25
Pworausen awewe usun ekewe engol föpwül
25.1-13
1 “Lon ewe fansoun Mwün Läng epwe wewe ngeni engol föpwül mi angei nöür kewe lamp o feila souni ewe mwän apwüpwülü söfö.
2 Limman me leir ra tiparoch, nge limman ra tipachem.
3 Ekewe mi tiparoch ra uwei nöür lamp, nge resap uwei alölön nöür kewe lamp.
4 Nge ekewe mi tipachem ra uwei nöür kewe lamp, ra pwal uwei alölöör.
5 Iwe, ewe mwän apwüpwülü söfö a mang le feito, iei mine ir meinisin ra aiesum o möür.
6 Nge lelukenipwin a wor eu kökkö, ‘A war ewe mwän apwüpwülü söfö. Oupwe feila o souni!’
7 Mürin ekewe föpwül meinisin ra pwätä o atinöchü nöür kewe lamp.
8 Iwe, ekewe mi tiparoch ra üreni ekewe mi tipachem, ‘Ouse mochen oupwe ngenikem ekis seni ämi kewe alölö, pun nöüm kei lamp repwe le kunula.’
9 Nge ekewe mi tipachem ra pölüeniir, ‘Amusala, esap fokun naf ngenikemi me äm. Oupwe feila kamö ämi alölö lon sitowa.’
10 Iei mine ekewe föpwül mi tiparoch ra feila pwe repwe kamö ar alölö. Nge lupwen ra feila, ewe mwän apwüpwülü söfö a war. Iwe, ekewe limman föpwül mi molotä ra eti le tolong lon ewe imwen kametipen apwüpwülü, mürin ewe asam a kapüngüla.
11 Nge mürin ekewe limman föpwül ra war. Iwe, ra kökkö, ‘Samol, samol, kose mochen suki ngenikem asam.’
12 Ewe mwän apwüpwülü söfö a pölüeniir, ‘Enlet, üpwe ürenikemi, üsap fokun silekemi.’
13 Iei mine oupwe mamasa, pun ousap silei lon meni rän ika kulok Nöün Aramas epwe war lon.
Pworausen awewe usun ekewe ülüman chon angang
25.14-30
(Luk 19.11-27)
14 “Lon ewe fansoun Mwün Läng epwe wewe ngeni eman mwän mi ekiekin sai ngeni eu fanü toau. A körifengeni nöün kewe chon angang o awisa ngeniir pwe repwe tümwünü pisekin meinisin.
15 A ngeni eman me eman ükükün mine a tufich ngeni: A ngeni eman limungeröü föün moni silifer, a ngeni pwal ewe eman ruungeröü, nge a pwal ngeni ewe eman engeröü. Mürin a sai.
16 Iwe, ewe chon angang mi angei limungeröü föün moni silifer a müttir feila o anganga ewe moni, pwe manauan a tori pwal limungeröü.
17 Ina chök usun ewe mi angei ruungeröü, a pwal anganga ewe moni, pwe manauan a tori pwal ruungeröü.
18 Nge ewe eman chon angang mi angei engeröü föün moni a feila, a tuw eu pwang lepwül o irela än an we masta we moni.
19 Mürin fansoun langatam än ekewe chon angang we masta a liwinsefäl o kütta pworausen nöün kewe moni ra anganga.
20 Ewe chon angang mi angei limungeröü föün moni a feito o isetiu fengen me pwal limungeröü. A apasa, ‘Ai samol, en ka ngeniei limungeröü föün moni. Iei a pwal wor limungeröü föün moni üa apacha ngeni pwe manauan.’
21 An we masta a üreni, ‘Om angang a fokun mürina. En eman chon angang mi mürina o allükülük. Ka fen allükülük won mine a chokükün, iei mine üpwe seikuketä won mine a chomong. Kopwe tolong o etiei lon ai pwapwa.’
22 Mürin ewe chon angang mi angei ruungeröü föün moni a tolong o apasa, ‘Ai samol, en ka ngeniei ruungeröü föün moni. Nge iei a pwal wor ruungeröü föün moni üa apacha ngeni pwe manauan.’
23 An we masta a üreni, ‘Om angang a fokun mürina. En eman chon angang mi mürina o allükülük. Ka fen allükülük won mine a chokükün, iei mine üpwe seikuketä won mine a chomong. Kopwe tolong o etiei lon ai pwapwa.’
24 Mürin ewe chon angang mi angei engeröü föün moni a tolong o apasa, ‘Ai samol, üa silei pwe en eman mwän mi tipepöchökül. Ka kinikin ia kosap fofot ie, ka ionifengeni uän irä ia kosap amworafeili pwükil ie.
25 Üa niuokus, iei mine üa irela nouwm we moni fän pwül. Nengeni, iei noumw we moni.’
26 Iwe, an we masta a pölüeni, ‘En eman chon angang mi ngau o chipwang! Ka fen silei pwe ngang üa kinikin ia üsap fofot ie, üa pwal ionifengeni uän irä ia üsap amworafeili pwükil ie?
27 Epwe fen öch om kopwe iseis nei we moni lon bank, pwe lupwen üpwe liwinsefäl üpwe angesefäli nei we moni fiti manauan.
28 Iei oupwe angei nei we moni seni ätei o ngeni ätenan a eäni engol ngeröü föün moni.
29 Pun iön a wor an, Kot epwe apacha och ngeni an we, pwe epwe somwola. Nge iön esap wor an, Kot epwe fen mwo nge angei seni ewe ekis a wor ren.
30 Nge ren ei chon angang mi lomotongau, oupwe aturawu lükün lon ewe lenien rochopwak. Ikenan epwe pupuchör o akarüngi ie.’
Ewe kapwüngün lesopolan
25.31-46
31 “Iwe, lupwen Nöün Aramas epwe war lon lingan o chon läng meinisin repwe eti, epwe mot won an lenien motun king mi ling.
32 Iwe, chon ekewe mwü meinisin repwe mwichfengen me mwan. Mürin epwe aimwüfeseniir lon ruu mwich, usun eman chon fol man a aimwüfeseni ekewe sip seni ekewe kuuch.
33 Epwe anomu ekewe sip lepelifichin, nge ekewe kuuch epwe anomur lepelimöngun.
34 Mürin ewe king epwe üreni ekewe aramas mi nom lepelifichin, ‘Oupwe feito ämi mi feiöch me ren Semei! Oupwe mwüni ewe mwü mi molotä fän itemi seni lepoputän fanüfan.
35 Pun ngang üa echik, nge ämi oua amongöüei, üa kaka, nge ämi oua aünüei, üa wasöla, nge ämi oua etiwaei lon imwemi.
36 Üa selela, nge ämi oua aüföüfaei, üa apwangapwang, nge ämi oua tümwünüei, üa nom lon fötek, nge ämi oua feito churiei.’
37 Mürin ekewe chon pwüng repwe pölüeni, ‘Äm Samol, inet aia küna pwe ka echik, nge aia amongöök, inet ka kaka, nge aia aünuk?
38 Inet aia küna pwe ka wasöla, nge aia etiwok lon imwem, are inet aia küna pwe ka selela, nge aia aüföüfok?
39 Inet aia küna pwe ka apwangapwang are nom lon fötek, nge aia feila churuk?’
40 Iwe, ewe king epwe pölüeni, ‘Enlet, üpwe ürenikemi: Mine oua föri ngeni eman lein ekewe pwii mi fokun kisikis, iei oua föri ngeniei.’
41 Mürin epwe üreni chokewe mi nom lepelimöngun, ‘Oupwe feil seniei, ämi chon anümamau, oupwe feila lon ewe ekkei esekun a fen amol fän iten Tefil me nöün chon läng kana!
42 Pun üa echik, nge ämi ousap amongöüei, üa kaka, nge ämi ousap aünüei.
43 Üa wasöla, nge ämi ousap etiwaei lon imwemi, üa selela, nge ämi ousap aüföüfaei, üa apwangapwang o nom lon fötek, nge ämi ousap tümwünüei.’
44 Mürin repwe pölüeni, ‘Äm Samol, inet äm aia küna pwe ka echik ika kaka, ika wasöla, ika selela, ika apwangapwang, ika nom lon fötek, nge aisap tümwünuk?’
45 Mürin ewe king epwe pölüeni, ‘Enlet, üpwe ürenikemi: Mine ousap föri ngeni eman lein ekewe mi fokun kisikis, iei ousap pwal föri ngeniei.’
46 Iwe, chokei repwe feila ngeni ewe apwüng esemüch, nge ekewe chon pwüng repwe feila ngeni manau esemüch.”