28
Lungangnae kong dawk Job ni lawk a dei
1 Ngun tainae tangkom ao katang,
sui sôlêinae a hmuen hai ao.
2 Sum teh talai dawk hoi la e lah a o,
rahum teh talung dawk hoi thawng e lah ao.
3 Tami ni hnonae dawk a pout sak teh,
a hmuen kingkadi e pueng totouh a tawng awh,
duenae tâhlip hoi hmonae thung vah
a cei awh teh a tawng awh.
4 Tami a ohoehnae koe vah tangkom a tai teh,
khok ni a pahnim e hmuennaw hah
tami hoi a kâhlanae hmuen koe a bang awh teh,
pou a kâhuet awh.
5 Talai e tui dawk hoi rawca tâconae lah a o,
a rahim lah teh hmai ni talai a kâthungsak e patetlah ao.
6 Hote talungnaw teh, sapphire talung a phukaawm
a tâconae a kung lah ao. Sui kanuinaw hai ao.
7 Hote lamthung teh tavanaw ni panuek hoeh,
mataw e mit ni hai hmawt hoeh.
8 Ka po e sendek ni hai coungroe hoeh,
ka matheng e sendek hai cet boihoeh.
9 Talung dawk tami ni kut a toung teh,
mon hah a kung koehoi pakhuppathan lah dek a palei.
10 Lungsongpui hah a kavi teh, ravohong a sak teh,
a mit hoi a phukaawm poung e hno hah a hmu.
11 Tui ka phuek e hah a tawng teh,
kâhrawk e hnonaw hah angnae dawk a tâcokhai.
12 Hateiteh, nâ lah maw lungangnae hmuthainae teh,
nâ lah maw panuethainae hmuen hah ao.
13 Aphu onae tami ni panuek hoeh,
Tami onae ram dawk hmu thai lah awm hoeh.
14 Kadunge ni kai koe awm hoeh telah a ti,
talî ni kai koe awm hoeh a ti.
15 Sui hoi ran thai lah awm hoeh,
aphu teh ngun hoi hai bangnue thai lah awm hoeh.
16 Ophir talung phu kaawm ni hai phat thai hoeh,
aphu kaawm poung e onyx hoi
sapphire ni hai phat thai hoeh.
17 Sui hoi talung phukaawm ni hai phat thai hoeh,
sui kathoung hoi hai thung thai lah awm hoeh.
18 Koral hoi jasper hai deipan han kamcu hoeh,
Bangkongtetpawiteh, lungangnae phu teh,
Rubies talung hlak hai a phu hoe a rasang.
19 Ethiopia ram e topaz talung phu kaawm ni phat thai hoeh,
sui kathoung ni hai aphu onae phat thai hoeh.
20 Hot patet lae lungangnae teh,
nâhoi maw a tho,
thoumthainae hmuen teh nâ lah maw ao.
21 Kahringnaw pueng e mit ni a khet teh hmawt thai hoeh,
kalvan e tavanaw ni hai a tawng teh hmawt thai hoeh.
22 Rawkphainae hoi duenae ni a dei awh e kamthang hah,
ka hnâ ni a thai telah ati awh.
23 Cathut ni a lamthung hah a panue pouh teh,
hmuen hai a panue
24 Bangkongtetpawiteh, ama ni talai apout totouh a khet,
kalvan rahim pueng hah a hmu.
25 Kahlî teh khing hane hoi,
tui teh bangnuenae hoi bangnue hane,
26 kho a rak nahanelah lamthung a sak pouh teh,
khoparitnae hoi sumpapalik nahane lamthung a sak pouh navah,
27 Lungangnae a hmu teh a pâpho,
a caksak teh a tawng.
28 Tami koe khenhaw! BAWIPA takinae teh lungangnae doeh,
kahawihoehe ceitakhai e teh
panuethainae doeh telah a ti.