3
កោរាញឞ្រាសហោមរាប់ជាប់មាផូងអីឆ្រាអែល
1 លាសនទ្រីម៝សនាវខ្លៃតាផូងអីឆ្រាអែល រាលាវឞើសផូងអាអេង? នាវក៝សនតោតាខាន់ពាង់ម៝សនទើគែសនាវខ្លៃ?
2 នាវខ្លៃតាផូងអីឆ្រាអែល គែសនាវខ្លៃអ៝ក់នតីល។ នាវខ្លៃរាលាវឞូជេងកោរាញឞ្រាសលែៈអ៝ន់ជេសនាវងើយពាង់នើមមាផូងអីឆ្រាអែល ។
3 លាសគែសឞូនុយ្សអាបាៈតាផូងអីឆ្រាអែល មោគុរាប់ជាប់តាពាង់ លាសនទ្រីមើមជេង? នាវខាន់ពាង់មោគុរាប់ជាប់អីនៃទើយងគ្រ៝សលើយនាវរាប់ជាប់កោរាញឞ្រាសដ៝ង់លាសមោ?
4 មោអោស! ឞ៝លលាសទឹងលែៈឞូនុយ្សមរោសទាទេ កោរាញឞ្រាសហោមរាប់ជាប់ កើតមាលែៈគែសញចីសតានាវកោរាញឞ្រាសងើយ៖
«អើកោរាញឞ្រាស ទឹងលែៈនទើមៃងើយ ឞូមរាឆៃទីងាន់
លាសឞូនតោនមៃ ហោមទើយមៃនឹង»។
5 អាបៃអ្យាគ៝ប់ងើយតឹងឞូនុយ្សវៃងើយ៖ លាសនាវក្វែផូងឞូនុយ្ស ទឹងគែសមាឆៃនាវឆ៝ង់កោរាញឞ្រាសលើមានហេល លាសនទ្រីមើមឞូនុយ្សលាស? អើមកោរាញឞ្រាសមោឆ៝ង់លាសពាង់តេៈទោយ្សមាឞូនុយ្ស?
6 មោអោស មោគែសអោស។ លាសកោរាញឞ្រាសមោឆ៝ង់ មើមទឹងពាង់ទីមាផាតទោយ្សទឹងលែៈឞូនុយ្សតានែសនតូ?
7 ក្លាប់លាសគែសឞូនុយ្សអាបាៈលាស៖ “នាវគ៝ប់មរោសជានអ៝ន់នាវងាន់កោរាញឞ្រាសលើហោឞូលឺរានេពាង់ លាសគែសនាវអ្វែសកើតនៃ មើមទឹងកោរាញឞ្រាសហោមតេៈទោយ្សនាវតីសគ៝ប់?”
8 គែសឞូនុយ្សអាបាៈងើយញចើតមាផូងញឆីងឞ៝ន់ លាសមាផូងឞ៝ន់នតីកើតនអា៖ «អ៝ន់ឞ៝ន់ជានអ្យើស គៃមាលោសនាវអ្វែស»។ ឞូម៝សអីងើយកើតនៃជេងទីងាន់គែសទោយ្ស!
ទឹងលែៈឞូនុយ្សតីសទាទេ
9 លាសនទ្រីទីដ៝ង់ហេនអីផូងអីឆ្រាអែល ជេងឞូនុយ្សអ្វែសរាលាវឞូអេង? មោអោស។ លែៈគ៝ប់លាសនហេលជេសទឹងលែៈឞូនុយ្សលែៈជានតីសទាទេ ឞ៝លលាសផូងអីឆ្រាអែល កាដោយ ផូងអីមោទីផូងអីឆ្រាអែល កាដោយ ទឹងលែៈឞ៝ន់នើសជានតីសទាទេ។
10 លែៈគែសញចីសតានាវកោរាញឞ្រាសងើយកើតនអា៖
«មោគែសអោសឞូនុយ្សឆ៝ង់ ទូហ្វេមោគែសដ៝ង់។
11 មោគែសអោសទូហ្វេឞូនុយ្សគែសនាវមឹនគឹតឞ្លាវងាន់
មោគែសអោសទូហ្វេឞូនុយ្សជ៝យអុចជានតឹងកោរាញឞ្រាស។
12 ទឹងលែៈឞូនុយ្សលែៈនទោនកើយជេសឞើសកោរាញឞ្រាស មោអុចអ្យាត់ពាង់ ទឹងលែៈឞូនុយ្សមោហោមគែសនាវខ្លៃមាពាង់។
មោគែសអោសឞូនុយ្សជាននទើអ្វែស
ឞ៝លលាសទូហ្វេមោគែសដ៝ង់»។
13 «នាវងើយលោសឞើសមឞូងខាន់ពាង់តឹមឞានមាបោអោមលោសឞើសនតូមោចមហែ
យ៝រលាសនទើខាន់ពាង់ងើយអ្យើសងាន់ មព្យាត់ខាន់ពាង់ងើយមរោសរាលាម់ឞូ»។
«នាវងើយលោសឞើសមឞូងខាន់ពាង់តឹមឞានមាគែសកាច់ឞេសកូឞេសអ្វៃ យ៝រមាជានអ៝ន់ឞូគែសនាវជីទុតហោតានូយ្សនហ៝ម់»។
14 «នាវងើយលោសឞើសមឞូងខាន់ពាង់ឞេងមានាវរាតាប់នាវរាក នទ្រែលមាងើយឆោត»។
15 «ខាន់ពាង់គើញងាន់ងខឹតញចាយមហាមឞូ
16 អាសត្រ៝ងខាន់ពាង់ហាន់ជានអ៝ន់ឞូហេងលែៈផ្យៅរ៝ ជានអ៝ន់ឞូរេសរាញាល់ងាន់
17 ខាន់ពាង់មោគឹតអោសត្រ៝ងដាប់មពាន់»
18 «ខាន់ពាង់មោក្លាចមោយើកកោរាញឞ្រាសដ៝ង់»។
19 ឞ៝ន់លែៈគឹតទឹងលែៈនាវវៃមោឆេ អីលែៈគែសញចីស ដាៈអ៝ន់មាផូងអីឆ្រាអែល អីលែៈគុតាន៝ម់នាវវៃអីនៃទើម។ លាសនទ្រីទឹងលែៈឞូនុយ្សអ្យាត់មាគុរាក្លាក់មោហោមគែសនាវមាញឆីស ទឹងលែៈឞូនុយ្សលាមនែសនតូគែសទោយ្សតានាប់មាត់កោរាញឞ្រាសទាទេ។
20 មោគែសអោសទូហ្វេឞូនុយ្សអីកោរាញឞ្រាសកើបឆ៝ង់យ៝រមាញឆ្រោយ្សជានតឹងនាវវៃអីនៃទើម នាវវៃមានមាអ៝ន់ឞូនុយ្សគឹតនាល់លែៈជានតីសទើម។
ឞូនុយ្សញឆីងទឹងកើបលែៈឆ៝ង់
21 យើនមាអាបៃអ្យាកោរាញឞ្រាសលែៈញហើជេស អាមើមឞូនុយ្សជានគៃមាពាង់កើបឆ៝ង់ យ៝រលាសនាវពាង់កើបឆ៝ង់មោអោសតាៈឞើសជានតឹងនាវវៃអីនៃ។ ជេសរីអាមើមជានគៃមាកោរាញឞ្រាសកើបឆ៝ង់លែៈគែសញចីសតានាវវៃ នអ៝ប់មាលែៈគែសញចីសតាឆ៝ម់បុតមពោលឞូនុយ្សនតើយ្សនាវងើយកោរាញឞ្រាស។
22 កោរាញឞ្រាសកើបឞូនុយ្សឆ៝ង់យ៝រមាញឆីងមាឞ្រាសយេឆូក្រីស ។ ទឹងលែៈឞូនុយ្សអីគែសនាវញឆីងអីនៃកោរាញឞ្រាសកើបឆ៝ង់ទាទេ នាវអីនៃទីមាទឹងលែៈឞូនុយ្ស ផូងអីឆ្រាអែល នអ៝ប់មាផូងអីមោទីផូងអីឆ្រាអែល ដ៝ង់
23 យ៝រលាសទឹងលែៈឞូនុយ្សលែៈជានតីសទាទេ មោគែសអោសទូហ្វេជានទុតអ្វែសកើតកោរាញឞ្រាសអុច។
24 យើនមាកោរាញឞ្រាសកើបឞ៝ន់លែៈឆ៝ង់ តាៈឞើសនាវអ្វែសពាង់នើមអ៝ន់ទើមទាម យ៝រលាសលែៈពាង់ច្វាយជេសឞ៝ន់មានទើឞ្រាសក្រីសយេឆូ លែៈជាន។
25 កោរាញឞ្រាសលែៈអ៝ន់ជេសឞ្រាសយេឆូ ជេងនទើមាជានឞ្រាស មហាមឞ្រាសយេឆូ ច្វាយនាវតីសឞូនុយ្សអីញឆីងមាពាង់។ កោរាញឞ្រាសជានកើតនៃគៃមាញហើពាង់នើមលែៈឆ៝ង់ ឞ៝លលាសឞើសនតើមនើសឞូនុយ្សជានតីស ពាង់មោអោសតេៈទោយ្សរ៝។
26 អាបៃអ្យាពាង់ញហើនាវឆ៝ង់ពាង់នើមអ៝ន់ឞូគឹតនាល់ កោរាញឞ្រាសលែៈអើមឆ៝ង់ ជេសរីឞូម៝សអីញឆីងមាឞ្រាសយេឆូ ពាង់កើបលែៈឆ៝ង់ដ៝ង់។
27 លាសនទ្រីអាសហោមគែសទូហ្វេឞូនុយ្សឞ្លាវរានេអេងឆាក់ពាង់លាសជេងឞូនុយ្សឆ៝ង់? មោហោមគែសអោស! យ៝រលាសនាវកោរាញឞ្រាសមោហោមកើបនាវតីសឞូនុយ្សជេងតាៈឞើសនាវញឆីងមាឞ្រាសយេឆូ មោអោសតាៈឞើសញឆ្រោយ្សជានតឹងនាវវៃមោឆេ ។
28 យ៝រលាសឞ៝ន់អ្យាត់ ឞូនុយ្សទឹងឆ៝ង់យ៝រមាញឆីងមាឞ្រាសយេឆូ មោទីអោសយ៝រមាជានតឹងនាវវៃអីនៃ។
29 អើមកោរាញឞ្រាសអីឞ្រាសមាផូងអីឆ្រាអែល ទើមបាស? មោអោស ពាង់ឞ្រាសនអ៝ប់មាផូងអីមោទីផូងអីឆ្រាអែល ដ៝ង់។
30 គែសទូហ្វេកោរាញឞ្រាសទើម។ ពាង់ជានអ៝ន់ផូងអីឆ្រាអែល ទឹងគែសមាឆ៝ង់ យ៝រលាសខាន់ពាង់ញឆីងមាឞ្រាសយេឆូ នអ៝ប់មាផូងអីមោទីផូងអីឆ្រាអែល ទឹងគែសមាឆ៝ង់ យ៝រមាខាន់ពាង់ញឆីងមាឞ្រាសយេឆូ ដ៝ង់។
31 លាសនទ្រីអាសនាវញឆីងមាឞ្រាសយេឆូ គែសងគ្រ៝សលើយនាវវៃមោឆេ លាសមោ? មោអោស! យើនមាលាសឞ៝ន់ញឆីងមាឞ្រាសយេឆូ ទឹងឞ៝ន់ញអោតងាន់នាវវៃអីនៃ។