27
Job ni a lannae a kampang
1 Job ni a dei e hah bout a patawp teh,
2 Cathut ni ka lannae, na la pouh teh,
Athakasaipounge, ka hringnae ka pataw sak e teh a hring e patetlah,
3 Ka thung e a thakaawm sak e Cathut e kâha teh
ka hnong dawk ao thung pueng teh,
4 Ka pahni ni kathoute lawk dei mahoeh.
Ka lai ni dumnae tâcawtsak mahoeh.
5 Na lan awh tie hah ka dei hane savisava doeh.
Ka due totouh ka lannae heh khoeroe ka pahnawt mahoeh.
6 Ka lannae heh kacakcalah ka kuet teh, kahmat sak mahoeh.
Ka hring thung pueng ka lungthin ni kama yon na pen mahoeh.
7 Ka taran hah tamikathout patetlah awm awh naseh.
Kai na taranlahoi ka kangdout e hah tami kalan hoeh lah awm awh naseh.
8 Bangkongtetpawiteh, tami kahawihoehe naw ngaihawinae teh, banghai nahoeh.
Moi ka tawn nakunghai Cathut ni a hringnae lat pawiteh,
9 a lathueng vah runae a pha torei teh,
a cingounae hah Cathut ni a thai pouh han maw.
10 Athakasaipounge, lah amahoima a lunghawi han namaw,
Cathut hah pou a kaw han namaw.
11 Cathut e kut hoi a sak e hah na dei pouh vai.
Athakasaipounge, koevah kaawm e hah ka hrawk mahoeh.
12 Hot teh abuemlah ni na hmu katang awh.
Hottelah pawiteh, bangkongmaw bang hoeh e dawk pou na panui awh.
13 Hetteh, Cathut koehoi tamikathoutnaw coe hanelah ao.
Tami kahnephnapnaw e a coe e raw.
Athakasaipounge, koehoi a hmu awh e teh,
14 a catounnaw a kamphung nakunghai tahloi hanelah doeh ao.
A canaw ni vonhlam hoi kho a sak awh han.
15 Kaawm rae naw teh, duenae dawk pakawp la ao awh han.
Lahmainaw ni khuikapkhai mahoeh.
16 Vaiphu patetlah ngunnaw ka pâtung nakunghai,
tangdong patetlah hnopai ka pâtung nakunghai,
17 a pâtung thai han. Hateiteh, tamikalan ni a khohna han,
kayonhoehnaw ni ahnie ngun hah a kârei awh han.
18 Bomba patetlah im a sak teh,
ramveng ni rim a sak e patetlah doeh ao.
19 Tami ka tawn poung ni a due torei teh, pakawp e lah awm mahoeh.
A mit a padai nah teh koung a kahma toe.
20 Takithopoung e ni ahni teh tuikalen patetlah a la.
Karum lah tûilî ni a kahma sak.
21 Kanîtholah kahlî ni a palek teh awmhoeh toe.
A onae hmuen koehoi a palek.
22 Pek e awm laipalah ama khuehoi a palek.
A thasainae thung hoi koung a kahma han.
23 Taminaw ni a kuttabawng sin han.
Terawseh tet awh vaiteh aonae koehoi a pâlei awh han.