24
Jesus a kapas usun talan ewe imwenfel
24.1-2
(Mark 13.1-2; Luk 21.5-6)
1 Mürin än Jesus feila seni ewe imwenfel, nöün kewe chon kaiö ra feito ren o aiti ngeni lingöchün ekewe imw lon ewe lenien fel.
2 Nge Jesus a üreniir, “Ewer, oua nenengeni ekei mettoch meinisin. Enlet, üpwe ürenikemi: Esap fokun wor eföü fau epwe chüen nom lon lenian. Meinisin ekewe fau repwe toropasetiu.”
Riaföü me ninni
24.3-14
(Mark 13.3-13; Luk 21.7-19)
3 Iwe, lupwen Jesus a mot won ewe Chukun Olif, ekewe chon kaiö ra feito ren, nge ir chök. Ra tüngor ngeni, “Kose mochen ürenikem inet epwe fis ekei mettoch meinisin? Kopwe pwäri ngenikem asisilen fansoun om wareto me ewe fansoun sopolan.”
4 Jesus a pölüeniir, “Oupwe mamasa, pwe esap wor eman epwe atupukemi.
5 Pun chomong aramas repwe feito fän itei o apasa, ‘Ngang Kraist!’ Iwe, repwe atupala chomong aramas.
6 Oupwe rongorong akürangen maun me pworausen maun, nge ousap niuokus. Ekei mettoch repwe fokun fis, nge esap tori mwo fansoun sopolan.
7 Fanü me fanü repwe fiufengen o mwü me mwü repwe maunfengen. Epwe wor lengita me chechechin fanü ekis meinisin.
8 Ekei riaföü meinisin ra usun chök ekewe metek eman fefin a eäni me mwen an epwe nöünöüla.
9 Mürin repwe fötekinikemi, repwe atolongakemi lepöün chokewe mi ariaföüükemi o nikemiila. Aramas meinisin repwe oputakemi pokiten itei.
10 Iwe, chomong repwe fangatä ar lükülük lon ena fansoun, repwe afangamäfengeniir lefiler o oputafengeniir.
11 Mürin chomong soufos chofona repwe feito o atupala chomong aramas.
12 Pokiten a wattela föföringau, epwe patapatala ewe chen lefilen aramas.
13 Nge iö epwe likitü tori lesopolan epwe küna manau.
14 Iwe, aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.
Ewe mettoch mi eniweniw
24.15-28
(Mark 13.14-23; Luk 21.20-24)
15 “Iwe, ämi oupwe küna ewe ‘Mettoch mi Eniweniw’, ewe soufos Taniel a kapas usun. Epwe nom lon ewe leni mi pin. (Ewe chon aleani epwe weweiti met wewen ei.)
16 Mürin chokewe mi nom Jutea repwe sütä won ekewe chuk.
17 Eman aramas mi nom won imwan esap wor an fansoun an epwe tötiu o tolong lon imwan pwe epwe angei och.
18 Nge eman mi nom lemäl esap liwiniti imwan an epwe angei üfan sekit.
19 Riaföün ekewe fefin mi pwopwo me ekewe inelap mi oupwu nöür lon ekana rän.
20 Oupwe iotek ngeni Kot pwe ei sokun riaföü esap fis lon fansoun patapat ika lon ränin sapat!
21 Pun riaföün lon ekana rän epwe fen lap seni ekewe riaföü mi fen fis seni lepoputän fanüfan tori ei fansoun, esap pwal fissefäl ena sokun lon ekewe fansoun repwe feito.
22 Are Kot esap amochomochala ekewe rän, esap wor eman aramas epwe manau. Nge pokiten chokewe a filiiretä a amochomochala ekewe fansoun riaföü.
23 Lon ena fansoun, are eman epwe apasa ngenikemi, ‘Nengeni, iei i Kraist!’ ika ‘Nengeni, a nom ikenan!’ ousap lükü ätewe.
24 Pun kraist chofona me soufos chofona repwe war o föri asisil me manaman mi lapalap, pwe repwe mwo nge atupu ekewe chon fil are repwe tongeni.
25 Oupwe rongorong! Ngang üpwe pwäri ngenikemi ekei mettoch mwen ar repwe fis.
26 Iei mine are eman epwe ürenikemi, ‘Nengeni, a nom lon ewe fanüapö!’ ousap feila ikenan. Ika ra apasa, ‘Nengeni, a opola ikei!’ ousap lükü ekei kapas.
27 Pun Nöün Aramas epwe feito usun fifi mi fila lon unusen läng seni ötiu tori lotou.
28 Ia a wor ie eman somä, ikenan ekewe machang iter wolcher ra mwichfengen ie.
Liwinsefäliton Nöün Aramas
24.29-31
(Mark 13.24-27; Luk 21.25-28)
29 “Lon ewe chök otun mürin ewe fansoun riaföü, akkar epwe rochola, maram esap chüen tittin, ekewe fü repwe turutiu me läng, nge ekewe manamanen läng repwe mwöküt seni lenier.
30 Mürin asisilen Nöün Aramas epwe pwäla fän läng, nge aramas meinisin won fanüfan repwe kechü, lupwen repwe küna Nöün Aramas epwe feito won kuchu fän manaman me ling mi lapalap.
31 Iwe, epwe tinala nöün kewe chon läng fän tikin rappwa mi leüömong, pwe repwe amwichafengeni afilian kana seni lepelien fanüfan me rüanü, seni esopun läng tori esopun.
Ekewe kapasen kait seni ewe irä fiik
24.32-35
(Mark 13.28-31; Luk 21.29-33)
32 “Oupwe kaiö eu lessen seni ewe irä fiik. Lupwen palan kana ra anüen fetil o popuetä le pwüküwu chön, oua silei pwe a arap fansoun räs.
33 Iei usun, lupwen oua küna pwe ekei mettoch ra fis, oupwe silei pwe i a arapoto, a molotä an epwe le war.
34 Enlet, üpwe ürenikemi, pwe ei pilon aramas resap mäla tori epwe fisitä ekei mettoch meinisin.
35 Läng me fanüfan repwe morola, nge ai kapas kana resap fokun morola.
Esap wor eman a silei ränin än Jesus epwe war
24.36-44
(Mark 13.32-37; Luk 17.26-30,34-36)
36 “Esap wor eman a silei ewe rän are ewe kulok ekei mettoch repwe fis lon, sap mwo nge ekewe chon läng are ewe Nau, nge ewe Sam echök a silei.
37 Ewe fansoun waren Nöün Aramas epwe usun chök met a fis lon fansoun Noa.
38 Lon ekewe rän mwen ewe noter, ekewe aramas ra momongö o ükün, ra pwüpwülü o akapwüpwülüür tori ewe rän lupwen Noa a tolong lon ewe waimw.
39 Resap silei mine epwe fis tori ewe noter a war o niirela meinisin. Ina usun mine epwe fis lupwen Nöün Aramas epwe war.
40 Lon ena fansoun ruoman mwän repwe angangfengen lemäl, Nöün Aramas epwe angeala eman, nge ewe eman epwe likitätiu.
41 Ruoman fefin repwe üsüsfengen, epwe angeala eman, nge ewe eman epwe likitätiu.
42 Iei mine oupwe mamasa, pun ousap silei lon meni rän ämi Samol epwe wareto.
43 Are ewe souimw epwe silei inet ewe chon solä epwe war, oupwe fokun silei, pwe ätewe epwe nenela, nge esap mwüt ngeni ewe chon solä an epwe atalong imwan we.
44 Iei mine pwal ämi, oupwe molotä fansoun meinisin, pun Nöün Aramas epwe war lon eu otun ousap ekieki ngeni.
Ewe chon angang mi allükülük pwal ewe esap allükülük
24.45-51
(Luk 12.41-48)
45 “Iwe, iö chök ewe chon angang mi allükülük o tipachem? Ätewe an masta epwe seikätä pwe epwe nemeni nöün kewe chon angang o ngeniir wiser mongö lon fansoun fich.
46 Feiöchün ewe chon angang, are an we masta a küna pwe a föri iei usun lupwen a war.
47 Enlet, üpwe ürenikemi, an we masta epwe seikätä, pwe epwe nemeni mettochun meinisin.
48 Nge are ei chon angang a ngau, epwe ekieki lon lelukan, ‘Ai we masta epwe fokun mang an epwe liwinto’,
49 epwe popuetä le wichi chiechian kewe chon angang, epwe pwal momongö me ükün fiti chon sakau.
50 Mürin än ei chon angang we masta epwe liwinto lon eu rän ewe chon angang esap ekieki ngeni, pwal lon eu fansoun esap silei.
51 Iwe, ewe masta epwe apwüngü ngeni mäla o alenia lon lenien ekewe chon likatuputup. Ikewe epwe kechü o akarüngi ie.