17
1 Ka hringnae hah a kâbawng teh, ka hninnaw hai aloum toe.
Kai hanelah phuen hai coungkacoe lah ao toe.
2 Ka panuikhai e hah kai koe awm awh hoeh maw.
Ka lung ka khuek sak e lawk ka mit a um nahoehmaw.
3 Nama dueng lahoi kai hanelah, lawkkamnae hah sak,
kut na ka man e teh api han namaw.
4 Bangkongtetpawiteh, panuethainae dawk hoi, a lungthin hah na hro.
Hatdawkvah ahnimouh teh, na rasangsak mahoeh.
5 A huiko koe dumnae hoi oupnae lawk ka dei e teh,
a canaw e mit totouh a mawm han.
6 Hateiteh, tamimaya koe kâpankhai rumram hanelah na sak teh,
ahnimae hmalah tamtui pathasin rumram hanelah ka o.
7 Ka lungmathoenae kecu dawk ka mit totouh a mawm teh,
ka takthai pueng heh tâhlip rumram la ao.
8 Tamikalannaw ni hetheh kângairu ati awh han,
kayonhoehe taminaw ni cathutlaipa e taminaw a taran awh han.
9 Hateiteh, tamikalan ni a lamthung hah a kuet vaiteh,
ka thoung e kut ka tawn e teh hoe a thao han.
10 Hateiteh, abuemlahoi pahren lahoi bout ban awh.
Bangkongtetpawiteh, nangmouh thung dawkvah
tamilungkaang ka hmawt pawm mahoeh.
11 Ka hninnaw hai aloum toe.
Ka lungthung hoi ka pouk teh, ka noe e naw hai ayawmyin lah doeh ao.
12 Tangmin hah kanîthun lah a kâthungsak teh,
khohmo thung hai angnae a hnai toe ati awh.
13 Phuen hah ka im patetlah ka ring teh,
hmonae thung vah ikhun ka sak pawiteh,
14 rawkphainae hah apa doeh ka ti teh,
tangraet koe nang teh anu hoi ka tawncanu doeh ka tetpawiteh,
15 ka ngaihawinae teh, nâ lah maw ao vai,
ka ngaihawinae teh, apinimaw a hmu.
16 Duenae kho takhang koe lah, a kamleng awh vaiteh,
vaiphu dawk rei ka kâhat han namaw, telah ati.