4
1 ᒋᔭ ᑎᒧᑏ, ᒋᑎᑕᔓᒥᑎᓐ ᐅᐦᒋᔥᑰ ᒋᔐᒪᓂᑑ ᑲᔦ ᐅᑎᐯᔨᐦᒋᑫᐤ ᒌᓴᔅ ᙭ ᐁ ᐃᐦᑖᑦ, ᐊᓐ ᒉ ᐎᔮᔅᑯᓈᑦ ᑳ ᐱᒫᑎᓰᑣᐤᐦ ᑲᔦ ᑳ ᓂᐲᑣᐤᐦ, ᑲᔦ ᒫᒃ ᒦᓐ ᒉ ᑕᑯᔑᐦᒃ ᒉ ᒋᔐᐅᒋᒫᐅᑦ,
2 ᒉ ᐙᐐᐦᑕᒪᓐ ᒋᔐᒪᓂᑑ ᐅᑕᔨᒧᐎᓐ, ᓲᐦᒃ ᐙᐐᐦᑕᐦ ᐋᑦ ᐊᓂᑦ ᐁᑳ ᐁ ᓂᐦᐄᐸᔨᐦᒡ ᒉᒌ ᓂᑐᐦᑖᑲᓅᐦᒡ, ᒫᒃ ᐊᓂᑦ ᐁ ᓂᐦᐄᐸᔨᐦᒡ ᒉᒌ ᓂᑐᐦᑖᑲᓅᐦᒡ, ᒋᔅᒉᔨᐦᑖᑯᐦᑖ ᑖᐺᐎᓐ, ᒋᔅᑕᐦᐊᒫᒉ ᐁ ᐗᓂᑑᑖᑲᓅᐦᒡ, ᑲᔦ ᒫᒃ ᑳᒌᒋᒧᐌ ᑲᔦ ᒨᔥ ᐐ ᓰᐲᐌᓰ ᑲᔦ ᒨᔥ ᒋᔅᑯᑕᒫᒉ᙮
3 ᐌᔥ ᑲᑕ ᐅᑎᐦᒋᐸᔫ ᑖᓂᑦ ᐁᑳ ᒉ ᐅᐦᒋ ᓂᑐᐦᑕᐦᒀᐤ ᐊᐌᓂᒌ ᐊᓂᔫ ᑎᔮᐺᒪᑲᓂᔨᒡ ᒋᔅᑯᑕᒫᒉᐎᓂᔫ᙮ ᑌᔭᑯᒡ ᑲᑕ ᓈᓂᑕᐌᔨᒣᐅᒡ ᐊᐌᔫ ᒉᒌ ᒋᔅᑯᑕᒫᑯᑣᐤ ᐎᔭᐙᐤ ᑖᓐ ᐙ ᐃᔑ ᐯᐦᑕᐦᒀᐤ᙮
4 ᓇᒧᐃ ᒋᑲ ᐅᐦᒋ ᐋᐸᑌᔨᐦᑕᒧᒡ ᒉᒌ ᓂᑐᐦᑕᒀᐤ ᑖᐺᐎᓂᔫ᙮ ᐅᔅᑌ ᑲᑕ ᐃᑌᔨᐦᑕᒥᐦᐄᑰᒡ ᐁ ᒫᓂᑌᐅᐦᑖᑯᓂᔨᒀᐤ ᑎᐹᒋᒧᐎᓐᐦ ᒉᒌ ᓇᓂᑐᐦᑕᐦᒀᐤ᙮
5 ᒥᒄ ᒫᒃ ᓲᐦᒃ ᓇᓈᑲᑕᐌᔨᒥᓲ ᒋᔭ, ᑯᐃᔅᒄ ᒉᒌ ᐃᔑ ᒫᒥᑐᓀᔨᐦᑕᒪᓐ ᑖᓐ ᒥᒄ ᒉ ᐃᔅᐸᔪᐗᓀ᙮ ᓰᐲᐌᓰᔅᑕᐦ ᑖᓐ ᒉ ᐃᔑ ᓇᓀᐦᑳᒋᐦᐄᑯᐗᓀ᙮ ᓲᐦᒃ ᐐᒋᐦᐄᒡ ᑯᑕᑲᒡ ᐁ ᐙᐐᐦᑕᒨᑣᐤ ᒥᔻᒋᒧᐎᓂᔫ᙮ ᑲᔦ ᒫᒃ ᒥᑐᓐ ᑌᑲᔥ ᐃᐦᑑᑦ ᒥᓯᐌ ᐊᓂᔫ ᑖᓐ ᑳ ᐐ ᐃᑖᐸᒋᐦᐄᔅᒃ ᒋᔐᒪᓂᑑ᙮
6 ᓂᔭ ᒫᒃ ᔖᔥ ᐅᑎᐦᒋᐸᔫ ᒉ ᐸᒋᔥᑎᓂᑲᓅᐦᒡ ᓂᐱᒫᑎᓰᐎᓐ ᒋᔐᒪᓂᑑ ᐃᔑ ᐁ ᐃᐦᑖᑦ᙮ ᔖᔥ ᐅᑎᐦᒋᐸᔫ ᒉ ᓇᑲᑕᒫᓐ ᐆ ᐊᔅᒌ᙮
7 ᔖᔥ ᓂᒌᔑᐦᑖᓐ ᐊᓐ ᑖᓐ ᓂᐹ ᐃᔑ ᒥᔪ ᒫᓯᐦᑖᓐ, ᔖᔥ ᓂᒌᔑᐦᑖᓐ ᑖᓐ ᑳ ᐃᔑ ᑲᑴᒋᔅᑲᑕᐦᐄᒉᔮᓐ ᑲᔦ ᓂᒌ ᑲᓄᐌᔨᐦᑌᓐ ᑖᓐ ᑳ ᐃᔑ ᑖᐺᐦᑕᒫᓐ᙮
8 ᔖᔥ ᐊᔦᔅᑰᔥᑌᐤ ᐊᓐ ᒋᔐᐅᒋᒫᐤ ᐊᔅᑑᑎᓐ ᐊᓂᔫ ᒉ ᒦᔮᑲᓅᑣᐤ ᐊᓂᒌ ᒉ ᑯᐃᔅᑯᑖᑎᓰᑣᐤ᙮ ᐁᐅᒄ ᒫᒃ ᐅᔫ ᒉ ᐯᒋ ᒦᑦ ᐅᑎᐯᔨᐦᒋᑫᐤ ᐊᓐ ᑯᐃᔅᒄ ᑳ ᐃᔑ ᐎᔮᔅᑯᓐᒉᑦ ᒦᓐ ᐯᒋ ᑕᑯᔑᐦᑫ᙮ ᓇᒧᐃ ᒫᒃ ᒥᒄ ᓂᔭ ᓂᑲ ᐅᐦᒋ ᒦᑰᓐ ᐆ ᐁ ᐃᔑᓈᑯᐦᒡ ᐊᔅᑐᑎᓐ, ᒥᓯᐌ ᐊᓂᒌ ᓵᒋᐦᐄᐌᐎᓂᐦᒡ ᑳ ᐃᔑ ᐳᑯᓭᔨᒧᑣᐤ ᐅᑎᐯᔨᐦᒋᑫᐤᐦ ᒦᓐ ᒉ ᑕᑯᔑᓂᔨᒡ ᑲᔦ ᐎᔭᐙᐤ ᑲᑕ ᒥᔮᑲᓅᒡ᙮
ᐐ ᑎᐲᐌ ᑆᓪ ᑳ ᐃᔑ ᐊᔨᒥᐦᐋᑦ ᑎᒧᑎ
9 ᓲᐦᒃ ᑯᒋᐦᑖ ᐐᐸᒡ ᒉᒌ ᐯᒋ ᓂᑕᐙᐦᐃᔨᓐ᙮
10 ᑌᒪᔅ ᐐ, ᔖᔥ ᐅᔅᑌ ᐅᔫ ᐊᔅᒌᔫ ᓵᒋᐦᑖᐤ ᑲᔦ ᒫᒃ ᓂᒌ ᓇᑲᑎᒄ, ᐊᓂᑌ ᑌᓴᓗᓇᐃᑳᐦᒡ ᐁᑯᑌ ᑳ ᐃᑐᐦᑌᑦ᙮ ᒃᕃᓭᓂᔅ ᒫᒃ ᐐ ᐊᓂᑌ ᑲᓓᔑᔭᐦᒡ ᐁᑯᑌ ᑳ ᐃᑐᐦᑌᑦ᙮ ᐁᒄ ᑕᐃᑕᔅ ᐊᓂᑌ ᑕᓪᒣᔑᔭᐦᒡ ᐁᑯᑌ ᐎᔭ ᑳ ᐃᑐᐦᑌᑦ᙮
11 ᒥᒄ ᓗᒃ ᐁᐅᒄ ᐁ ᐃᐦᑖᑦ ᐅᑕᐦ ᐁ ᐃᐦᑖᔮᓐ᙮ ᔮᐃᑌᐃ ᒉ ᐐ ᐯᒋ ᐐᒉᐗᑦ ᒫᕐᒃ ᑕᑯᔑᓂᔨᓀ᙮ ᓂᑕᐌᔨᒫᐤ ᒉᒌ ᐯᒋ ᐐᒋᐦᐄᑦ ᐅᑕᐦ ᐁ ᐊᔨᒥᐦᐁᐤ ᐋᐸᑎᓲᒡ᙮
12 ᑲᔦ ᒫᒃ ᑕᐃᑭᑲᔅ ᓇᒧᐃ ᐃᐦᑖᐤ ᐅᑕᐦ, ᐊᓂᑌ ᐁᕕᓴᔅ ᐁᑯᑌ ᑳ ᐃᑎᔕᐦᐆᒃ᙮
13 ᑕᑯᔑᓂᔨᓀ ᒉ ᐯᒋ ᓂᔅᑯᐌᓇᒪᓐ ᓂᑕᑯᐦᑉ ᐊᓂᑌ ᑦᕎᐊᓯᐦᒡ, ᐊᓂᑌ ᑲᕐᐸᔅ ᐁ ᐃᐦᑖᑦ ᐁᑯᑌ ᑳ ᓇᑲᑕᒫᓐ᙮ ᑲᔦ ᐊᓂᔫᐦ ᒪᓯᓇᐦᐄᑲᓐᐦ ᒉ ᐯᑖᔦᒄ, ᔮᐃᑌᐃ ᐯᑖᒄ ᐊᓂᔫᐦ ᐊᐌᓰᔓᔮᓐ ᒪᓯᓇᐦᐄᑲᓐᐦ᙮
14 ᐊᓐ ᓈᐯᐤ ᑳ ᒌ ᐙᐌᔮᐱᔅᒋᓴᐦᒃ ᐱᔻᐱᔅᑯᔫ, ᐋᓕᒃᓵᓐᑕᕐ ᑳ ᐃᔑᓂᐦᑳᓱᑦ ᓈᔥᒡ ᑖᐺ ᒌ ᐃᐦᑕᑯᓂᔫ ᑖᓐ ᑳ ᐃᔑ ᓇᓀᐦᑳᑌᔨᒧᐦᐄᑦ, ᒥᒄ ᒫᒃ ᒋᑲ ᐃᐦᑕᑯᓂᔫ ᑖᓐ ᒉ ᐃᔑ ᐃᐦᑑᑖᑯᑦ ᐅᑎᐯᔨᐦᒋᑫᐤ ᐅᔫ ᑖᓐ ᑳ ᐃᐦᑑᑑᑦ᙮
15 ᒉ ᐐ ᐊᔮᒀᒦᔅᑐᐗᑦ, ᐌᔥ ᓈᔥᒡ ᒌ ᓂᔥᑰᔥᑕᒻ ᑖᓐ ᑳ ᐃᔑ ᐙᐐᐦᑕᒧᐗᒋᐦᑦ ᒥᔻᒋᒧᐎᓂᔫ᙮
16 ᐃᔅᑯᑕᒃ ᒫᐅᒡ ᓃᔥᑕᒻ ᑳ ᐅᐦᒋᔥᑰᑳᐴᔥᑕᒫᓐ ᐁ ᐎᔮᔅᑯᓂᑯᔮᓐ, ᓇᒧᐃ ᐙᐙᒡ ᐯᔭᒄ ᐊᐌᓐ ᓅᐦᒋ ᐐᒋᑳᐴᔥᑖᒄ, ᒥᓯᐌ ᐊᐌᓂᒌ ᓂᒌ ᓇᑲᑎᑯᒡ᙮ ᑲᒫ ᐁᑳ ᒫᐦᑕᑯᔥᑳᑯᑣᐤ ᐅᔫ ᑖᓐ ᑳ ᐃᔑ ᐃᐦᑑᑕᐦᒀᐤ᙮
17 ᒥᒄ ᒫᒃ ᐅᑎᐯᔨᐦᒋᑫᐤ ᓂᒌ ᐐᒋᑳᐴᔥᑖᒄ ᑲᔦ ᐎᔭ ᓂᒌ ᒦᒄ ᓲᐦᑳᑎᓰᐎᓂᔫ᙮ ᒌ ᐃᔅᐸᔫ ᒫᒃ ᔮᐸᒡ ᑌᑲᔥ ᒉᒌ ᐙᐐᐦᑕᒧᒡ ᐅᔫ ᒥᔻᒋᒧᐎᓂᔫ ᑲᔦ ᐊᓂᒌ ᐁᑳ ᒎᐗ ᑳ ᐃᑎᔅᑳᓀᓯᑣᐤ ᒉᒌ ᐅᐦᒋ ᐯᐦᑕᐦᒀᐤ, ᑲᔦ ᒫᒃ ᓂᒌ ᐐᐦᑯᒋᐦᐄᑰᓐ ᐁᑳ ᒉᒌ ᒨᑦ ᒥᔅᑕᑎᒧ᙮
18 ᐌᔥ ᐅᑎᐯᔨᐦᒋᑫᐤ ᓂᑲ ᐐᐦᑯᒋᐦᐄᐦᒄ ᒥᓯᐌ ᑖᓐ ᒉ ᐃᔑ ᐅᑎᐦᑕᐦᐅᑯᔮᓐ ᒉᒀᓐ ᐁ ᒫᔮᑕᐦᒡ ᑲᔦ ᐎᔭ ᓂᑲ ᐯᔒᒄ ᐊᓂᑌ ᐊᓂᔫ ᐅᒋᒫᐎᓂᔫ ᑭᐦᒋᑮᔑᑯᐦᒡ ᑳ ᐃᐦᑕᑯᓂᔨᒡ᙮ ᐎᔭ ᑲᑕ ᐐ ᒋᔅᑌᔨᐦᑖᑯᐦᐋᑲᓅ ᑳᒋᒉ ᓀᔥᑕ ᑳᒋᒉ᙮ ᐊᒣᓐ᙮
ᒫᐦᒋᔅᑕᐃ ᑳ ᐃᔑ ᐙᒋᔦᒧᐌᑦ ᑆᓪ
19 ᓂᐙᒋᔦᒫᐅᒡ ᑉᕆᓯᓚ ᐁᒄ ᒫᒃ ᐊᑶᓚ᙮ ᓂᐙᒋᔦᒫᐤ ᑲᔦ ᐅᓀᓯᕛᕋᔅ ᐁᒄ ᒫᒃ ᒥᓯᐌ ᐊᓂᑦ ᐊᓂᔫ ᐁ ᐯᔭᑯᑌᐅᓰᑦ᙮
20 ᐁᕋᔅᑕᔅ ᐐ ᐁᑯᑌ ᐊᓂᑌ ᒀᕆᓐᑦ ᐁ ᐃᐦᑖᑦ, ᐁᒄ ᑦᕎᕕᒪᔅ ᐊᓂᑌ ᒥᓖᑕᔅ ᐁᑯᑌ ᑳ ᐅᐦᒋᔅᑲᑕᒃ ᐁ ᒌ ᐋᐦᑯᓯᑦ᙮
21 ᓲᐦᒃ ᑯᒋᐦᑖᐦ ᒉᒌ ᑕᑯᔑᓂᔨᓐ ᐁᔥᒄ ᐁᑳ ᐱᐳᐦᒡ᙮ ᔫᐳᓚᔅ, ᐴᑌᓐᔅ, ᓚᐃᓇᔅ ᑲᔦ ᒃᓨᑎᔭ ᒥᓯᐌ ᒋᐙᒋᔦᒥᑯᐙᐅᒡ ᑲᔦ ᐊᓂᒌ ᑯᑕᑲᒡ ᒌᒋᔖᓅᒡ ᒋᐙᒋᔦᒥᑯᐙᐅᒡ᙮
22 ᐅᑎᐯᔨᐦᒋᑫᐤ ᒋᑲ ᐐᒉᐅᒄ ᒋᑕᐦᒑᐦᑯᐦᒡ ᑲᔦ ᒋᑲ ᒋᔐᐙᑐᑖᒄ᙮