3
1 ᒉ ᐐ ᒋᔅᒉᔨᐦᑕᒪᓐ ᑲᔦ ᐆ, ᐃᔅᑯᑕᒃ ᐊᓂᑌ ᒫᐦᒋᔥᑕᐃ ᐊᑎ ᒌᔑᑳᒀᐌᓐᐦ ᓈᔥᒡ ᑖᐺ ᑲᑕ ᐃᐦᑕᑯᓐ ᑖᓐ ᒉ ᐃᔑ ᐋᔨᒥᐸᔨᐦᒡ᙮
2 ᐅᔅᑌ ᐎᔭ ᑲᑕ ᐃᑌᔨᒥᓲ ᐊᐌᓐ, ᑲᔦ ᓈᔥᒡ ᑖᐺ ᑲᑕ ᓵᒋᐦᑖᐅᒡ ᔔᓕᔮᔫ᙮ ᓈᔥᒡ ᑲᑕ ᒪᒥᔻᒋᒥᓲᒡ, ᓈᔥᒡ ᒋᐦᒋᐌ ᑲᑕ ᐃᑌᔨᒥᓲᒡ ᐁ ᐹᔥᑖᒧᑣᐤ, ᑲᔦ ᓈᔥᒡ ᑲᑕ ᒫᒫᔦᔨᐦᒉᐅᒡ᙮ ᑲᔦ ᓇᒧᐃ ᑲᑕ ᐅᐦᒋ ᓇᓂᐦᐄᐦᑐᐌᐅᒡ ᐅᓃᒋᐦᐄᑯᐙᐤᐦ᙮ ᓇᒧᐃ ᒥᑐᓐ ᑲᑕ ᐅᐦᒋ ᓇᓈᔅᑯᒨᒡ ᒉᒀᔫ ᑲᔦ ᓇᒧᐃ ᒥᑐᓐ ᑲᑕ ᐅᐦᒋ ᐋᐸᑌᔨᒣᐅᒡ ᒋᔐᒪᓂᑑ᙮
3 ᓇᒧᐃ ᑲᑕ ᐅᐦᒋ ᑲᒋᔅᑎᒫᒉᔨᒣᐅᒡ ᐊᐌᔫ ᑲᔦ ᓇᒧᐃ ᒥᑐᓐ ᑲᑕ ᐅᐦᒋ ᐐ ᐌᐯᔨᐦᑕᒫᒉᐅᒡ᙮ ᑲᑕ ᐐ ᓈᓂᑑ ᐊᔮᐦᑯᐦᐁᐅᒡ ᐊᐌᔫ ᑖᓐ ᐁ ᐃᑖᑣᐤ, ᑲᔦ ᓈᔥᒡ ᑲᑕ ᐋᐦᑯᔪᐌᓲᒡ, ᑲᔦ ᓈᔥᒡ ᑲᑕ ᐐᐦᒋ ᒋᔓᐙᓲᒡ ᑲᔦ ᓈᔥᒡ ᑲᑕ ᐅᐦᑳᑌᐅᒡ ᐊᓂᔫ ᑳ ᒥᔪᑑᑕᒥᔨᑣᐤᐦ᙮
4 ᓈᔥᒡ ᑲᑕ ᐐᐦᒋ ᐗᐎᔦᔑᐦᐁᐅᒡ ᐅᐐᒉᐙᑲᓇᐙᐤᐦ, ᓇᒧᐃ ᒥᑐᓐ ᑲᑕ ᐅᐦᒋ ᓇᓈᑲᑕᐌᔨᐦᑕᒧᒡ ᑖᓐ ᐁ ᐃᐦᑎᑣᐤ, ᑲᔦ ᓈᔥᒡ ᑖᐺ ᒥᔅᑕᐦᐄ ᑲᑕ ᐃᑌᔨᒥᓲᒡ᙮ ᐅᔅᑌ ᑲᑕ ᓵᒋᐦᑖᐅᒡ ᐊᓂᔫ ᐎᔭᐙᐤ ᐁ ᐃᔑ ᒨᒋᒉᔨᐦᑕᒥᐦᐄᑯᑣᐤ ᒉᒀᔫ ᐃᔥᐱᔥ ᐐ ᒋᔐᒪᓂᑑᐦ ᐁᑎᑑ ᒉᒌ ᓵᒋᐦᐋᑣᐤ᙮
5 ᒧᔮᒻ ᓈᔥᒡ ᐁ ᐊᔨᒥᐦᐁᐙᑎᓰᑣᐤ ᑲᑕ ᐐ ᐃᔑᓈᑯᐦᐄᓲᒡ ᒥᒄ ᒫᒃ ᓇᒧᐃ ᑲᑕ ᐅᐦᒋ ᐋᐸᑌᔨᐦᑕᒥᐦᐄᑰᒡ ᐊᓂᔫ ᓲᐦᑳᑎᓰᐎᓂᔫ ᒋᐹ ᐐᒋᐦᐄᑰᒡ ᒉᒌ ᓇᓂᐦᐄᐌᐦᐋᑣᐤ ᒋᔐᒪᓂᑑ᙮ ᐁᑳᐐ ᐸᐱᔅᑳᓯᒡ ᐅᔫ ᑳ ᐃᑌᔨᐦᑖᑯᓯᑣᐤ ᐊᐌᓂᒌ᙮
6 ᐸᐲᐦᒉᐅᒡ ᐙᔅᑳᐦᐄᑲᓐᐦ ᐁᒄ ᐊᓂᔫ ᐃᔅᑴᐤᐦ ᑳ ᔖᑰᒋᐦᐄᑯᔨᒡ ᒪᒋᑑᑕᒧᐎᓂᔫ ᑲᔦ ᐱᓯᒄ ᓂᑕᒧᒄ ᑳ ᐐ ᐃᑖᑎᓯᔨᒡ ᐁᐅᑯᓐᐦ ᐊᓂᔫᐦ ᓈᔥᒡ ᐙ ᑎᐯᔨᒫᑣᐤ᙮
7 ᐅᔫᐦ ᐃᔅᑴᐤᐦ ᒨᔥ ᑯᒋᐦᑖᔫ ᒉᒌ ᒋᔅᒉᔨᐦᑕᒥᔨᒡ ᓇᓈᐦᑰ ᒋᔅᑯᑕᒫᒉᐎᓐᐦ ᒥᒄ ᒫᒃ ᓇᒧᐃ ᒌ ᒥᔅᑲᒥᔫᐦ ᑖᐺᐎᓂᔫ᙮
8 ᓂᔥᑰᔥᑕᒧᒡ ᑖᐺᐎᓂᔫ ᐅᒌ ᓈᐯᐅᒡ ᒬᐦᒡ ᑖᓐ ᑳ ᐃᐦᑎᔨᒡ ᐊᓂᔦᐦᑳᓈᓐᐦ ᒑᓀᔅ ᐁᒄ ᒫᒃ ᒐᒻᑉᕇᔅ ᐁ ᒌ ᓂᔥᑰᔥᑐᐙᔨᒡ ᒧᓯᔅ᙮ ᓈᔥᒡ ᑖᐺ ᓇᒧᐃ ᑯᐃᔅᑯᑯᑌᔫᐦ ᐅᒥᑐᓀᔨᐦᒋᑲᓇᐙᐤᐦ ᑲᔦ ᐅᑖᐺᐦᑕᒧᐎᓇᐙᐤ ᓇᒧᐃ ᑯᐃᔅᒄ ᐃᔑᓈᑯᓂᔫ᙮
9 ᓇᒧᐃ ᒫᒃ ᐅᔅᑌ ᒋᑲ ᒌ ᐃᐦᑑᑕᒧᒡ ᐅᔫ ᑖᓐ ᐁ ᐃᐦᑎᑣᐤ, ᐌᔥ ᑲᑕ ᐙᐸᐦᑕᒥᔫᐦ ᒥᓯᐌ ᐊᐌᔫ ᑖᓐ ᐁ ᐃᔥᐱᔥ ᓂᑕᒧᒄ ᐃᐦᑎᑣᐤ, ᒧᔮᒻ ᑖᓐ ᑳ ᐃᔑ ᒋᔅᒉᔨᐦᑖᑯᓰᑣᐤ ᐊᓂᔫᐦ ᓃᔓ ᓈᐯᐤᐦ ᒑᓀᔅ ᐁᒄ ᒫᒃ ᒐᒻᑉᕇᔅ᙮
ᒫᐦᒋᔅᑕᐃ ᑳ ᐃᔑ ᐐᔓᒫᑲᓄᑦ ᑎᒧᑏ
10 ᒋᔭ ᒫᒃ ᑎᒧᑏ ᓂᒉᔥᑎᓈᐦᐅᓐ ᒉ ᓅᔓᓀᐦᐊᒪᓐ ᓂᒋᔅᑯᑕᒫᒉᐎᓐ, ᑲᔦ ᑳ ᐃᔑ ᐱᒫᑎᓯᔮᓐ, ᑲᔦ ᓂᑎᑌᔨᐦᑕᒧᐎᓐ᙮ ᒋᒌ ᐙᐸᐦᑌᓐ ᑖᓐ ᑳ ᐃᔑ ᑖᐺᐦᑕᒫᓐ, ᑖᓐ ᑳ ᐃᔑ ᓰᐲᐌᓯᔮᓐ, ᑲᔦ ᓂᓵᒋᐦᐄᐌᐎᓐ, ᑲᔦ ᒋᒌ ᐙᐸᐦᑌᓐ ᑖᓐ ᑳ ᐃᔑ ᓰᐲᐌᓰᔅᑕᒫᓐ ᑖᓐ ᑳ ᐃᔑ ᓇᓈᐦᑰ ᓇᒋᔥᑲᒫᓐ᙮
11 ᑲᔦ ᒫᒃ ᒋᒌ ᐙᐸᐦᑌᓐ ᑖᓐ ᑳ ᐃᔑ ᓇᓀᐦᑳᒋᐦᐄᑯᔮᓐ ᑲᔦ ᑖᓐ ᑳ ᐃᔑ ᐙᐐᓯᒉᔨᐦᑕᒫᓐ᙮ ᐌᔥ ᒥᓯᐌ ᒋᒋᔅᒉᔨᐦᑌᓐ ᑖᓐ ᑳ ᐃᔑ ᐃᐦᑑᑖᑯᔮᓐ ᐊᓂᑌ ᐋᓐᑎᔻᒃ, ᐊᐃᒀᓂᔭᒥᐦᒡ ᑲᔦ ᒫᒃ ᐊᓂᑌ ᓕᔅᑦᕋᐦᒡ᙮ ᑖᐺ ᓄᐗᒡ ᒌ ᐋᐦᒀᑌᔨᐦᑖᑯᓐ ᑖᓐ ᑳ ᐃᔑ ᓇᒋᔥᑲᒫᓐ᙮ ᒥᒄ ᒫᒃ ᐅᑎᐯᔨᐦᒋᑫᐤ ᐎᔭ ᓂᒌ ᐐᐦᑯᒋᐦᐄᒄ ᒉᒌ ᔖᐳᔥᑲᒫᓐ ᒥᓯᐌ ᑖᓐ ᑳ ᐃᐦᑑᑖᑯᔮᓐ᙮
12 ᐁᐦᐁ, ᑖᐺ, ᒥᓯᐌ ᐊᐌᓐ ᑯᐃᔅᒄ ᑳ ᐐᔑ ᐱᒫᑎᓰᑦ ᑲᔦ ᑌᑲᔥ ᑳ ᐸᒋᔥᑎᓂᓱᑦ ᐁ ᐐᒉᐙᑦ ᙭ ᒌᓴᔅ, ᑲᑕ ᐃᐦᑕᑯᓂᔫ ᑖᓐ ᒉ ᐃᔑ ᓇᓀᐦᑳᒋᐦᐋᑲᓅᑦ,
13 ᐁᒄ ᐊᓂᒌ ᑳ ᒪᒑᑎᓰᑣᐤ ᑲᔦ ᐊᓂᒌ ᓂᑕᒧᒄ ᑳ ᐃᔑ ᒋᔅᑯᑕᒫᒉᑣᐤ ᐌᑖᒡ ᐁᑎᑑ ᑲᑕ ᐃᑌᔨᐦᑖᑯᓲᒡ, ᐁ ᐎᔦᔑᒫᑣᐤ ᐊᐌᔫ ᑲᔦ ᐎᔭᐙᐤ ᐁ ᐎᔦᔑᒫᑲᓅᑣᐤ᙮
14 ᒋᐐ ᐃᑎᑎᓐ ᒫᒃ ᒋᔭ, ᑖᐺᐦᑕ ᑲᔦ ᓲᐦᒃ ᓇᓈᑲᑕᐌᔨᐦᑕ ᐊᓐ ᑖᐺᐎᓐ ᑳ ᒋᔅᑯᑕᒫᑯᔨᓐ ᐁ ᒋᔅᒉᔨᒪᑣᐤ ᐊᓂᒌ ᐊᐌᓂᒌ ᑳ ᒋᔅᑯᑕᒫᔅᒀᐤ᙮
15 ᐌᔥ ᒋᒋᔅᒋᓯᓈᒉ ᒣᒀᒡ ᐁ ᐊᐙᔒᐎᔨᓐ ᔖᔥ ᒋᒌ ᒋᔅᑯᑕᒫᑰᓐ ᑖᓐ ᑳ ᐃᔑ ᒪᓯᓇᐦᐄᑲᓄᔨᒡ ᒋᔐᒪᓂᑑ ᐅᑕᔨᒧᐎᓂᐦᒡ᙮ ᐁᑯᑦ ᑳ ᐅᐦᒋ ᐊᔮᔨᓐ ᑲᒉᐦᑖᐌᔨᐦᑕᒧᐎᓐ ᒉᒌ ᒋᔅᒉᔨᐦᑕᒪᓐ ᐁ ᑖᐺᔨᒫᑦ ᐊᐌᓐ ᙭ ᒌᓴᔅ ᐁᑯᑦ ᒉᒌ ᐅᐦᒋ ᐱᒫᒋᐦᐅᑦ᙮
16 ᒥᓯᐌ ᑖᓐ ᐁ ᐃᑕᔥᑌᒡ ᒋᔐᒪᓂᑑ ᐅᑕᔨᒧᐎᓂᐦᒡ ᐎᔭ ᐊᓂᔫ ᑎᐲᐌ ᐅᑕᔨᒧᐎᓐ ᒋᔐᒪᓂᑑ᙮ ᒥᔻᐸᑕᓐ ᑲᒉᔅᒋᒧᐌᐎᓂᐦᒡ, ᒋᔅᑕᐦᐊᒫᒉᐎᓂᐦᒡ, ᑯᐃᔅᑯᓂᐌᐎᓂᐦᒡ, ᑲᔦ ᑯᐃᔅᑯᑖᑎᓰᐎᓐ ᒋᔅᒋᓄᐦᐊᒫᒉᐎᓂᐦᒡ ᐃᔑ᙮
17 ᐁᒄ ᒫᒃ ᐊᓐ ᐊᐌᓐ ᑳ ᐊᑐᔥᑯᐙᑦ ᒋᔐᒪᓂᑑ ᒉ ᒥᑐᓀᓰᑦ, ᒥᑐᓐ ᐁ ᐊᔦᔅᑯᐐᑦ ᒉᒌ ᒥᔪ ᐊᑐᔥᑯᐙᑦ ᒋᔐᒪᓂᑑ᙮