16
Ewe souwa mi tipachemsolä
16.1-13
1 Iwe, Jesus a üreni nöün kewe chon kaiö, “A wor eman mwän mi pisekisek, mi wor eman nöün chon angang mi souwani mettochun meinisin. Ewe mwän mi pisekisek a rong pwe ewe chon souwa a asolapala mettochun.
2 Iei mine a köri ewe chon souwa o üreni, ‘Met ei üa rongorong usumw? Kopwe pwäri ngeniei puken ekewe mettoch ka souwani, pun kosap chüen tongeni wiseni wisom we.’
3 Iwe, ewe chon souwa a ekieki lon letipan, ‘Ai we masta epwe atowuei seni wisei we. Met üpwe föri? Esap naf ai pöchökül ai üpwe tuw warawar, üa pwal säw ai üpwe tüngorfeil.
4 Iei üa silei met üpwe föri, pwe lupwen üpwe towu seni wisei we aramas repwe etiwaei lon imwer.’
5 Iei mine a körato ekewe aramas meinisin mi wor ar liwinimang ngeni an we masta. Iwe, a aisini ewe aemanün, ‘Fite ükükün om liwinimang ngeni ai we masta?’
6 A pölüeni, ‘Walupükü kalon apüra seni föün olif.’ Iwe, ewe chon souwa a üreni, ‘Kopwe angei om we toropwen liwinimang, kopwe müttir mottiu o makkeetiu föpükü kalon.’
7 Mürin a aisini ewe aruomanün, ‘Fite ükükün om liwinimang?’ Ätewe a pölüeni, ‘Engeröü tuk pilawa.’ Iwe, ewe chon souwa a üreni, ‘Kopwe angei om toropwen liwinimang o makkeetiu walupükü tuk.’
8 Iei mine ewe samol a ingeiti ewe chon souwa mi atuputup, pun a eäni tipachem lon an föför. Pun aramasen ei fanüfan ra kon tipachem lon ar angang ngeni pilor kana, lap seni ekewe aramas mi nonom lon saram.”
9 Iwe, Jesus a sopwela le kapas, “Üpwe ürenikemi: Oupwe aea wöün fanüfan an epwe wor chiechiemi, pun lupwen epwe itela, repwe etiwakemi lon ewe leni ia aramas repwe nom ie tori feilfeilachök.
10 Eman mi allükülük le tümwünü mettoch mi kisikis, epwe pwal allükülük le tümwünü mettoch mi watte. Nge eman esap allükülük le tümwünü mettoch mi kisikis, esap pwal allükülük le tümwünü mettoch mi watte.
11 Iei mine are ousap allükülük lon ämi angang ngeni wöün fanüfan, ifa usun än eman epwe lükü ngenikemi ewe wöü mi wesewesen aüchea?
12 Iwe, are ousap allükülük le tümwünü mine än eman, iö epwe ngenikemi mine wesewesen wöümi?
13 “Esap wor eman chon angang a tongeni angang ngeni ruoman samol. Pun epwe oput eman, nge epwe echeni pwal ewe eman, ika epwe tipeni eman, nge epwe turunufasei pwal ewe eman. Ousap tongeni angangepök ngeni Kot me wöün fanüfan.”
Ekoch än Jesus Kapas
16.14-18
(Mat 11.12-13; 5.31-32; Mark 10.11-12)
14 Iwe, lupwen ekewe Farisi ra rongorong ekei kapas, ra esita Jesus, pun ir ra echeni moni.
15 Nge Jesus a üreniir, “Ämi oua alapalapöchükemi fän mesen aramas, nge Kot a silei lelukemi. Pun ekewe mettoch aramas ra ekieki pwe ra kon aüchea ra anioput me ren Kot.
16 “Än Moses kewe Allük me mine a mak lon ekewe puken soufos ra rongofeil tori fansoun Johannes Soupapatais. Seni ena fansoun ewe Pworausen Manau usun Mwün Kot a chöfeil, nge aramas meinisin ra pöchökülelong le tolong lon.
17 Nge epwe fen mecheres pwe läng me fanüfan repwe morola mwen eföü mesen makken ekewe allük epwe talüla.
18 Are eman mwän a mwü seni pwülüan o pwülüeni pwal eman fefin, i a tipisin lisowu, nge eman mwän mi pwülüeni eman fefin mi mwü seni pwülüan a pwal tipisin lisowu.
Ewe mwän mi pisekisek me Lasarus
16.19-31
19 “A wor eman mwän mi pisekisek, a üföüf üf mi parachol me pwechepwech mi fokun mömong o a chök kakametip iteiten rän.
20 A pwal wor eman mwän mi wöüngau itan Lasarus, a kula inisin ren rup, aramas ra uweela lükün asamen imwen ewe mwän mi pisekisek.
21 Ätei a mochen an epwe mongö ekewe mworomworen mongö mi mworotiu seni än ewe mwän mi pisekisek chepel. Nge ekewe mwo kolak ra feito o chönawei rupun kewe.
22 Iwe, a fis pwe ewe mi wöüngau a mäla, nge ekewe chon läng ra uweatä o amota lewon pechen Apraham. Iwe, ewe mwän mi pisekisek a pwal mäla o peias.
23 Lupwen a nom lon hell, a fokun riaföü watte, a anetai mesan o küna Apraham me toau, nge Lasarus a nom arun.
24 Iwe, a kökkötä, ‘Semei Apraham, kopwe tongeei o tinala Lasarus pwe epwe tikilong aütün lon koluk o apatapata chönawei, pun üa fokun riaföü lon ei ekkei.’
25 Nge Apraham a üreni, ‘Nei, kopwe chechemeni pwe lon ränin manauom ka fen angei ekewe mettoch mi mürina meinisin, nge Lasarus a angei ekewe mettoch mi ngau. Nge iei a nom ikei lon an kinamwe, nge en ka nom ikenan lon om riaföü.
26 Nge lükün ekei mettoch meinisin a wor eu pwang mi fokun alolol lefilach, pwe chokewe mi mochen feila reöm seni ikei resap tongeni, nge chokewe mi mochen feito rem seni ikenan resap pwal tongeni.’
27 Iwe, ewe mwän mi pisekisek a üreni, ‘Semei Apraham, üa tüngormau ngonuk, kose mochen kopwe tinala Lasarus lon imwen semei,
28 ren pwii kewe limman. Epwe feila rer o fönöör, pwe resap pwal feito ikei lon ei lenien riaföü.’
29 Nge Apraham a üreni, ‘Mi wor rer ekewe puken Moses me ekewe puken soufos, repwe aüseling ngeniir.’
30 Ewe mwän mi pisekisek a pölüeni, ‘Apwi, semei Apraham, are eman epwe manausefäl seni mäla o feila rer, repwe fokun aier seni ar tipis kana.’
31 Nge Apraham a üreni, ‘Are resap mochen rongorong ngeni ekewe puken Moses me soufos, resap pwal tongeni lükü, inamwo ika eman epwe manausefäl seni mäla.’ ”