4
ᑳ ᐎᔦᔑᐦᐄᐌᑣᐤ
1 ᑳ ᐸᔦᐦᒋᓰᑦ ᐊᐦᒑᐦᒄ ᐱᔦᑲᔅᒡ ᐐᐦᑕᒫᒉᐤ ᑖᓐ ᒉ ᐊᑎ ᐃᔅᐸᔨᔨᒡ ᐁ ᒫᐦᒋᒡ ᒌᔑᑳᔨᒀᐤᐦ᙮ ᑲᑕ ᐃᐦᑖᐅᒡ ᐊᐌᓂᒡ ᐁ ᐴᓃᑣᐤ ᐁ ᑖᐺᔨᒫᑣᐤ ᒌᓴᔅ᙮ ᒋᑲ ᐎᔦᔑᒥᑰᒡ ᑖᓐ ᐁ ᐃᔑ ᐗᐎᔦᓯᒧᐌᔨᒡ ᒪᒋᐊᐦᒑᐦᑾ ᐁᒄ ᒉ ᓅᔓᓀᐦᐊᒧᐙᑣᐤ ᑖᓐ ᐁ ᐃᔑ ᒋᔅᑯᑕᒫᒉᔨᒡ᙮
2 ᐁᒄ ᒫᒃ ᐊᓂᔫ ᒉ ᐃᔑ ᐗᐎᔦᓯᒧᐌᑣᐤ ᐅᒌ ᓂᑕᒧᒄ ᐁ ᐃᔑ ᒋᔅᑯᑕᒫᒉᑣᐤ ᐁᑯᑦ ᒉ ᐅᐦᒋ ᐸᐯᐦᑖᑯᐦᒀᐤ ᐅᔫ ᒪᒋ ᒋᔅᑯᑕᒫᒉᐎᓐᐦ᙮ ᐅᒌ ᒫᒃ ᒉ ᐸᐹᐎᔦᓯᒧᐌᑣᐤ ᒉᒃ ᓇᒧᐃ ᒥᑐᓐ ᐎᔦᔥ ᒋᑲ ᐅᐦᒋ ᐃᑌᔨᐦᑕᒥᐦᐄᑰᒡ ᑖᓐ ᐁ ᐃᔑ ᒪᒋ ᒋᔅᑯᑕᒫᒉᑣᐤ ᒉ ᐃᔥᐱᔥ ᐁᑳ ᒋᔅᒉᔨᐦᑕᐦᒀᐤ ᑖᓂᔫ ᐁᐅᒄ ᑖᐺᐎᓂᔫ ᑲᔦ ᑖᓂᔫ ᐁᐅᒄ ᐎᔦᔑᒧᐌᐎᓂᔫ᙮ ᓇᒧᐃ ᒥᑐᓐ ᑲᑕᐅᐦᒋ ᐸᐹᒣᔨᐦᑕᒧᒡ ᑖᓐ ᐁ ᐃᔑ ᒪᒋ ᒋᔅᑯᑕᒫᒉᑣᐤ᙮
3 ᒋᑲ ᐐ ᒋᔅᑕᐦᐊᒫᒉᐅᒡ ᒉᒌ ᓃᐴᓈᓄᔨᒡ᙮ ᑲᔦ ᒋᑲ ᐃᐦᑕᑯᓂᔫ ᒦᒋᒥᔫ ᐁ ᐐ ᒋᔅᑕᐦᐊᒫᒉᑣᐤ ᒉᒌ ᒦᒋᓈᓄᔨᒡ᙮ ᒋᔐᒪᓂᑑ ᒫᒃ ᒌ ᐅᔑᐦᑖᐤ ᐅᔫ ᒦᒋᒥᔫ ᒉᒌ ᒦᒋᔨᒡ ᐁ ᓇᓈᔅᑯᒧᔨᒡ ᐊᓂᔫ ᑳ ᑖᐺᐦᑕᒥᔨᒡ ᑲᔦ ᑳ ᒋᔅᒉᔨᐦᑕᒥᔨᒡ ᑖᐺᐎᓂᔫ᙮
4 ᐌᔥ ᒥᓯᐌ ᒦᒋᒥᔫ ᐁ ᒦᒋᓈᓄᔨᒡ ᑳ ᐅᔑᐦᑖᑦ ᒋᔐᒪᓂᑑ ᒥᔻᔑᔫ᙮ ᓇᒧᐃ ᒫᒃ ᒉᒀᓐ ᒋᐹ ᐅᐦᒋ ᐋᑐᐌᔨᐦᑌᓈᓅ ᒉᒌ ᒦᒌᐦᒄ ᐁ ᐃᑌᔨᐦᑕᒧᒄ ᒉᒌ ᐐᓂᐦᐄᑯᔨᐦᒄ ᒋᐱᒫᑎᓰᐎᓈᐦᒡ ᒌᔥᐱᓐ ᔖᔥ ᑳ ᓇᓈᔅᑯᒫᐅᐦᑴ ᒋᔐᒪᓂᑑ ᐊᓐ ᑳ ᐃᔑ ᐅᑎᓇᒫᓱᔨᐦᒄ᙮
5 ᐌᔥ ᐁ ᐃᐦᑑᑖᑲᓄᔨᒡ ᑖᓐ ᐊᓂᔫᐦ ᑳ ᐃᑕᔥᑖᑦ ᐊᓂᑌ ᐅᑕᔨᒧᐎᓂᐦᒡ ᒉᒌ ᐃᐦᑎᓈᓄᔨᒡ ᑲᔦ ᒫᒃ ᐊᔨᒥᐦᒋᑫᐎᓂᔫ ᐁᐅᒄ ᐅᔫ ᐁ ᐃᔑ ᓇᐦᐄᐌᐦᐄᑯᑦ ᒋᔐᒪᓂᑑ᙮
ᐊᐌᓐ ᑳ ᒥᔪ ᐊᑐᔥᑯᐙᑦ ᙭
6 ᒌᔥᐱᓐ ᒫᒃ ᐅᔫ ᐃᔑ ᐙᐐᐦᑕᒨᑣᐌᓂᒡ ᐐᒋᔖᓂᒫᐅᒡ ᒋᑲ ᒥᔪ ᐊᑐᔥᑯᐙᐤ ᙭ ᒌᓴᔅ ᐌᔥ ᒋᑲ ᒥᔪ ᓂᐦᑖᐅᒋᐦᐄᑰᓐ ᑖᓐ ᐁ ᐃᔑ ᑖᐺᒪᑲᓂᔨᒡ ᒋᔐᒪᓂᑑ ᐅᑕᔨᒧᐎᓐ ᑲᔦ ᐊᓐ ᒥᔪ ᒋᔅᑯᑕᒫᒉᐎᓐ ᑳ ᐃᔑ ᓅᔓᓀᐦᐊᒪᓐ᙮
7 ᐁᑳᐐ ᐋᐸᒋᐦᑖᐦ ᐊᓂᔫ ᐁᑳ ᐎᔦᔥ ᐃᑖᐸᑕᐦᒀᐤ ᓂᑕᐐᓐ ᑎᐹᒋᒧᐎᓐᐦ ᐁ ᑲᒉᔅᑴᔨᓐ ᒫᒃ ᐁ ᒋᔅᑯᑕᒫᒉᔨᓐ ᒬᐦᒡ ᑖᐺ ᒋᔐᒪᓂᑑ ᐅᑕᔨᒧᐎᓐ ᒉᒌ ᐃᑖᐹᒋᐦᑖᔨᓐ᙮ ᐅᔅᑌ ᐐ ᒋᔅᑯᑕᒫᓱᐦ ᑖᓂᑌ ᐁᑎᑑ ᒉᒌ ᐅᐦᒋ ᓇᓂᐦᐄᐌᐦᐄᑦ ᒋᔐᒪᓂᑑ᙮
8 ᐃᐦᑕᑯᓂᔫ ᑮᐹ ᑖᓐ ᐁ ᐃᔑ ᐐᒋᐦᐄᑯᑦ ᐊᐌᓐ ᐁ ᓴᓵᐅᐸᔨᐦᐅᑦ᙮ ᐁᒄ ᒫᒃ ᐊᓐ ᐊᐌᓐ ᓲᐦᒃ ᒨᔥ ᑳ ᐐ ᓇᓂᐦᐄᐌᐦᐋᑦ ᒋᔐᒪᓂᑑ ᐁᐅᒄ ᐅᔫ ᐁᑎᑑ ᒉ ᐐᒋᐦᐄᑯᑦ ᐊᓄᐦᒌᔥ ᐅᑕᐦ ᐁ ᐱᒫᑎᓰᑦ ᑲᔦ ᒫᒃ ᐊᓂᑌ ᐃᔑ ᓃᔥᑖᒥᐦᒡ᙮
9 ᑖᐺᒪᑲᓐ ᐆ ᐃᑗᐎᓐ, ᑲᔦ ᐃᐦᑕᑯᓐ ᒉᒌ ᑖᐺᐦᑖᑲᓅᐦᒡ᙮
10 ᐁᐅᒄ ᒫᒃ ᐌᐦᒋ ᓲᐦᒃ ᔮᐸᒡ ᐃᑌᔨᐦᑕᒥᐦᐄᑯᔨᐦᒄ ᐆ ᑖᓐ ᐁ ᐃᑖᐸᑎᓰᐦᒄ ᐋᑦ ᐁ ᐋᔨᒧᐦᐅᔨᐦᒄ ᐌᔥ ᒋᑕᔅᐯᔨᒧᑐᑕᐙᓅ ᒋᔐᒪᓂᑑ ᑳ ᐱᒫᑎᓰᑦ, ᐊᓐ ᑳ ᓂᑐᐌᔨᒫᑦ ᒥᓯᐌ ᐊᐌᔫ ᒉᒌ ᐱᒫᒋᐦᐅᔨᒡ ᑲᔦ ᑳ ᐱᒫᒋᐦᐋᑦ ᒥᓯᐌ ᐊᓂᔫ ᑳ ᑖᐺᔨᒥᑯᑦ᙮
11 ᐁᐅᒄ ᐅᔫ ᒋᐹ ᐃᔑ ᐐᔓᒫᐙᐅᒡ ᑲᔦ ᒋᐹ ᐃᔑ ᒋᔅᑯᑕᒧᐙᐙᐅᒡ ᐊᐌᓂᒌ ᑳ ᑖᐺᐦᑕᐦᒀᐤ᙮
12 ᐁᑳᐐ ᒋᑲ ᐅᐦᒋ ᐋᑐᐙᐦᐄᑰᒡ ᐊᐌᓂᒡ ᐊᓂᔫ ᐁ ᐅᔅᒋᐱᒫᑎᓯᔫᑦ ᐅᔫ ᐁ ᐃᑖᐸᑎᓲᑦ᙮ ᒥᒄ ᐃᔑ ᐱᒫᑎᓰ ᐊᓂᑦ ᒉᒌ ᐅᐦᒋ ᒋᔅᒋᓄᐙᐸᐦᑕᐦᒀᐤ ᒋᐱᒫᑎᓰᐎᓂᔫ ᐊᓂᒌ ᑳ ᑖᐺᐦᑕᐦᒀᐤ, ᑖᓐ ᐁ ᐃᑎᐦᑖᑯᓂᔨᒡ ᒋᑕᔨᒧᐎᓂᔫ, ᑲᔦ ᑖᓐ ᐁ ᐃᔑᓈᑯᐦᒡ ᒋᐱᒫᑎᓰᐎᓐ ᑲᔦ ᑖᓐ ᐁ ᐃᔑ ᓵᒋᐦᐄᐌᔨᓐ ᒫᒃ ᐁ ᐃᔑ ᑖᐺᐦᑕᒪᓐ ᑲᔦ ᑖᓐ ᐁ ᐃᔑ ᐸᔦᐦᑳᑎᓯᔨᓐ᙮
13 ᒉ ᐃᔥᐱᔥ ᐁᑳ ᑕᑯᔑᓂᔮᓐ ᓲᐦᒃ ᔮᐸᒡ ᒨᔥ ᐊᔨᒥᐦᑖ ᒋᔐᒪᓂᑑ ᐅᑕᔨᒧᐎᓐ ᐊᓂᑌ ᐁ ᒫᐅᒋᐦᐄᑐᔦᒄ ᑲᔦ ᓲᐦᒃ ᐋᐦᒌᔅᑕ ᐁ ᑲᒉᔅᑴᔨᓐ ᑲᔦ ᐁ ᒋᔅᑯᑕᒫᒉᔨᓐ᙮
14 ᒨᔥ ᐋᐸᒋᐦᑖᐦ ᐊᓐ ᐊᐦᒑᐦᒄ ᒦᐌᐎᓐ ᐁ ᐃᔑ ᐊᔮᓐ ᒉᒌ ᐊᑐᔥᑯᐗᑦ ᒋᔐᒪᓂᑑ᙮ ᐌᔥ ᐁᐅᒄ ᐆ ᒦᐌᐎᓐ ᑳ ᒦᑯᔨᓐ ᒋᔅᒋᐌᐦᐄᒉᐎᓂᐦᒡ ᐅᐦᒋ, ᑳ ᓵᒥᓂᔅᒀᐤ ᐁ ᐊᔨᒥᐦᐁᔥᑕᒫᔅᒀᐤ ᐊᓂᒌ ᑳ ᓃᑳᓂᔥᑳᑲᐦᒀᐤ ᐊᔨᒥᐦᐁᐅᑲᒥᑯᔫ᙮
15 ᓇᓈᑲᑐᐌᔨᐦᑕᒥᐦᐄᒄ ᒨᔥ ᒉᒌ ᐃᐦᑑᑕᒪᓐ ᐆ ᑳ ᐃᔑ ᐋᔨᒨᑕᒫᑖᓐ ᐁᒄ ᒫᒃ ᒉᒌ ᐙᐸᐦᑕᐦᒀᐤ ᒥᓯᐌ ᐊᐌᓂᒡ ᑖᓐ ᐁ ᐃᔑ ᐌᑖᒡ ᑲᔅᒋᐦᐅᔨᓐ ᐁ ᐊᑐᔥᑯᐗᑦ ᒋᔐᒪᓂᑑ᙮
16 ᓇᓈᑲᑐᐌᔨᐦᑕᒥᐦᐄᒄ ᑲᔦ ᒋᐱᒫᑎᓰᐎᓐ ᑲᔦ ᐊᓐ ᐁ ᐃᔑ ᒋᔅᑯᑕᒫᒉᔨᓐ᙮ ᐆ ᐃᔑ ᓇᓈᑲᑕᐌᔨᐦᑕᒥᓀ ᐁᐅᒄ ᒉ ᑲᓄᐌᔨᒥᑯᔦᒄ ᑲᔦ ᒉ ᐱᒫᒋᐦᐄᑯᔦᒄ, ᒋᔭ ᑮᐹ ᑲᔦ ᒫᒃ ᐊᓂᒌ ᑳ ᓂᑐᐦᑖᔅᒀᐤ᙮