16
Job ni Eliphaz a pathung
1 Hahoi Job ni a pathung teh,
2 Hot patet e hno teh, moikapap ka thai toe,
nangmouh abuemlae lungpahawinae haiyah thathoenae hrum doeh.
3 Kahlî lawk teh poutnae ao maw,
Hettelah pathung hane bang ni maw na tha a hmei sak.
4 Ka kangduenae hmuen heh na kangduenae hmuen lah awm pawiteh,
kai ni hai na dei awh e hah ka dei thai van han.
5 Hateiteh, ka pahni ni tha na o sak awh han.
Ka pahni dawk hoi lungroumnae lawk ni na lungmathoenae a kahma sak han.
6 Lawk ka dei nakunghai ka lungmathoenae roum sak thai hoeh.
Duem ka o nakunghai bang alânae awm hoeh.
7 Hateiteh, ama ni na tawn sak teh,
ka huikonaw puenghai kingdi sak toe.
8 Nama ni khakkatek teh,
hot ni kai hanelah kapanuekkhaikung lah ao.
Ka kamsoenae ni yon na pen teh, hot ni ka minhmai dawk ka panuek khai e lah ao.
9 A lungkhueknae ni rekrek na sei teh, na hmuhma.
A hâkam na kata sin teh, ka taran ni na hmaiet.
10 Pahni na ang sin awh teh,
lungroukatetlah ka tangboung dawk na tambei.
Kai na taran hanelah cungtalah a kamkhueng awh.
11 Cathut ni Cathut banglah ka ngaihoeh naw koe na pâseng,
tamikathoutnaw kut dawk na tâkhawng.
12 Kanawmcalah ka o eiteh, ama ni rekrek na bawng.
Ka lahuen dawk na man teh, bengbeng na kahuet teh,
rek ka kâbawng, kai teh tâkhawng hanelah ka o.
13 Ahnie pala kakanaw ni na kalup awh.
Ka lung poukkayawng lah na ka teh,
na pahren hoeh, talai dawk ka hmu e tui hah a ka rabawk.
14 Ka hmâ dawkvah patuen patuen hmâ na paca
ka pahngawpahrak e ransanaw patetlah na cusin.
15 Ka vuen dawkvah, burihni ka khui sin teh,
ka lû teh vaiphu dawk ka hruek.
16 Ka ka lawi vah ka minhmai a paling teh,
ka mit dawk duenae tâhlip ao.
17 Ka kut dawk kahawihoehe hno kasake awm hoeh.
Ka ratoumnae teh a thoung ei te.
18 Oe talai, ka thipaling heh ramuk han haw.
Ka kanae ni kâhatnae hmuen tawn hanh naseh.
19 Atu patenghai, kapanuekkhaikung teh
a rasangnae koevah ao.
20 Ka huinaw ni na dudam awh.
Cathut koe ka mitphi a lawng.
21 Tami ni imri hanelah, a kâhei pouh e patetlah,
oe Cathut koe na kâhet pouh hane awm haw pawiteh,
22 Bangkongtetpawiteh, kum nâsittouh abaw hoehnahlan,
bout ban hoeh nae lamthung dawk ka cei han telah ati.