3
ᑖᓐ ᒋᐹ ᐃᑌᔨᐦᑖᑯᓲᒡ ᑳ ᓃᑳᓂᔥᑲᐦᒀᐤ ᐊᔨᒥᐦᐁᐅᑲᒥᒄ
1 ᐁᐅᒄ ᐆ ᑖᐺ ᑎᔮᐺᒪᑲᐦᒡ ᐃᑗᐎᓐ, ᐊᐌᓐ ᐁ ᐃᑌᔨᐦᑕᒪᐦᐄᑰᑴ ᒉᒌ ᓃᑳᓂᔥᑯᐙᑦ ᐅᒫᒨᐊᔨᒥᐦᐋᐤᐦ ᓈᔥᒡ ᒥᔻᔑᔫ ᐅᔫ ᐋᐸᑎᓱᐎᓂᔫ ᑳ ᐃᔑ ᐎᔦᔨᐦᑕᒥᐦᐄᑯᑦ ᒉᒌ ᐃᐦᑑᑕᐦᒃ᙮
2 ᐊᓐ ᒫᒃ ᐊᐌᓐ ᑳ ᓃᑳᓂᔥᑯᐙᑦ ᐅᒫᒨᐊᔨᒥᐦᐋᐤᐦ ᓂᑕᐌᔨᐦᑖᑯᓲ ᐁᑳ ᒉᒌ ᐃᐦᑕᑯᓂᔨᒡ ᒉᒀᔫ ᒉᒌ ᐃᔑ ᐊᑖᒣᔨᐦᑖᑯᓯᑦ, ᑲᔦ ᔮᐃᑌᐃ ᒉᒌ ᐯᔭᑯᐦᐋᑦ ᐐᒋᔅᑴᐤ ᓈᐴᑴ᙮ ᓂᑕᐌᔨᐦᑖᑯᓲ ᐁᔫ ᐯᐦᑳᒡ ᒉᒌ ᐃᔑ ᐱᒫᑎᓰᑦ, ᑲᔦ ᒉᒌ ᒥᔪ ᓇᓈᑲᑕᐌᔨᐦᑕᒥᐦᐄᑯᑦ ᑖᓐ ᐁ ᐃᔑ ᐱᒫᑎᓰᑦ, ᑲᔦ ᔮᒀᐤ ᒋᐹ ᐃᔑ ᐐᐸᔨᐦᑖᐤ ᒉᒀᔫ ᑖᓐ ᐁ ᐃᔑ ᐃᐦᑑᑕᐦᒃ᙮ ᐊᓐ ᐊᐌᓐ ᑳ ᒥᔦᔨᐦᑕᐦᒃ ᒫᓂᑌᐤᐦ ᐁ ᐲᐦᑕᑲᐦᐋᑦ ᐁᑯᓐ ᒋᐹ ᐃᑌᔨᐦᑖᑯᓲ᙮ ᒋᐹ ᑲᔅᒋᐦᐆ ᑲᔦ ᐁ ᒋᔅᑯᑕᒫᒉᑦ᙮
3 ᐁᒄ ᒫᒃ ᓇᒧᐃ ᑳ ᐐᐦᒋᐯᑦ ᐊᐌᓐ ᒋᐹ ᐅᐦᒋ ᐃᑌᔨᐦᑖᑯᓲ᙮ ᓇᒧᐃ ᑲᔦ ᒋᐹ ᐅᐦᒋ ᐗᐅᓵᒣᔨᐦᑖᑯᓲ ᐋᑦ ᐁᑳ ᐙ ᓇᓂᐦᐁᔨᐦᑕᒥᐦᐄᑰᒡ ᒉᒀᔫ, ᒋᐹ ᒋᔮᒣᔨᐦᑖᑯᓲ᙮ ᓇᒧᐃ ᑲᔦ ᒋᐹ ᐅᐦᒋ ᐌᐦᒋᐸᔫ ᒉᒌ ᒪᒋᐸᔨᐦᑲᐦᑕᐙᑦ ᐊᐌᔫ, ᑲᔦ ᓇᒧᐃ ᒋᐹ ᐅᐦᒋ ᐃᑌᔨᐦᑕᒥᐦᐄᑰ ᒉᒌ ᐌᔫᒡ ᐊᔮᑦ ᔔᓕᔮᔫ᙮
4 ᓂᑕᐌᔨᐦᑖᑯᓲ ᑲᔦ ᐆ ᐊᐌᓐ ᒉᒌ ᒥᔪ ᓇᓈᑲᑕᐌᔨᐦᑕᐦᒃ ᐊᓂᑦ ᐁ ᐯᔭᑯᑌᐅᓰᑦ ᑲᔦ ᒋᐹ ᐃᐦᑑᑕᐌᐤ ᐅᑕᐙᔒᒻ ᒉᒌ ᓇᓂᐦᐄᐦᑖᑯᑦ ᐁ ᒋᔅᑌᔨᒥᑯᑦ᙮
5 ᐌᔥ ᐊᐌᓐ ᐁᑳ ᒉᒌ ᒥᔪ ᓇᓈᑲᑐᐌᔨᐦᑕᒥᐦᐄᑰᑴ ᐊᓂᑦ ᐁ ᐯᔭᑯᑌᐅᓰᑦ ᑖᓂᑌ ᒉᒌ ᐅᐦᒋ ᒥᔪ ᓇᓈᑲᑐᐌᔨᒫᑦ ᐊᓂᔫ ᒋᔐᒪᓂᑑ ᐅᑏᓃᒥᔫᐦ᙮
6 ᑲᔦ ᒫᒃ ᓇᒧᐃ ᐊᐌᓐ ᐊᓄᐦᒌᔥ ᐁ ᒌ ᐱᒫᒋᐦᐅᑦ ᒋᐹ ᐅᐦᒋ ᓃᑳᓂᔥᑯᐌᐤ ᒋᔐᒪᓂᑑ ᐅᑏᓂᒥᔫᐦ ᐌᔥ ᒋᑳ ᒌ ᐃᔑᓈᑯᓲ ᓈᔥᒡ ᒋᐦᒋᐌ ᒉᒌ ᐃᑌᔨᒥᓱᑦ, ᒋᑲ ᒌ ᐸᐦᒋᔑᓐ ᒫᒃ ᒉᒌ ᐃᔑ ᓂᔔᓈᒋᒫᑲᓅᑦ ᒬᐦᒡ ᒪᒋᒪᓂᑑᐦ ᒉ ᐃᔑ ᓂᔔᓈᒋᒫᑲᓄᔨᒡ᙮
7 ᑲᔦ ᒫᒃ ᐊᓐ ᐊᐌᓐ ᐅᔫ ᑳ ᐃᑖᐸᑎᓯᑦ ᒋᐹ ᒥᔪ ᑎᐹᑐᑕᒥᔫ ᐅᐱᒫᑎᓰᐎᓐ ᐊᓂᔫᐦ ᐊᐌᔫ ᐁᑳ ᑳ ᐱᒫᒋᐦᐅᔨᒡ᙮ ᐌᔥ ᒥᔪ ᑎᐹᒋᒫᑲᓅᑌ ᓇᒧᐃ ᑲᑕ ᒌ ᐃᐦᑑᑖᑰ ᒪᒋᒪᓂᑑᐦ ᒉᒌ ᓇᒀᑎᑯᑦ᙮
ᑖᓐ ᒋᐹ ᐃᔑ ᐱᒫᑎᓯᔫᒡ ᐊᓂᒌ ᑳ ᐐᒋᐦᐄᐌᑣᐤ ᐊᔨᒥᐦᐁᐅᑲᒥᑯᔫ ᐁ ᓈᓈᑲᒋᐦᑖᑲᓄᔨᒡ
8 ᑲᔦ ᒫᒃ ᐊᓂᒌ ᑳ ᐐᒋᐦᐄᐌᑣᐤ ᑖᓐ ᐁ ᐃᔑ ᓈᓈᑲᒋᐦᑖᑲᓄᔨᒡ ᐊᔨᒥᐦᐁᐅᑲᒥᑯᔫ ᒋᐹ ᑖᐺᐅᒉᔨᐦᑖᑯᓲᒡ ᑲᔦ ᒨᔥ ᑯᐃᔅᒄ ᒋᐹ ᐃᑎᐦᑖᑯᓂᔫ ᐅᑕᔨᒧᐎᓇᐙᐤ᙮ ᓇᒧᐃ ᒋᐹ ᐅᐦᒋ ᐐᐦᒋᐯᐅᒡ ᑲᔦ ᓇᒧᐃ ᒋᐹ ᐅᐦᒋ ᓵᒋᐦᑖᐅᒡ ᔔᓕᔮᔫ᙮
9 ᓲᐦᒃ ᒋᐹ ᐐ ᒪᒣᒋᒥᓇᒧᒡ ᑖᓐ ᐁ ᐃᔑ ᑖᐺᒪᑲᓂᔨᒡ ᐊᓂᔫ ᐁ ᐃᔑ ᑖᐺᐦᑕᒧᒄ ᐊᓂᔫ ᑮᐹ ᑳ ᐃᔑ ᒋᔅᒉᔨᐦᑕᒻᐦᐄᑰᐦᒄ᙮ ᒋᐹ ᒉᔥᑎᓈᑌᔨᒥᓲᒡ ᑯᐃᔅᒄ ᐁ ᐃᔑ ᐱᒫᑎᓰᑣᐤ᙮
10 ᐁᑯᔥ ᒫᒃ ᓃᔥᑕᒻ ᒋᑲ ᐐ ᓈᓂᑑ ᑲᒉᔅᒉᔨᒫᑲᓅᒡ ᐅᒌ ᑖᓐ ᓂᐦᐋᐤ ᐁ ᐃᑌᔨᐦᑖᑯᓯᑣᐤ ᐁᒄ ᒫᒃ ᓅᑯᓂᔨᒉ ᐁ ᑯᐃᔅᑯᑖᑎᓰᑣᐤ ᐁᒄ ᒉ ᒥᔮᑲᓅᑣᐤ ᒉᒌ ᐐᒋᐦᐄᐌᑣᐤ ᐁ ᓈᓈᑲᒋᐦᑖᑲᓄᔨᒡ ᐊᔨᒥᐦᐁᐅᑲᒥᑯᔫ᙮
11 ᐐᒋᔅᑴᐙᐤᐦ ᒋᐹ ᑖᐺᐅᒉᔨᐦᑖᑯᓯᔫ ᑲᔦ ᓇᒧᐃ ᒋᐹ ᐅᐦᒋ ᓂᑕᒧᒄ ᐃᑖᒋᒣᐅᒡ ᐊᐌᔫ ᑲᔦ ᐯᐦᑳᒡ ᒋᐹ ᐃᔑ ᐱᒫᑎᓯᔫᒡ ᑲᔦ ᒫᒃ ᔮᒀᐤ ᒋᐹ ᐃᐦᑑᑕᒧᒡ ᒥᓯᐌ ᒉᒀᔫ᙮
12 ᑲᔦ ᒫᒃ ᐊᓐ ᑳ ᐐᒋᐦᐄᐌᑦ ᐊᔨᒥᐦᐁᐅᑲᒥᑯᐦᒡ ᒋᐹ ᐯᔭᑯᐦᐁᐤ ᐐᒋᔅᑴᐤ ᓈᐴᑴ ᑲᔦ ᔮᐃᑌᐃ ᒋᐹ ᒥᔪ ᓂᐦᑖᐅᒋᓀᐤ ᐅᑕᐙᔒᒻ ᑲᔦ ᒋᐹ ᒥᔪ ᓇᓈᑲᑕᐌᔨᐦᑕᒥᐦᐄᑰ ᐊᓂᑦ ᐊᓂᔫ ᐁ ᐯᔭᑯᑌᐅᓰᑦ᙮
13 ᐌᔥ ᑖᐺ ᒥᔪ ᓇᓈᑲᑐᐌᔨᐦᑕᐦᒀᐌᓂᒡ ᐊᓂᔫᐦ ᐅᑖᐸᑎᓱᐎᓇᐙᐤᐦ ᐁᑯᑦ ᔮᒀᐤ ᒉ ᐅᐦᒋ ᐃᑌᔨᒥᑯᑣᐤ ᐊᐌᔫ ᑲᔦ ᐁᑯᑦ ᐁᑎᑑ ᒉ ᐅᐦᒋ ᐌᐦᒋᐸᔨᔨᒡ ᓲᐦᒃ ᐁ ᐋᔨᒨᑕᐦᒀᐤ ᑖᓐ ᐁ ᐃᔑ ᑖᐺᔨᒫᑣᐤ ᒌᓴᔅ ᙭᙮
ᐊᓐ ᐁᑳ ᐅᐦᒋ ᒋᔅᒉᔨᐦᑖᑯᐦᑖᑯᓅᐦᒡ ᐊᓂᑌ ᐌᔅᑲᒡ
14 ᐆ ᒫᒃ ᒣᒀᒡ ᐁ ᒪᓯᓇᐦᐊᒫᑖᓐ ᑎᒧᑏ, ᓂᐳᑯᓭᔨᐦᑌᓐ ᐐᐸᒡ ᒉᒌ ᑕᑯᔑᓂᔮᓐ ᒉᒌ ᐙᐸᒥᑕᑯᒡ᙮
15 ᐁᑳ ᒫᒃ ᐐᐸᒡ ᑕᑯᔑᓂᔮᓀ, ᐆ ᑳ ᒪᓯᓇᐦᐊᒫᑕᑯᒡ ᐁᐅᒄ ᐆ ᒉ ᐐᒋᐦᐄᑯᔦᒄ ᒉᒌ ᒋᔅᒉᔨᐦᑕᒣᒄ ᑖᓐ ᒋᐹ ᐃᑌᔨᐦᑖᑯᓯᓈᓅ ᐊᓂᑌ ᐁ ᐃᔑ ᐯᔭᑯᑌᐅᓰᐦᒄ ᒋᔐᒪᓂᑑ ᐁ ᐃᐦᑖᑦ᙮ ᐌᔥ ᐆ ᐁ ᐃᔑ ᐯᔭᑯᑌᐅᓰᐦᒄ ᐁᐅᒄ ᐅᔫ ᐅᑕᔨᒥᐦᐁᐅᑲᒥᒄ ᐊᓐ ᑳ ᐱᒫᑎᓰᑦ ᒋᔐᒪᓂᑑ ᑲᔦ ᐁᑯᑦ ᐌᐦᒋ ᔮᐃᒋᑳᐳᔨᐦᒄ ᑲᔦ ᐁᐅᑰ ᐌᐦᒋ ᔮᐃᑌᔨᐦᑖᑯᓰᐦᒄ ᑖᐺᐎᓂᐦᒡ ᐃᔑ᙮
16 ᓄᐗᒡ ᑮᐹ ᒋᔅᑌᔨᐦᑖᑯᓐ ᐊᓐ ᑖᓐ ᐁ ᐃᔑ ᒥᔅᑳᑌᔨᐦᑖᑯᒡ ᒋᑖᐺᐦᑕᒧᐎᓅ᙮ ᒋᔐᒪᓂᑑ ᐎᔮᓱᐎᓂᐦᒡ ᐁ ᒌ ᐃᔑ ᓅᑯᐦᐄᓱᑦ᙮ ᒌ ᒉᔥᑎᓈᑌᔨᐦᑖᑯᐦᐄᑰ ᑳ ᐸᔦᐦᒋᓯᔨᒡ ᐊᐦᒑᐦᑾ ᑖᐺ ᒋᔐᒪᓂᑑ ᐁ ᒌ ᐯᒋ ᐃᑎᔕᐦᐅᑯᑦ᙮ ᒌ ᐙᐸᒥᑰ ᐁᓐᒋᓪ᙮ ᒌ ᐋᔨᒨᒫᑲᓅ ᐁ ᑲᒉᔅᒀᓄᔨᒡ ᐊᓂᑌ ᓇᓈᐦᑰ ᐁ ᐃᑎᔅᑳᓀᓯᓈᓄᔨᒡ᙮ ᒌ ᑖᐺᔨᒥᑰ ᐊᐌᔫᐦ ᐅᑕᐦ ᐊᔅᒌᐦᒡ᙮ ᐁᒄ ᒫᒃ ᑭᐦᒋᑮᔑᑯᐦᒡ ᑳ ᐃᔑ ᐅᐦᐱᔅᑳᑦ ᒉᒌ ᒋᔅᑌᔨᐦᑖᑯᐦᐋᑲᓅᑦ᙮