren Jesus pwe repwe rongorong an afalafal, 2 ekewe Farisi me Sensen Allük ra popuetä le ngününgünü o üra, “Ei mwän a etiwa chon tipis, a pwal mwo nge etiir le mongö.” ✡ 3 Iei mine Jesus a üreniir ei pworausen awewe: 4 “Are eman leimi a nöüni ipükü sip, nge eman me leir a mwalechela, met ätei epwe föri? Epwe likiti ekewe tiwe me tiweman sip lon ewe leni mi amassawa, epwe feila o kütta ewe eman mi mwalechela tori an epwe küna. 5 Nge lupwen a küna, a fokun pwapwa. Iwe, a ekietä won afaran 6 o uweesefäliela lon lenian. Mürin epwe körifengeni chiechian kana me chon arun kana o üreniir, ‘Ousipwe fokun pwapwa, pun üa küna nei we sip mi mwalechela.’ 7 Ngang üpwe ürenikemi, ina chök usun epwe wor watten pwapwa lon läng fän iten eman chon tipis mi aier, lap seni ekewe tiwe me tiweman aramas mi pwüng, ra ekieki pwe esap wor lomoten ar repwe aier.

8 “Ika a wor eman fefin mi eäni engol föün moni silifer, nge eföü a pöüt seni. Met neminei epwe föri? Epwe atina eu lamp, epwe pirumwei lon imwan o achocho ngeni le kütta tori epwe küna. 9 Iwe, lupwen a küna, epwe körifengeni chiechian kana me chon arun kana o üreniir, ‘Ousipwe pwapwa, pun üa küna ewe eföü föün moni mi pöüt seniei.’ 10 Ngang üpwe ürenikemi, ina chök usun nöün Kot kewe chon läng repwe fokun pwapwa fän iten eman chon tipis mi aier.”

11 Iwe, Jesus a sopwela le üra, “A wor eman mwän a nöüni ruoman alüal. 12 Iwe, ewe mi kükün a üreni saman we, ‘Semei, kopwe ngeniei wisei me lon woumw.’ Iei mine ewe sam a ineti mettochun ngeni nöün kewe ruoman alüal. 13 Ekoch rän mürin ewe nau mi kükün a amömöla mettochun kewe o feila seni lenian fän ewe moni. Iwe, a feila lon eu fanü mi toau, nge ikenan a fangesoroula nöün we moni ren an föföringau. 14 Iwe, lupwen a itela nöün we moni meinisin, a fis eu lengita mi watte won unusen ewe fanü. Mürin esap chüen wor mine ei alüal epwe manau seni. 15 Iei mine a feila o küt an angang ren eman chon ewe fanü. Iwe, ätewe a tinala ewe alüal lon fanüan pwe epwe tümwünü nöün kewe pik. 16 Iwe, tipen ewe alüal epwe mongö anen ekewe pik kewe mongö, nge esap wor eman a ngeni och. 17 Mürin a nela lelukan. Iwe, a apasa, ‘Nöün semei kewe chon angang mi liwin meinisin a watte aner, lap seni ar tongeni mongö, nge iei üa nom ikei lon ai mään echik. 18 Üpwe ütä o liwinla ren semei o üreni: Semei, üa tipis ngeni Kot pwal ngonuk. 19 Üsap chüen fich ngeni ai üpwe eman noumw, kopwe chök anomuei lon tettelin eman chon angang.’ 20 Iwe, ewe alüal a ütä o liwinsefäliti saman. Nge lupwen a chüen toau seni lenian, seman we a küna o a fokun tongei. A sä ngeni, a romi o mitiri. 21 Iwe, ewe alüal a apasa, ‘Semei, ngang üa tipis ngeni Kot pwal ngonuk. Üsap chüen fich ngeni ai üpwe iteni noumw.’ 22 Nge ewe sam a köri nöün kewe chon angang o üreniir, ‘Oupwe kaila, uwato echö üf mi fokun mürina o aüföüfa ngeni. Oupwe uwalong won aütün pöün efoch ring o aipweipwa sus. 23 Mürin oupwe feila o uwato ewe nienifön kow mi oumanau o niela. Ousipwe mongöfengen o pwapwa! 24 Pun nei ei alüal a mäla, nge iei a manausefäl, a mwalechela, nge iei a liwinsefälito.’ Iwe, ra popuetä ewe kametip.

25 “Nge lon ena fansoun ewe mwänichi a nom lemäl. Iwe, lupwen a liwiniti lenian o kan ngeni imwan we, a rong tikin pisekin ettik me pworuk. 26 Iwe, a köri eman ekewe chon angang o aisini, ‘Met ei a fis?’ 27 Ewe chon angang a pölüeni, ‘Pwiüm we a liwinsefälito, nge semom a niela ewe nienifön kow mi oumanau, pun nöün we a liwinsefälito ren lon an manau me pöchökül.’ 28 Iwe, ewe mwänichi a fokun song, pwe esap mochen tolong lon ewe imw. Iei mine saman we a towu ren o tüngormau ngeni pwe epwe tolong. 29 Nge ewe mwänichi a üreni saman we, ‘Nengeni, lon chomong ier, ngang üa angang ngonuk usun eman amanau. Üsap fokun aleasolap ngeni met ka allük ngeniei. Nge en, esap wor met ka ngeniei, esap mwo nge eman nienifön kuuch pwe üpwe föri eu kametip ngeni chiechiei kewe. 30 Nge lupwen noumw ei alüal mi olusmwäliela woumw ngeni fin lisowu a liwinto, en ka niela ewe nienifön kow mi oumanau fän itan.’ 31 Iwe, ewe sam a pölüeni, ‘Nei, en ka nom rei fansoun meinisin, nge mettoch meinisin mine üa eäni iei om. 32 A fokun öch ach sipwe kametip o pwapwa, pun pwiüm we a mäla, nge iei a manausefäl, a mwalechela, nge iei a liwinsefälito.’ ”